കണ്ണൂര്/തൃശൂര്: സംസ്ഥാനത്തിന്റെ വിവിധ ഭാഗങ്ങളില് പാമ്പ് ശല്യം രൂക്ഷമാകുന്നു. കണ്ണൂരില് പാമ്പുകടിയേറ്റ് ചികിത്സയിലായിരുന്ന വയോധിക മരണപ്പെട്ടപ്പോള്, തൃശൂരില് ജനവാസ മേഖലയിലെ വീടിനുള്ളില് കയറിയ അഞ്ചടിയോളം നീളമുള്ള മൂര്ഖന് പാമ്പിനെ വനംവകുപ്പ് പിടികൂടി.
കണ്ണൂര് പട്ടുവം സ്വദേശിനിയായ നാരായണി (70) ആണ് പരിയാരം മെഡിക്കല് കോളേജില് വെച്ച് അന്തരിച്ചത്. കഴിഞ്ഞ മാസം 24-നായിരുന്നു ദുരന്തത്തിനാസ്പദമായ സംഭവം നടന്നത്. വീട്ടുപറമ്പില് ജോലി ചെയ്യുന്നതിനിടെ നാരായണിയെ പാമ്പ് കടിക്കുകയായിരുന്നു. അതിമാരക വിഷമുള്ള ശംഖുവരയന് വിഭാഗത്തില്പ്പെട്ട പാമ്പാണ് കടിച്ചതെന്നാണ് പ്രാഥമിക നിഗമനം.
വിഷം നാഡീവ്യൂഹത്തെ ബാധിച്ചതിനെ തുടര്ന്ന് നില അതീവ ഗുരുതരമാവുകയായിരുന്നു. പട്ടുവം മേഖലയില് ഒരാഴ്ചയ്ക്കിടെ സംഭവിക്കുന്ന രണ്ടാമത്തെ മരണമാണിത്. കഴിഞ്ഞയാഴ്ച മുതുകട സ്വദേശിനി നബീസയും പാമ്പുകടിയേറ്റ് മരണപ്പെട്ടിരുന്നു.
അതേസമയം, തൃശൂരില് മതിലകം കൂളിമുട്ടത്താണ് വീടിനകത്ത് പാമ്പ് കയറിയത്. കാട്ടുപറമ്പില് സിദ്ധിഖിന്റെ വീടിന്റെ അടുക്കളയിലാണ് ഇന്നലെ രാത്രിയോടെ ഭീമന് മൂര്ഖനെ കണ്ടത്. ഉടന് തന്നെ വനംവകുപ്പിനെ വിവരമറിയിച്ചു. ചാലക്കുടി ഫോറസ്റ്റ് ഡിവിഷന് കീഴിലുള്ള ആര്.ആര്.ടി അംഗം അന്സാരി സ്ഥലത്തെത്തി. ഏകദേശം അഞ്ചടിയോളം നീളമുള്ള പുല്ലാനി മൂര്ഖനെ സുരക്ഷിതമായി പിടികൂടി. പിടികൂടിയ പാമ്പിനെ പിന്നീട് വനംവകുപ്പ് അധികൃതര്ക്ക് കൈമാറി. വേനല്ക്കാലം കടുക്കുന്നതോടെ പാമ്പുകള് ജനവാസ മേഖലകളിലേക്ക് ഇറങ്ങുന്നത് വര്ധിച്ചിരിക്കുകയാണ്. വീട്ടുപരിസരങ്ങളില് ജാഗ്രത പാലിക്കണമെന്ന് അധികൃതര് നിര്ദ്ദേശിക്കുന്നു.
