തിരുവനന്തപുരം: വരാനിരിക്കുന്ന ഭരണമാറ്റത്തില്‍ വി.ഡി. സതീശന്‍ മുഖ്യമന്ത്രിയാകണമെന്ന ആവശ്യവുമായി കോണ്‍ഗ്രസ് അണികള്‍ തെരുവിലേക്ക്. സതീശനെ അനുകൂലിച്ച് സംസ്ഥാനത്തിന്റെ വിവിധ ഭാഗങ്ങളില്‍ വലിയ ആവേശമാണ് പ്രവര്‍ത്തകര്‍ക്കിടയില്‍ പ്രകടമാകുന്നത്. ഇതിനിടെ, കോട്ടയം കുറുപ്പന്തറയില്‍ സതീശനെ മുഖ്യമന്ത്രിയാക്കണമെന്ന് ആവശ്യപ്പെട്ട് ഒരു പ്രവര്‍ത്തകന്‍ ആത്മഹത്യയ്‌ക്ക് ശ്രമിച്ചത് പാര്‍ട്ടി കേന്ദ്രങ്ങളെ ഞെട്ടിച്ചു.
ഇന്ന് രാവിലെ പത്ത് മണിയോടെയാണ് കോണ്‍ഗ്രസ് പ്രവര്‍ത്തകനായ ഫ്രാന്‍സിസ് ശരീരത്തില്‍ പെട്രോള്‍ ഒഴിച്ച് ജീവനൊടുക്കാന്‍ ശ്രമിച്ചത്. വി.ഡി. സതീശനെ മുഖ്യമന്ത്രി സ്ഥാനത്തേക്ക് ഉയര്‍ത്തിക്കാട്ടണമെന്നതായിരുന്നു ഇയാളുടെ ആവശ്യം. ഉടന്‍ തന്നെ സ്ഥലത്തെത്തിയ പോലീസ് സംഘം ഇയാളെ അനുനയിപ്പിച്ച് പിന്തിരിപ്പിച്ചതിനാല്‍ വലിയൊരു അപകടം ഒഴിവായി.
തലസ്ഥാന നഗരിയില്‍ നേതാക്കള്‍ക്കായി അണികള്‍ തമ്മില്‍ ‘ഫ്‌ലക്‌സ് യുദ്ധം’ മുറുകുകയാണ്. കെ.പി.സി.സി ആസ്ഥാനത്തിന് മുന്നില്‍ കെ.സി വേണുഗോപാലിനെ അനുകൂലിച്ച് സ്ഥാപിച്ച ഫ്‌ലക്‌സില്‍ ഒരു വിഭാഗം പ്രവര്‍ത്തകര്‍ കരിഓയില്‍ ഒഴിച്ചു. കഴിഞ്ഞ ദിവസം ഇതേ ഫ്‌ലക്‌സില്‍ മറ്റൊരു വിഭാഗം പാലഭിഷേകം നടത്തിയിരുന്നു. സെക്രട്ടേറിയറ്റിന് മുന്നിലും വേണുഗോപാലിന്റെയും സതീശന്റെയും ഫ്‌ലക്‌സുകള്‍ അടുത്തടുത്തായി ഉയര്‍ന്നിട്ടുണ്ട്.
സംസ്ഥാനത്തെ വിവിധയിടങ്ങളില്‍ വി.ഡി. സതീശനായി വലിയ തോതിലുള്ള ശക്തിപ്രകടനങ്ങളാണ് നടക്കുന്നത്. ആലുവയില്‍ സതീശന്‍ അനുകൂലികള്‍ വാഹനറാലി നടത്തി തങ്ങളുടെ പിന്തുണ അറിയിച്ചു. എരുമേലി പമ്പാവാലിയില്‍ പ്രവര്‍ത്തകര്‍ പന്തംകൊളുത്തി പ്രകടനം നടത്തിയാണ് സതീശനെ മുഖ്യമന്ത്രിയാക്കണമെന്ന ആവശ്യം ഉന്നയിച്ചത്. പാര്‍ട്ടിക്കുള്ളിലെ നേതൃമാറ്റ ചര്‍ച്ചകള്‍ അണികള്‍ക്കിടയില്‍ വലിയ ചലനമുണ്ടാക്കുന്നു എന്നതിന്റെ തെളിവാണ് ഈ പരസ്യമായ പിന്തുണ പ്രകടനങ്ങള്‍. വരും ദിവസങ്ങളിലും സതീശനെ അനുകൂലിച്ചുള്ള നീക്കങ്ങള്‍ ശക്തമാകാനാണ് സാധ്യത.
