മൈസൂരു: മൈസൂരിലെ വിവിധ നഴ്സിങ് കോളേജ് ഹോസ്റ്റലുകളില് മലയാളി വിദ്യാര്ത്ഥികള് ഉള്പ്പെടെയുള്ളവര് കടുത്ത മനുഷ്യാവകാശ ലംഘനത്തിന് ഇരയാകുന്നതായി പരാതി. ഹോസ്റ്റല് മെസ്സുകളില് നല്കുന്ന ഭക്ഷണത്തില് പ്ലാസ്റ്റിക്കും ചത്ത പാറ്റകളും ഉള്പ്പെടെയുള്ള മാലിന്യങ്ങള് പതിവാണെന്നും ഇത് ചോദ്യം ചെയ്യുന്നവരെ അധികൃതര് ഭീഷണിപ്പെടുത്തുന്നതായും വിദ്യാര്ത്ഥികള് ആരോപിക്കുന്നു.
ഗ്ലോബല് എജ്യുക്കേഷന് സര്വീസ് എന്ന ഏജന്സിയാണ് ഇവിടത്തെ കോമണ് മെസ്സുകളില് ഭക്ഷണം എത്തിക്കുന്നത്. വിദ്യാര്ത്ഥികള് പുറത്തുവിട്ട ദൃശ്യങ്ങള് പ്രകാരം ഭക്ഷണത്തിന്റെ ചോറിനുള്ളില് ചത്ത പാറ്റകളെ കണ്ടെത്തി. കോഴിക്കറിയില് വൃത്തിയാക്കാത്ത തൂവലുകളും മറ്റ് അവശിഷ്ടങ്ങളും കാണപ്പെട്ടു. ചപ്പാത്തിക്കുള്ളില് പ്ലാസ്റ്റിക് കഷ്ണങ്ങള് കണ്ടെത്തിയതായും വിദ്യാര്ത്ഥികള് പറയുന്നു.
പ്രതിവര്ഷം 80,000 രൂപ വരെയാണ് മെസ് ഫീസായി ഓരോ വിദ്യാര്ത്ഥിയും നല്കുന്നത്. ഇത്രയും വലിയ തുക വാങ്ങിയിട്ടും നല്കുന്നത് വിഷതുല്യമായ ഭക്ഷണമാണെന്നാണ് പരാതി. വൃത്തിഹീനമായ ഭക്ഷണത്തെക്കുറിച്ച് പരാതിപ്പെടുന്ന വിദ്യാര്ത്ഥികളെ ഇന്റേണല് മാര്ക്ക് വെട്ടിക്കുറയ്ക്കുമെന്നും കോഴ്സ് കഴിഞ്ഞാല് സര്ട്ടിഫിക്കറ്റുകള് നല്കില്ലെന്നും പറഞ്ഞ് കോളേജ് അധികൃതര് വിരട്ടുന്നു.
മാശം ഭക്ഷണം കഴിച്ച് പലര്ക്കും തുടര്ച്ചയായി ഭക്ഷ്യവിഷബാധ ഏല്ക്കുന്നതായും വിദ്യാര്ത്ഥികള് പറയുന്നു. മൈസൂരില് പഠിക്കുന്ന നൂറുകണക്കിന് മലയാളി വിദ്യാര്ത്ഥികളുടെ ഭാവിയും ആരോഗ്യവും വെച്ചാണ് അധികൃതര് പന്താടുന്നത്. പഠനം മുടങ്ങുമെന്ന ഭയം കാരണം പലരും പരസ്യമായി പ്രതികരിക്കാന് മടിക്കുകയാണ്. സംഭവത്തില് അധികൃതരുടെ അടിയന്തര ഇടപെടല് ആവശ്യപ്പെട്ട് രക്ഷിതാക്കളും രംഗത്തെത്തിയിട്ടുണ്ട്.
