ശ്രീവിജയപുരം: ലോക റെക്കോര്ഡുകള് ഭേദിച്ച് ആന്ഡമാന് നിക്കോബാര് ദ്വീപുസമൂഹം. സ്വരാജ് ദ്വീപിലെ വിഖ്യാതമായ രാധാനഗര് ബീച്ചിന് സമീപം കടലിനടിയില് ഭീമാകാരമായ ദേശീയ പതാക സ്ഥാപിച്ചാണ് ആന്ഡമാന് ഭരണകൂടം ചരിത്രം കുറിച്ചത്. 60 മീറ്റര് നീളവും 40 മീറ്റര് വീതിയുമുള്ള ഇന്ത്യയുടെ അഭിമാനമായ ത്രിവര്ണ്ണ പതാകയാണ് നീലക്കടലിന്റെ ആഴങ്ങളില് അനാവരണം ചെയ്തത്. അതിസങ്കീര്ണ്ണമായ ഈ സമുദ്ര ദൗത്യത്തിന് പിന്നില് വിവിധ വകുപ്പുകളുടെ കൂട്ടായ പരിശ്രമമുണ്ട്. ആന്ഡമാന് പോലീസ്, കോസ്റ്റ് ഗാര്ഡ്, ഇന്ത്യന് നേവി, വനം വകുപ്പ് എന്നിവര്ക്കൊപ്പം ഇരുന്നൂറിലധികം പ്രൊഫഷണല് സ്കൂബ ഡൈവര്മാരും കൈകോര്ത്തു.
ഈ ദൗത്യത്തിലെ ഏറ്റവും വലിയ പ്രത്യേകത മൂന്ന് സ്കൂള് വിദ്യാര്ത്ഥികളുടെ പങ്കാളിത്തമായിരുന്നു. ഫത്തേ ജഹാന് സിംഗ് (16), ലാവണ്യ ഐറ (15), രണ്വിജയ് സിംഗ് (14) എന്നിവര് ഈ ചരിത്ര നേട്ടത്തില് പങ്കാളികളായ ഏറ്റവും പ്രായം കുറഞ്ഞ ഡൈവര്മാരായി മാറി. ചീഫ് സെക്രട്ടറി ചന്ദ്ര ഭൂഷണ് കുമാര്, ഡിജിപി എച്ച് എസ് ധലിവാള് തുടങ്ങി ഭരണരംഗത്തെ പ്രമുഖര് ചടങ്ങില് സംബന്ധിച്ചു. ആഗോളതലത്തില് സ്നോര്ക്കലിംഗിനും ഡൈവിംഗിനും പേരുകേട്ട ആന്ഡമാനെ സാഹസിക ടൂറിസത്തിന്റെ ലോക ഭൂപടത്തില് ഒന്നാമതെത്തിക്കുക എന്നതാണ് ഈ നീക്കത്തിലൂടെ ഭരണകൂടം ലക്ഷ്യമിടുന്നത്.
‘കടലിനടിയില് പതാക ഉയര്ത്തിയതിലൂടെ ഇന്ത്യയുടെ കരുത്തും പൈതൃകവും സമുദ്ര വിനോദസഞ്ചാര സാധ്യതകളും ലോകത്തിന് മുന്നില് പ്രദര്ശിപ്പിക്കുകയാണ്.’ പതാകയുടെ റെക്കോര്ഡിന് തൊട്ടുപിന്നാലെ മറ്റൊരത്ഭുതം കൂടി അണിയറയില് ഒരുങ്ങുന്നുണ്ട്. ഇന്ന് സ്വരാജ് ദ്വീപിലെ ലൈറ്റ് ഹൗസ് ഡൈവ് സൈറ്റില് വെച്ച് സമുദ്രാന്തര്ഭാഗത്തെ ഏറ്റവും ഉയരം കൂടിയ ‘മനുഷ്യ ഗോപുരം’ നിര്മ്മിക്കാനാണ് അധികൃതര് പദ്ധതിയിടുന്നത്. ഇതിലൂടെ ഗിന്നസ് വേള്ഡ് റെക്കോര്ഡില് ഇടംപിടിക്കാമെന്നാണ് പ്രതീക്ഷ.
