മലപ്പുറം : സംസ്ഥാനത്ത് മുഖ്യമന്ത്രി ആരാകണമെന്ന് തീരുമാനിക്കാനാകാതെ കോൺഗ്രസിൽ കനത്ത ഗ്രൂപ്പ് പോരാട്ടം തുടരുമ്പോൾ എ ഐ സി സി ജനറൽ സെക്രട്ടറി കെസി വേണുഗോപാൽ എംപിക്ക് നേരെ ശാപവാക്കുകൾ വാരി വിതറി മുസ്‌ലീം ലീഗ് നേതാവ് ഞെരളത്ത് ഹരിഗോവിന്ദൻ.
ഇപ്പോൾ KC കാണിക്കുന്നത് അപക്വവും വിവരക്കേടും സർവോപരി സ്വന്തം പാർടി അണികളെ അപമാനിക്കലുമാണ് എന്നാണ് ലീഗ് നേതാവ് പറയുന്നത് . മുഖ്യമന്ത്രിയാകാൻ ഷാഫി പറമ്പിലിനാണ് KC യേക്കാൾ യോഗ്യതഎന്നും ഹരിഗോവിന്ദൻ പറയുന്നു.
എൻ എസ് എസ് ജനറൽ സെക്രട്ടറി ജി സുകുമാരൻ നായരെയും അശ്ളീല വാക്കുകൾ ഉപയോഗിച്ച് മുസ്ളീം ലീഗ് നേതാവ് അധിക്ഷേപിക്കുന്നുണ്ട്..
തന്റെ ഫേസ്ബുക്ക് പോസ്റ്റിലാണ് അദ്ദേഹം ഇങ്ങിനെ പറഞ്ഞത്.
മുസ്‌ലീം ലീഗ് നേതാവ് ഞെരളത്ത് ഹരിഗോവിന്ദൻ കെസി വേണുഗോപാലിനെ അധിക്ഷേപിച്ചിട്ട ഫേസ്ബുക്ക് പോസ്റ്റിന്റെ പൂർണ്ണരൂപം.
“ബംഗാൾ,ആസ്സാം, പോണ്ടിച്ചേരി, തമിഴ്നാട് എന്നിവിടങ്ങളിലെല്ലാം കോൺഗ്രസിനെ വളരേ താഴേക്കു തള്ളിവിട്ടതിൽ കെ.സി.വേണുഗോപാലും പങ്കാളിയാണ്. അത്തരമൊരു പരാജിതൻ നിലവിലെ എം.പി.സ്ഥാനം കളഞ്ഞ് MLA ആയി വരാൻ ശ്രമിച്ചാൽ അതുപോലൊരു എം.പി.ആയ ഷാഫി പറമ്പിലിനാണ് KC യേക്കാൾ യോഗ്യത. അത്തരമൊരാവശ്യം കൂടി ശക്തിപ്പെടും. ഇപ്പോൾ KC കാണിക്കുന്നത് അപക്വവും വിവരക്കേടും സർവോപരി സ്വന്തം പാർടി അണികളെ അപമാനിക്കലുമാണ്… താങ്കൾ ആലപ്പുഴയിലെ MP സ്ഥാനം വിട്ടാൽ അവിടൊരു തെരഞ്ഞെടുപ്പു വന്ന് ശോഭയേപ്പോലെ മറ്റൊരു BJP MP ക്കു കൂടിയാവും താങ്കൾ വഴിയൊരുക്കുന്നത്… താങ്കളുടെ ഈ അധികാരമോഹത്തെ നാലുനിലയിൽ തോൽപിക്കാനും CONGRESS പ്രവർത്തകർ തയ്യാറാവും… MP യും MLA യും അങ്ങനെ ഒന്നുമല്ലാതെ മറ്റൊരു പിണറായിയായി നാറിത്തുലഞ്ഞ് താങ്കളൊടുങ്ങും… ഇതൊന്നും കണക്കുകൂട്ടാനാവാതെ താങ്കളെ ശാസിച്ചൊതുക്കി വിഡി.സതീശന് മുഖ്യമന്ത്രി സ്ഥാനമൊരുക്കാതെ NSS നായരേപ്പോലെ ആടിയുലഞ്ഞ് നിൽക്കുന്ന ഹൈക്കമാന്റാണ് ഇവിടെ മറ്റൊരു പ്രതി…
കഷ്ടമാണ്… കെ.സീ. നാണംകെടും. തെന്നിന്ത്യയിൽ BJP യെ വളർത്തുന്നതിൽ താങ്കൾ എക്കാലവും പരിശ്രമിച്ചെന്ന സംശയത്തിൽ താങ്കളകപ്പെടും…
താക്കോൽ നായരെന്ന രണ്ടിലുംകെട്ട സമുദായ വഞ്ചകന്റെ വാക്കും കേട്ട് ഡെൽഹിക്കു കേറിയ ചെന്നിത്തലയൊക്കെ അൽപമെങ്കിലും മാന്യതയുണ്ടെങ്കിൽ മാറിനിൽക്കണം… നിങ്ങൾ രണ്ടുപേരും കാണിക്കുന്ന വലിയ അമാന്യത കാരണം കേരളചരിത്രത്തിലെ രാഷ്‌ട്രീയ അതികായനും ഞങ്ങളുടെ വിശ്വസ്ത നേതാവും അടിമുടി മനുഷ്യ മുഖവുമായ പി.കെ. കുഞ്ഞാലിക്കുട്ടി സാഹിബിന്റെ പ്രസക്തി എത്ര വലുതെന്ന് ജനം തിരിച്ചറിയുന്ന ദിവസങ്ങളാണ് കടന്നുപൊയ്‌ക്കൊണ്ടിരിക്കുന്നത്.
