ഡെറാഡൂണ്: കോണ്ഗ്രസ് നേതാവ് രാഹുല് ഗാന്ധിയുടെ പേഴ്സണല് സെക്രട്ടറി എന്ന വ്യാജേന വിവിധ സംസ്ഥാനങ്ങളിലെ രാഷ്ട്രീയ നേതാക്കളില് നിന്നും പ്രവര്ത്തകരില് നിന്നും കോടിക്കണക്കിന് രൂപ തട്ടിയെടുത്തയാള് പിടിയില്. പഞ്ചാബിലെ അമൃത്സര് സ്വദേശിയായ ഗൗരവ് കുമാറിനെയാണ് ഡെറാഡൂണ് പോലീസ് ‘ഓപ്പറേഷന് പ്രഹര്’ എന്ന പദ്ധതിയിലൂടെ പിടികൂടിയത്. ഉത്തരാഖണ്ഡിലെ കോണ്ഗ്രസ് നേതാവ് ഭാവന പാണ്ഡെ മെയ് 3-ന് നല്കിയ പരാതിയാണ് വന് തട്ടിപ്പ് പുറത്തുകൊണ്ടുവന്നത്. പാര്ട്ടിക്കുള്ളില് ഉയര്ന്ന പദവി വാഗ്ദാനം ചെയ്ത് തന്നില് നിന്ന് 25 ലക്ഷം രൂപ ഗൗരവ് കുമാര് തട്ടിയെടുത്തതായി ഭാവന പരാതിയില് പറയുന്നു. രാഹുല് ഗാന്ധിയുടെ സഹായിയായ കനിഷ്ക് സിംഗ് ആണെന്ന് പരിചയപ്പെടുത്തിയാണ് ഇയാള് നേതാക്കളെ സമീപിച്ചിരുന്നത്.
ട്രൂകോളര് പോലുള്ള ആപ്പുകളില് കനിഷ്ക് സിംഗ് എന്ന പേരില് വ്യാജ പ്രൊഫൈല് നിര്മ്മിച്ചാണ് ഇയാള് വിശ്വാസ്യത നേടിയിരുന്നത്. രാഷ്ട്രീയ വെബ്സൈറ്റുകളില് നിന്നും ഓണ്ലൈന് സ്രോതസ്സുകളില് നിന്നും സ്ഥാനാര്ത്ഥികളുടെയും നേതാക്കളുടെയും വിവരങ്ങള് ശേഖരിച്ച് അവരെ ഫോണില് വിളിക്കും. പാര്ട്ടിയില് ഉന്നത പദവികള് നല്കാമെന്നും തെരഞ്ഞെടുപ്പ് ടിക്കറ്റുകള് വാങ്ങി നല്കാമെന്നും വിശ്വസിപ്പിച്ച് വന് തുകകള് ആവശ്യപ്പെടും.
താന് നേരിട്ട് വരാതെ സഹായികളെ വിട്ടാണ് പണം ശേഖരിച്ചിരുന്നതെന്ന് പോലീസ് പറഞ്ഞു. ഭാവന പാണ്ഡെയുടെ വീട്ടിലെത്തി പണം വാങ്ങിയ ശേഷം ഇയാള് ഫോണ് ഓഫ് ചെയ്ത് ഒളിവില് പോവുകയായിരുന്നു. മറ്റൊരു പാര്ട്ടി ഭാരവാഹിയില് നിന്ന് തെരഞ്ഞെടുപ്പ് ടിക്കറ്റിനായി പണം കൈപ്പറ്റാന് ഡെറാഡൂണിലെ ഒരു മാളില് എത്തിയപ്പോഴാണ് ഗൗരവ് കുമാറിനെ പോലീസ് വലയിലാക്കിയത്. മൊബൈല് സര്വൈലന്സ്, സിസിടിവി ദൃശ്യങ്ങള് എന്നിവയുടെ സഹായത്തോടെയാണ് പ്രതിയെ ട്രാക്ക് ചെയ്തത്.
ചോദ്യം ചെയ്യലില് പ്രതി കുറ്റം സമ്മതിച്ചു. ജയ്പൂരിലെ രണ്ട് രാഷ്ട്രീയ നേതാക്കളില് നിന്ന് യഥാക്രമം 1.90 കോടി രൂപയും 12 ലക്ഷം രൂപയും ഇയാള് തട്ടിയെടുത്തിട്ടുണ്ട്. കൂടാതെ പാട്നയിലെ ഒരു നേതാവില് നിന്ന് 3 ലക്ഷം രൂപയും ഇയാള് കൈക്കലാക്കി. മാനഹാനി ഭയന്ന് പല ഇരകളും പരാതി നല്കാന് തയ്യാറാകാത്തത് തട്ടിപ്പുകാരന് സഹായകമായി. ചാജു, രജത് മദ, മനീന്ദര് സിംഗ് കാലു എന്നീ മൂന്ന് സഹായികള് കൂടി ഇയാള്ക്കുണ്ടെന്ന് പോലീസ് കണ്ടെത്തിയിട്ടുണ്ട്. ഇവര്ക്കായി തിരച്ചില് തുടരുകയാണ്. പ്രതിയില് നിന്ന് രണ്ട് മൊബൈല് ഫോണുകളും ഡാറ്റ ഡോംഗിളും പോലീസ് പിടിച്ചെടുത്തു. ഭാരതീയ ന്യായ സംഹിത (ആചട) സെക്ഷന് 318 (4) പ്രകാരം വഞ്ചനാക്കുറ്റത്തിനാണ് കേസെടുത്തിരിക്കുന്നത്. കൂടുതല് അറസ്റ്റുകള് ഉടന് ഉണ്ടാകുമെന്ന് ഡെറാഡൂണ് പോലീസ് അറിയിച്ചു.
