രാജ്ഗഡ്: മധ്യപ്രദേശിലെ രാജ്ഗഡ് ജില്ലയില്‍ പത്ത് ദിവസം മുന്‍പ് കാണാതായ യുവാവിനെ സുഹൃത്ത് ക്രൂരമായി കൊലപ്പെടുത്തി കാട്ടില്‍ കുഴിച്ചുമൂടി. മാലവാര്‍ സ്വദേശിയായ ഗോലു വാല്‍മീകിയാണ് കൊല്ലപ്പെട്ടത്. സംഭവത്തില്‍ പ്രതിയായ രഘുവീര്‍ സൗന്ധിയയെ പോലീസ് അറസ്റ്റ് ചെയ്തു. കൊലപാതകത്തിന് ശേഷം ഗോലുവിന്റെ സ്വര്‍ണ്ണക്കമ്മലുകള്‍ കവര്‍ന്ന പ്രതി, ഇത് ബാങ്കില്‍ പണയം വെച്ച് 40,000 രൂപ വായ്പയെടുത്തതായും പോലീസ് കണ്ടെത്തി.
പത്ത് ദിവസം മുന്‍പാണ് ഗോലുവിനെ കാണാതാകുന്നത്. അന്ന് രാവിലെ ഗോലുവിന്റെ വീട്ടിലെത്തിയ പ്രതി രഘുവീര്‍, ഗോലു ആടുകളെ മേയ്‌ക്കാന്‍ പോയോ എന്ന് വീട്ടുകാരോട് തിരക്കിയിരുന്നു. വീട്ടുകാര്‍ അതെ എന്ന് മറുപടി നല്‍കിയതോടെ ഗോലു പോയ ഭാഗത്തേക്ക് രഘുവീറും പുറപ്പെട്ടു. എന്നാല്‍ ഉച്ചകഴിഞ്ഞിട്ടും ഗോലു തിരിച്ചെത്തിയില്ല. വീട്ടുകാര്‍ നടത്തിയ തിരച്ചിലില്‍ ആടുകളെ മേച്ചില്‍പ്പുറത്ത് കണ്ടെത്തിയെങ്കിലും ഗോലുവിനെക്കുറിച്ച് വിവരമൊന്നുമുണ്ടായിരുന്നില്ല.
തുടക്കം മുതല്‍ക്കേ രഘുവീറിനെതിരെ കുടുംബം സംശയം പ്രകടിപ്പിച്ചിരുന്നെങ്കിലും പോലീസ് ഇത് ഗൗരവമായി എടുത്തില്ലെന്ന് ആക്ഷേപമുണ്ട്. ആദ്യഘട്ടത്തില്‍ ചോദ്യം ചെയ്ത ശേഷം രഘുവീറിനെ പോലീസ് വിട്ടയച്ചു. ഒടുവില്‍ എട്ട് ദിവസങ്ങള്‍ക്ക് ശേഷം കുടുംബം മുഖ്യമന്ത്രിയുടെ ഹെല്‍പ്പ് ലൈനില്‍ പരാതി നല്‍കിയതോടെയാണ് ഉന്നത ഉദ്യോഗസ്ഥര്‍ ഇടപെട്ടതും അന്വേഷണം ഊര്‍ജിതമായതും. രണ്ടാമത് കസ്റ്റഡിയിലെടുത്ത് ചോദ്യം ചെയ്തതോടെ പ്രതി കുറ്റം സമ്മതിക്കുകയായിരുന്നു.
കൊലപാതകത്തിന് ശേഷം ഗോലുവിന്റെ കാതിലുണ്ടായിരുന്ന സ്വര്‍ണ്ണ മുര്‍ക്കി (കമ്മലുകള്‍) പ്രതി കൈക്കലാക്കി. ഇത് എ.യു ബാങ്കില്‍ പണയം വെച്ച് 40,000 രൂപയുടെ ഗോള്‍ഡ് ലോണ്‍ എടുത്തതായി അന്വേഷണ ഉദ്യോഗസ്ഥര്‍ കണ്ടെത്തി. പ്രതി കാണിച്ചുതന്ന സ്ഥലത്ത് നടത്തിയ പരിശോധനയില്‍ ഒരു കുഴിയില്‍ നിന്ന് ഗോലുവിന്റെ അസ്ഥികൂടവും രക്തം പുരണ്ട വസ്ത്രങ്ങളും കണ്ടെടുത്തു. മൃതദേഹം അഴുകി അസ്ഥികൂടം മാത്രമായ നിലയിലായിരുന്നു. ഇത് പോസ്റ്റ്മോര്‍ട്ടം നടപടികള്‍ക്കായി ഭോപ്പാലിലേക്ക് അയച്ചു. സംഭവത്തില്‍ കൂടുതല്‍ പേര്‍ക്ക് പങ്കുണ്ടോ എന്ന് പോലീസ് അന്വേഷിച്ചുവരികയാണ്.
