ഇരിങ്ങാലക്കുട: കൂടൽമാണിക്യം വിളക്കെഴുന്നള്ളിപ്പിനിടെ ക്ഷേത്രത്തിനുള്ളിൽ പരസ്യമദ്യപാനം നടത്തിയവർക്കെതിരെ നടപടി സ്വീകരിക്കണമെന്ന് ആവശ്യപ്പട്ട് ബിജെപി പൊലീസിൽ പരാതി നൽകി. ബിജെപി മണ്ഡലം കമ്മിറ്റി ഇരിങ്ങാലക്കുട പൊലീസിനാണ് പരാതി നൽകിയത്. ക്ഷേത്രത്തിനുള്ളിൽ മദ്യപിച്ചവരെ കണ്ടെത്തി എത്രയുംവേഗം നിയമ നടപടികൾ സ്വീകരിക്കണമെന്ന് ബിജെപി ഇരിങ്ങാലക്കുട മണ്ഡലം കമ്മിറ്റി ആവശ്യപ്പെട്ടു.
കൂടൽമാണിക്യം ക്ഷേത്രത്തിനുള്ളിൽ വലിയവിളക്ക് ദിവസം മേളം നടക്കുന്നതിനിടയിൽ ഒരു കൂട്ടം സാമൂഹ്യവിരുദ്ധർ കൂട്ടംചേർന്ന് മദ്യപിക്കുന്ന ദൃശ്യങ്ങൾ സാമൂഹ്യ മാധ്യമങ്ങളിൽ വ്യാപകമായി പ്രചരിച്ചിരുന്നു. ദൃശ്യങ്ങളിൽ വീഡിയോ എടുക്കുന്നവരെ ഭീഷണിപ്പെടുത്തുകയും സ്ത്രീകളെയും കുട്ടികളെയും അസഭ്യം പറയുകയും ചെയ്യുന്നതും വ്യക്തമാണ്.
മണ്ഡലം പ്രസിഡൻ്റ് ആർച്ച അനീഷ്, ജില്ലാ സെക്രട്ടറി അഖിലാഷ് വിശ്വനാഥൻ, പൊറത്തിശ്ശേരി മേഖലാ പ്രസിഡൻ്റ് സൂരജ് കടുങ്ങാടൻ എന്നിവർ സ്റ്റേഷനിലെത്തി നേരിട്ട് പരാതി കൈമാറിയത്. ഇത്തരം സംഭവങ്ങൾ ഇനിയും ആവർത്തിക്കാതിരിക്കാൻ കുറ്റവാളികളെ ഉടൻ കണ്ടെത്തി കേസ് രജിസ്റ്റർ ചെയ്യണമെന്നും കൂടാതെ ഇത്തരം അനിഷ്ട സംഭവങ്ങൾ ഒഴിവാക്കാൻ പൊലീസിന്റെ പ്രത്യേക ശ്രദ്ധ ഉണ്ടാവണമെന്നും ബിജെപി മണ്ഡലം കമ്മിറ്റി ആവശ്യപ്പെട്ടു
