കോഴിക്കോട്: തടമ്പാട്ടുത്താഴത്തെ അപ്പാര്‍ട്ട്മെന്റില്‍ മോഷണം നടത്തിയ രണ്ട് യുവാക്കളെ ചേവായൂര്‍ പോലീസ് പിടികൂടി. കാരപ്പറമ്പ് സ്വദേശി നൗഫല്‍ (30), കുന്ദമംഗലം സ്വദേശി ഷാമില്‍ മുഹമ്മദ് (30) എന്നിവരാണ് അറസ്റ്റിലായത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. കഴിഞ്ഞ ഏപ്രില്‍ 24-നായിരുന്നു കേസിനാസ്പദമായ മോഷണം നടന്നത്. അപ്പാര്‍ട്ട്മെന്റില്‍ നിന്ന് മൂന്ന് തബലകളും അയ്യായിരം രൂപ വിലവരുന്ന ചെരിപ്പുകളുമാണ് ഇവര്‍ മോഷ്ടിച്ചത്.
താമസക്കാരി നല്‍കിയ പരാതിയുടെ അടിസ്ഥാനത്തില്‍ പോലീസ് നടത്തിയ പരിശോധനയില്‍ സമീപത്തെ സിസിടിവി ദൃശ്യങ്ങളില്‍ നിന്ന് പ്രതികളെയും ഇവര്‍ സഞ്ചരിച്ച വാഹനത്തെയും കുറിച്ച് സൂചന ലഭിച്ചു. സൈബര്‍ സെല്ലിന്റെ സഹായത്തോടെ നടത്തിയ നീക്കത്തിനൊടുവില്‍ കുന്ദമംഗലത്തുനിന്ന് ഷാമിലിനെയും ചേവായൂരില്‍ നിന്ന് നൗഫലിനെയും പോലീസ് പിടികൂടുകയായിരുന്നു. അറസ്റ്റിലായ നൗഫല്‍ മുന്‍പും ക്രിമിനല്‍ കേസുകളില്‍ ഉള്‍പ്പെട്ടിട്ടുള്ളയാളാണെന്ന് പോലീസ് പറഞ്ഞു.
ലഹരി ഉപയോഗിച്ചതിനും പൊതുസ്ഥലത്ത് മദ്യപിച്ചതിനും ഇയാള്‍ക്കെതിരെ നടക്കാവ് സ്റ്റേഷനില്‍ കേസുകളുണ്ട്. ചേവായൂര്‍ ഇന്‍സ്‌പെക്ടര്‍ മഹേഷ് പി., സബ് ഇന്‍സ്‌പെക്ടര്‍ ബിജു, എഎസ്‌ഐ മനോജ് എന്നിവരുടെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതികളെ വലയിലാക്കിയത്. മോഷണം പോയ സാധനങ്ങള്‍ കണ്ടെത്താനുള്ള ശ്രമങ്ങള്‍ പോലീസ് തുടരുകയാണ്.
