ന്യൂഡൽഹി: വിശ്വഭാരതിയുടെ ശില്പി രവീന്ദ്രനാഥ ടാഗോറിന്റെ 165-ാം ജന്മവാർഷികത്തിൽ (pochishe boishakh) രാഷ്ട്രം അദ്ദേഹത്തിന് ആദരമർപ്പിച്ചു. ഉപരാഷ്ട്രപതി സി.പി. രാധാകൃഷ്ണൻ, പ്രധാനമന്ത്രി നരേന്ദ്ര മോദി, പ്രതിരോധ മന്ത്രി രാജ്നാഥ് സിംഗ്, ആഭ്യന്തര മന്ത്രി അമിത് ഷാ എന്നിവർ ടാഗോറിന്റെ വിശ്വമാനവിക ദർശനങ്ങളെയും സാംസ്കാരിക സംഭാവനകളെയും അനുസ്മരിച്ചു. ടാഗോറിന്റെ ചിന്തകൾ വരുംതലമുറകൾക്ക് എന്നും വഴികാട്ടിയാണെന്ന സന്ദേശം നേതാക്കൾ സോഷ്യൽ മീഡിയയിലൂടെ പങ്കുവെച്ചു.
സാഹിത്യത്തിനപ്പുറം വളർന്ന പ്രതിഭയായിരുന്നു ടാഗോറെന്ന് ഉപരാഷ്ട്രപതി സി.പി. രാധാകൃഷ്ണൻ പറഞ്ഞു. അദ്ദേഹത്തിന്റെ കാലാതീതമായ ഉപദേശങ്ങൾ സമൂഹത്തിൽ ശാശ്വതമായ സ്വാധീനം ചെലുത്തുന്നുവെന്നും അത് ജനങ്ങളെ പ്രചോദിപ്പിക്കുന്നത് തുടരുമെന്നും ഉപരാഷ്ട്രപതി പ്രത്യാശ പ്രകടിപ്പിച്ചു. ടാഗോറിനെ അസാധാരണ പ്രതിഭയുള്ള ചിന്തകനും കവിയുമായാണ് പ്രധാനമന്ത്രി നരേന്ദ്ര മോദി വിശേഷിപ്പിച്ചത്. പുതിയ ചിന്തകളിലൂടെയും സർഗ്ഗാത്മക ഊർജ്ജത്തിലൂടെയും സമൂഹത്തെ സമ്പന്നമാക്കിയ ടാഗോറിനെ രാജ്യം അങ്ങേയറ്റം നന്ദിയോടെയും ആദരവോടെയുമാണ് സ്മരിക്കുന്നതെന്ന് പ്രധാനമന്ത്രി കൂട്ടിച്ചേർത്തു. ’ഏക് ഭാരത് ശ്രേഷ്ഠ ഭാരത്’ എന്ന സങ്കല്പത്തെ ശക്തിപ്പെടുത്തിയ മഹാനാണ് ടാഗോറെന്ന് പ്രതിരോധ മന്ത്രി രാജ്നാഥ് സിംഗ് ചൂണ്ടിക്കാട്ടി. ടാഗോറിലെ സംഗീതജ്ഞനെയും ദാർശനികനെയും വരും തലമുറകൾ എന്നും മാതൃകയാക്കുമെന്നും അദ്ദേഹം പറഞ്ഞു.
സ്വാതന്ത്ര്യ സമരത്തിന് സാഹിത്യത്തിലൂടെയും സംഗീതത്തിലൂടെയും പുതിയ കരുത്ത് പകർന്ന വ്യക്തിയാണ് ടാഗോറെന്ന് അമിത് ഷാ അനുസ്മരിച്ചു. മാനവികതയ്ക്കും ആത്മീയതയ്ക്കും പുതിയ ദിശാബോധം നൽകിയ ‘ഗീതാഞ്ജലി’യെയും ദേശീയ ഐക്യത്തിന്റെ ശബ്ദമായ ‘ജനഗണമന’യെയും അദ്ദേഹം പരാമർശിച്ചു. സ്വതന്ത്രമായ ചിന്തയിലേക്കും സാംസ്കാരിക സമന്വയത്തിലേക്കും ടാഗോറിന്റെ ജീവിതം ഭാരതീയരെ നയിക്കുമെന്നും അദ്ദേഹം വ്യക്തമാക്കി.
