ചെന്നൈ: വെള്ളിത്തിരയെ വെല്ലുന്ന രാഷ്‌ട്രീയ നാടകങ്ങള്‍ക്കൊടുവില്‍ തമിഴ്നാടിന്റെ ഭരണസാരഥ്യം ഏറ്റെടുക്കാന്‍ വിജയ് ഒരുങ്ങുന്നു. നിയമസഭാ തിരഞ്ഞെടുപ്പില്‍ ഏറ്റവും വലിയ ഒറ്റകക്ഷിയായി മാറിയ ടി.വി.കെ, ദിവസങ്ങള്‍ നീണ്ട അനിശ്ചിതത്വങ്ങള്‍ക്കും ചര്‍ച്ചകള്‍ക്കും ശേഷമാണ് കേവല ഭൂരിപക്ഷം ഉറപ്പാക്കിയത്. ഗവര്‍ണര്‍ ആവശ്യപ്പെട്ട 118 എന്ന മാന്ത്രിക സംഖ്യ മറികടന്ന് 121 എം.എല്‍.എമാരുടെ പിന്തുണയോടെയാണ് വിജയ് സര്‍ക്കാര്‍ രൂപീകരണത്തിന് അവകാശവാദം ഉന്നയിക്കുന്നത്.
തുടക്കത്തില്‍ കോണ്‍ഗ്രസിന്റെയും ഇടതുകക്ഷികളുടെയും പിന്തുണ ടി.വി.കെ ഉറപ്പാക്കിയിരുന്നു. എന്നാല്‍ വെള്ളിയാഴ്ച രാത്രിയോടെ എ.എം.എം.കെയും മുസ്ലിം ലീഗും പിന്തുണ പിന്‍വലിക്കുമെന്ന് സൂചന നല്‍കിയത് വിജയ് ക്യാമ്പില്‍ ആശങ്ക പരത്തി. ഇതോടെ രണ്ട് സീറ്റുകളുള്ള വിടുതലൈ ചിരുത്തൈഗള്‍ കക്ഷി (വി.സി.കെ) നിലപാട് നിര്‍ണായകമായി.
ശനിയാഴ്ച വൈകുന്നേരം വരെ നീണ്ട ചര്‍ച്ചകള്‍ക്കൊടുവിലാണ് ഡി.എം.കെ സഖ്യം വിട്ട് വിജയ്യെ പിന്തുണയ്‌ക്കാന്‍ തോള്‍ തിരുമാവളവന്‍ തീരുമാനിച്ചത്. തൊട്ടുപിന്നാലെ മുസ്ലിം ലീഗും പിന്തുണ പ്രഖ്യാപിച്ചതോടെ ടി.വി.കെ സഖ്യത്തിന്റെ ബലം 121 ആയി ഉയര്‍ന്നു. ടി.വി.കെ 107 (വിജയ് രണ്ട് സീറ്റില്‍ വിജയിച്ചതിനാല്‍ ആകെ 108-ല്‍ നിന്ന് ഒന്ന് കുറയും), കോണ്‍ഗ്രസ് 05, സി.പി.ഐ: 02, സി.പി.എം: 02, വി.സി.കെ: 02, മുസ്ലിം ലീഗ്: 03 (ആകെ പിന്തുണ: 121).
ഭൂരിപക്ഷം തെളിയിക്കുന്ന കത്തുമായി വിജയ് രാജ്ഭവനെ സമീപിച്ചെങ്കിലും ഗവര്‍ണര്‍ ഇതുവരെ കൂടിക്കാഴ്ചയ്‌ക്ക് അനുമതി നല്‍കിയിട്ടില്ലെന്നാണ് വിവരം. കേരളത്തിന്റെയും തമിഴ്നാടിന്റെയും അധിക ചുമതലയുള്ള ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ ഇന്ന് രാത്രി ഏഴു മണിയോടെ തിരുവനന്തപുരത്തേക്ക് തിരിക്കാനിരിക്കുകയാണ്. ഗവര്‍ണര്‍ മടങ്ങുന്നതിന് മുന്‍പ് വിജയ്യെ കാണുമോ അതോ സര്‍ക്കാര്‍ രൂപീകരണം ഇനിയും നീളുമോ എന്ന ആകാംക്ഷയിലാണ് തമിഴകം. പിന്തുണ നല്‍കുന്ന എം.എല്‍.എമാരുടെ കൃത്യമായ പട്ടിക ഹാജരാക്കാന്‍ നേരത്തെ ഗവര്‍ണര്‍ നിര്‍ദ്ദേശിച്ചിരുന്നു.
