കൊല്ലം/കാസര്ഗോഡ്: നിയമസഭാ തിരഞ്ഞെടുപ്പിന്റെ വോട്ടെണ്ണല് നടക്കാനിരിക്കെ, ക്രമസമാധാന പാലനത്തിന്റെ ഭാഗമായി കൊല്ലം, കാസര്ഗോഡ് ജില്ലകളില് പടക്ക വില്പ്പനയ്ക്കും ഉപയോഗത്തിനും വിലക്കേര്പ്പെടുത്തി. വോട്ടെണ്ണല് ദിനമായ തിങ്കളാഴ്ച പടക്ക കടകള് തുറക്കാനോ ആഘോഷങ്ങളില് സ്ഫോടകവസ്തുക്കള് ഉപയോഗിക്കാനോ പാടില്ലെന്ന് അതത് ജില്ലാ കളക്ടര്മാര് ഉത്തരവിട്ടു.
തിങ്കളാഴ്ച ജില്ലകളില് പടക്കങ്ങളുടെ വിപണനവും ഉപയോഗവും പൂര്ണ്ണമായും തടഞ്ഞു. വിജയാഘോഷങ്ങള് സംഘടിപ്പിക്കുന്നതിന് തടസ്സമില്ലെങ്കിലും അവ അതിരുവിടാതിരിക്കാന് പോലീസ് നിരീക്ഷണം ശക്തമാക്കും. സംഘര്ഷസാധ്യതയുണ്ടായാല് കര്ശനമായ നിയമനടപടികള് സ്വീകരിക്കും.
കൊല്ലത്തിനും കാസര്ഗോഡിനും പുറമെ കണ്ണൂര്, കോഴിക്കോട് ജില്ലകളിലും സമാനമായ നിയന്ത്രണങ്ങള് നേരത്തെ തന്നെ പ്രാബല്യത്തില് വന്നിട്ടുണ്ട്. കോഴിക്കോട് ജില്ലയില് പടക്ക നിരോധനത്തിന് പുറമെ നിരോധനാജ്ഞയും (144) പ്രഖ്യാപിച്ചിട്ടുണ്ട്.
‘വോട്ടെണ്ണല് കേന്ദ്രങ്ങളിലും രാഷ്ട്രീയ പാര്ട്ടികളുടെ ശക്തികേന്ദ്രങ്ങളിലും അനിഷ്ട സംഭവങ്ങള് ഒഴിവാക്കാനാണ് ഇത്തരമൊരു മുന്കരുതല് നടപടി സ്വീകരിച്ചിരിക്കുന്നത്.’ തിരഞ്ഞെടുപ്പ് ഫലം പുറത്തുവരുന്ന ഘട്ടത്തില് ആഹ്ലാദപ്രകടനങ്ങള് സംഘര്ഷങ്ങളിലേക്ക് വഴിമാറാതിരിക്കാന് എല്ലാ ജില്ലകളിലും സുരക്ഷാ സേനയ്ക്ക് പ്രത്യേക ജാഗ്രതാ നിര്ദ്ദേശം നല്കിയിട്ടുണ്ട്. പടക്ക വില്പ്പന തടയാന് കടകള് കേന്ദ്രീകരിച്ച് പരിശോധന നടത്താനും സ്ക്വാഡുകളെ നിയോഗിച്ചിട്ടുണ്ട്.
