മലപ്പുറം/കോഴിക്കോട്: വോട്ടെണ്ണലിനോടനുബന്ധിച്ച് നിയമവിരുദ്ധമായി കടത്താന് ശ്രമിച്ച വിദേശമദ്യ ശേഖരം എക്സൈസ് പിടികൂടി. മലപ്പുറം കാളികാവ് വെന്തോടം പടിയില് വെച്ച് നടന്ന പരിശോധനയിലാണ് സ്കൂട്ടറില് ഒളിപ്പിച്ചു കടത്തുകയായിരുന്ന 60-ഓളം മദ്യക്കുപ്പികളുമായി രണ്ട് യുവാക്കള് വലയിലായത്. എടത്തനാട്ടുകര സ്വദേശികളാണ് പിടിയിലായത്. തിരഞ്ഞെടുപ്പ് ഫലപ്രഖ്യാപനത്തിന് പിന്നാലെയുള്ള ആഘോഷങ്ങള് ലക്ഷ്യമിട്ടാണ് മദ്യം എത്തിച്ചതെന്നാണ് പ്രാഥമിക നിഗമനം.
വോട്ടെണ്ണല് ദിനത്തില് അനിഷ്ട സംഭവങ്ങള് ഒഴിവാക്കാന് കോഴിക്കോട് ജില്ലാ ഭരണകൂടവും പോലീസും ജാഗ്രതയിലാണ്. കോഴിക്കോട് ജില്ലയില് വോട്ടെണ്ണല് ദിവസം നിരോധനാജ്ഞ പ്രഖ്യാപിച്ചു. ക്രമസമാധാന പ്രശ്നങ്ങള് തടയാന് പടക്ക വില്പനയ്ക്കും കളക്ടര് വിലക്കേര്പ്പെടുത്തിയിട്ടുണ്ട്. വിജയാഘോഷങ്ങള്ക്ക് പോലീസിന്റെ മുന്കൂര് അനുമതി നിര്ബന്ധമാണ്. വൈകുന്നേരം 7 മണിയോടെ എല്ലാ പ്രകടനങ്ങളും അവസാനിപ്പിക്കണം.
ആഘോഷങ്ങളില് ഡി.ജെ സംവിധാനങ്ങള് പാടില്ല. ആയുധങ്ങളോ വടികളോ സ്ഫോടക വസ്തുക്കളോ പ്രകടനങ്ങളില് ഉപയോഗിക്കുന്നതിനും കടുത്ത നിരോധനമുണ്ട്. ‘അതിരുവിട്ട ആഹ്ലാദ പ്രകടനങ്ങള് തടയാന് സുരക്ഷാ സേനയ്ക്ക് കര്ശന നിര്ദ്ദേശം നല്കിയിട്ടുണ്ട്. നിയന്ത്രണങ്ങള് ലംഘിക്കുന്നവര്ക്കെതിരെ നിയമനടപടി സ്വീകരിക്കും.’ ജില്ലാ അതിര്ത്തികളിലും പ്രധാന കേന്ദ്രങ്ങളിലും പോലീസ് പട്രോളിംഗ് ശക്തമാക്കി. സുഗമമായ വോട്ടെണ്ണല് ഉറപ്പാക്കുന്നതിനൊപ്പം പ്രകോപനപരമായ പ്രസംഗങ്ങളോ പ്രവൃത്തികളോ ഉണ്ടാകാതിരിക്കാന് പ്രത്യേക നിരീക്ഷണം ഏര്പ്പെടുത്തിയിട്ടുണ്ട്.
