തിരുവനന്തപുരം: സംസ്ഥാനത്ത് കഠിനമായ ചൂട് തുടരുന്നതിനിടയില് ആശ്വാസ വാര്ത്തയുമായി കാലാവസ്ഥാ നിരീക്ഷണ കേന്ദ്രം. കേരളത്തിലെ വിവിധ ജില്ലകളില് അടുത്ത ദിവസങ്ങളില് വേനല്മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ചില ജില്ലകളില് ശക്തമായ മഴ പെയ്യാന് സാധ്യതയുള്ളതിനാല് ജാഗ്രതാനിര്ദ്ദേശം പുറപ്പെടുവിച്ചിട്ടുണ്ട്.
ഇന്ന് എറണാകുളം, ഇടുക്കി, വയനാട് നാളെ എറണാകുളം, ഇടുക്കി, തൃശൂര് ജില്ലകളില് ജാഗ്രതാ നിര്ദ്ദേശം, ഏഴിന് ആലപ്പുഴ, കോട്ടയം, എറണാകുളം ജില്ലകളില് ശക്തമായ മഴയ്ക്ക് സാധ്യത ആയതിനാല് യെല്ലോ അലേര്ട്ടാണ്. അതേസമയം, മഴ പെയ്യുമെങ്കിലും സംസ്ഥാനത്തെ 12 ജില്ലകളില് കൊടുംചൂട് തുടരും. പാലക്കാട് ജില്ലയിലാണ് ഏറ്റവും കൂടുതല് ചൂട് (40) രേഖപ്പെടുത്തുന്നത്. കൊല്ലം (39), തൃശൂര് (38) എന്നിവിടങ്ങളിലും താപനില ഉയര്ന്നുതന്നെയാണ്. ഇടുക്കി, വയനാട് ജില്ലകളില് മാത്രമാണ് നിലവില് ചൂട് കുറവുള്ളത്.
സൂര്യാഘാതം, നിര്ജലീകരണം എന്നിവ ഒഴിവാക്കാന് പൊതുജനങ്ങള് താഴെ പറയുന്ന മുന്കരുതലുകള് എടുക്കണമെന്ന് അധികൃതര് നിര്ദ്ദേശിച്ചു. പകല് 11 മണി മുതല് 3 മണി വരെ നേരിട്ട് വെയിലേല്ക്കുന്നത് ഒഴിവാക്കുക. ദാഹമില്ലെങ്കിലും ധാരാളം വെള്ളം കുടിക്കുക. ഒപ്പം മോര്, നാരങ്ങാവെള്ളം, ഉപ്പിട്ട കഞ്ഞിവെള്ളം എന്നിവ ശീലമാക്കുക. ഇളം നിറത്തിലുള്ള അയഞ്ഞ കോട്ടണ് വസ്ത്രങ്ങള് ധരിക്കുക. പുറത്തിറങ്ങുമ്പോള് കുടയോ തൊപ്പിയോ ഉപയോഗിക്കുക.
ജലാംശം കൂടുതലുള്ള പഴങ്ങളും പച്ചക്കറികളും ഭക്ഷണത്തില് ഉള്പ്പെടുത്തുക. വേനല്മഴ പെയ്യുന്ന സാഹചര്യത്തില് പകര്ച്ചവ്യാധികള്ക്കെതിരെ ജാഗ്രത പാലിക്കുക. ഐസ് ചേര്ത്ത ജ്യൂസുകള് ഉപയോഗിക്കുമ്പോള് ശുദ്ധജലം തന്നെയാണെന്ന് ഉറപ്പുവരുത്തുക. സാധാരണ താപനിലയേക്കാള് കൂടുതല് ചൂട് അനുഭവപ്പെടുകയും അത് ദിവസങ്ങളോളം നീണ്ടുനില്ക്കുകയും ചെയ്യുന്ന അവസ്ഥയാണിത്. ഹീറ്റ് സ്ട്രോക്ക് (സൂര്യാഘാതം), ഹീറ്റ് ക്രാമ്പ് (പേശീവലിവ്), ഹീറ്റ് എക്സോഷന് (അമിത ക്ഷീണം) എന്നിവയാണ് ഇതിന്റെ പ്രധാന പ്രത്യാഘാതങ്ങള്. കുട്ടികള്, മുതിര്ന്നവര്, ഗര്ഭിണികള് എന്നിവര് വെയിലത്ത് പോകുന്നത് പരമാവധി ഒഴിവാക്കി പ്രത്യേക കരുതല് നല്കണമെന്നും ദുരന്ത നിവാരണ അതോറിറ്റി അറിയിച്ചു.
