ന്യൂഡല്ഹി: പ്രധാനമന്ത്രി നരേന്ദ്ര മോദിക്കെതിരെ തൃണമൂല് കോണ്ഗ്രസ് നേതാക്കള് നടത്തുന്ന തരംതാഴ്ന്ന പരാമര്ശങ്ങള്ക്കെതിരെ കടുത്ത ഭാഷയില് പ്രതികരിച്ച് കേന്ദ്രമന്ത്രി കിരണ് റിജിജു. മോദിജിയെ വ്യക്തിപരമായി അധിക്ഷേപിക്കുന്നതിലൂടെ പ്രശസ്തി നേടാമെന്ന് കരുതുന്ന പ്രതിപക്ഷത്തിന്റെ അഹങ്കാരത്തിന് ജനങ്ങള് തന്നെ മറുപടി നല്കുമെന്ന് അദ്ദേഹം എക്സില് (ട്വിറ്റര്) കുറിച്ചു. അടിസ്ഥാന മര്യാദകള് പോലും പാലിക്കാത്ത കോണ്ഗ്രസ് നേതാക്കളുടെ നടപടി ഖേദകരമാണെന്ന് റിജിജു പറഞ്ഞു. പ്രധാനമന്ത്രിയെ ലക്ഷ്യം വെക്കുന്നവരുടെ രാഷ്ട്രീയ സ്വാധീനം രാജ്യത്ത് കുറഞ്ഞുവരികയാണെന്നും, ജനവികാരം മോദിജിക്കൊപ്പമാണെന്നും അദ്ദേഹം ഓര്മ്മിപ്പിച്ചു.
തന്റെ ഒരു അഭിമുഖത്തിലെ ദൃശ്യങ്ങള് പങ്കുവെച്ചുകൊണ്ടായിരുന്നു കേന്ദ്രമന്ത്രിയുടെ ഈ വിമര്ശനം. പശ്ചിമ ബംഗാള് നിയമസഭാ തിരഞ്ഞെടുപ്പില് ബിജെപി കൈവരിച്ച സമാനതകളില്ലാത്ത വിജയത്തിന്റെ പശ്ചാത്തലത്തിലാണ് റിജിജുവിന്റെ പ്രതികരണം ശ്രദ്ധേയമാകുന്നത്. മുന്പ് 77 സീറ്റുകളുണ്ടായിരുന്ന ബിജെപി ഇത്തവണ 206 സീറ്റുകള് തൂത്തുവാരിയാണ് ബംഗാളില് ചരിത്രം രചിച്ചത്. ഇടതുപക്ഷത്തിനും കോണ്ഗ്രസിനും പിന്നാലെ തൃണമൂല് കോണ്ഗ്രസിനും ബംഗാള് മണ്ണില് വന് പതനമാണ് ഉണ്ടായത്.
ഡല്ഹിയിലെ പാര്ട്ടി ആസ്ഥാനത്ത് നടന്ന വിജയാഘോഷത്തില് സംസാരിക്കവെ, ബംഗാളിലെ വോട്ടര്മാര്ക്ക് പ്രധാനമന്ത്രി നരേന്ദ്ര മോദി നന്ദി രേഖപ്പെടുത്തി. ലോകമെങ്ങും അസ്ഥിരത നിലനില്ക്കുമ്പോള് ഭാരതം രാഷ്ട്രീയ സുസ്ഥിരതയ്ക്കാണ് വോട്ട് ചെയ്തതെന്ന് അദ്ദേഹം പറഞ്ഞു. ‘ബംഗാളിന്റെ ചരിത്രത്തില് ആദ്യമായി ഒരു തിരഞ്ഞെടുപ്പ് കാലത്ത് ഒരു നിരപരാധിയുടെ പോലും ജീവന് നഷ്ടപ്പെട്ടില്ല എന്നത് ജനാധിപത്യത്തിന്റെ വലിയ വിജയമാണ്,’ പ്രധാനമന്ത്രി ചൂണ്ടിക്കാട്ടി.
അക്രമ രാഷ്ട്രീയത്തിന്റെ ചങ്ങലകള് പൊട്ടിച്ചെറിയാന് സമയമായെന്നും, പ്രതികാര രാഷ്ട്രീയത്തിന് പകരം വികസനത്തിനായി ഒത്തൊരുമിച്ച് പ്രവര്ത്തിക്കണമെന്നും അദ്ദേഹം ആഹ്വാനം ചെയ്തു. വര്ഷങ്ങളായി നിലനിന്നിരുന്ന ബംഗാളിലെ രാഷ്ട്രീയ സമവാക്യങ്ങളെ പാടെ മാറ്റിമറിച്ചുകൊണ്ടുള്ള ബിജെപിയുടെ ഈ കുതിച്ചുചാട്ടം ദേശീയ രാഷ്ട്രീയത്തിലും വലിയ ചര്ച്ചകള്ക്കാണ് വഴിതുറന്നിരിക്കുന്നത്.
