കൊല്‍ക്കത്ത: പശ്ചിമ ബംഗാളിന്റെ ആദ്യ ബിജെപി മുഖ്യമന്ത്രിയായി സുവേന്ദു അധികാരി അധികാരമേറ്റ വേളയില്‍, മകന് മുന്നില്‍ മാതാവ് ഗായത്രി അധികാരി ആവശ്യപ്പെട്ടത് ഒരു കാര്യം മാത്രം. സുവേന്ദു മുഖ്യമന്ത്രിയായതില്‍ തന്നേക്കാള്‍ കൂടുതല്‍ ബംഗാളിലെ ജനങ്ങളാണ് സന്തോഷിക്കുന്നതെന്ന് പറഞ്ഞ അവര്‍, അധികാരമേറ്റയുടന്‍ മകന് ചെയ്യേണ്ട മുന്‍ഗണനാ പ്രവര്‍ത്തനങ്ങളെക്കുറിച്ചും മനസ് തുറന്നു. മകന് മുഖ്യമന്ത്രി പദവിയില്‍ ഇരിക്കുമ്പോള്‍ ആദ്യം ചെയ്യേണ്ടത് ആര്‍ജി കര്‍ മെഡിക്കല്‍ കോളേജ് ക്രൂരതയ്‌ക്ക് ഇരയായ പെണ്‍കുട്ടിക്ക് യഥാര്‍ത്ഥ നീതി ഉറപ്പാക്കുക എന്നതാണെന്ന് ഗായത്രി അധികാരി വ്യക്തമാക്കി.
‘ആര്‍ജി കര്‍ ഇരയ്‌ക്കും സമാനമായ രീതിയില്‍ പീഡനങ്ങളും അതിക്രമങ്ങളും നേരിട്ട ബംഗാളിലെ എല്ലാ മനുഷ്യര്‍ക്കും നീതി നല്‍കാന്‍ അവന് പ്രവര്‍ത്തിക്കണമെന്ന് ഞാന്‍ ആവശ്യപ്പെടും. അതുപോലെ തന്നെ ജനങ്ങള്‍ക്ക് തൊഴില്‍ നല്‍കുന്നതിലും അവന് ശ്രദ്ധ കേന്ദ്രീകരിക്കണം,’ അവര്‍ വാര്‍ത്താ ഏജന്‍സിയായ പിടിഐയോട് പറഞ്ഞു. കഴിഞ്ഞ അഞ്ച് വര്‍ഷമായി തൃണമൂല്‍ കോണ്‍ഗ്രസിനെതിരെ സുവേന്ദു നടത്തിയ കഠിനമായ പോരാട്ടങ്ങളെ ഗായത്രി അനുസ്മരിച്ചു. ‘മൂന്നോ നാലോ തവണ വധശ്രമങ്ങള്‍ ഉണ്ടായിട്ടും അവന് തളരാതെ മുന്നോട്ട് പോയി. പിതാവ് ശിശിര്‍ അധികാരിയില്‍ നിന്നാണ് ആ പോരാട്ടവീര്യം അവന് ലഭിച്ചത്.
അദ്ദേഹവും ഇതുപോലെ ഒരു പോരാളിയായിരുന്നു,’ അവര്‍ പറഞ്ഞു. തൃണമൂല്‍ കോണ്‍ഗ്രസിന്റെ മുന്‍ എംപിയായിരുന്ന ശിശിര്‍ അധികാരിയുടെ കുടുംബം 2021-ലാണ് ബിജെപിയിലേക്ക് മാറിയത്. കൊല്‍ക്കത്തയിലെ പരേഡ് ഗ്രൗണ്ടില്‍ നടന്ന പ്രൗഢഗംഭീരമായ ചടങ്ങില്‍ പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ തുടങ്ങിയ പ്രമുഖരുടെ സാന്നിധ്യത്തിലാണ് സുവേന്ദു അധികാരി സത്യപ്രതിജ്ഞ ചെയ്തത്. സുവേന്ദുവിനൊപ്പം അഞ്ച് മന്ത്രിമാരും ഇന്ന് ചുമതലയേറ്റു. ദിലീപ് ഘോഷ്, അഗ്‌നിമിത്ര പോള്‍, അശോക് കിര്‍ത്താനിയ, ക്ഷുദിരാം തുടു, നിസിത് പ്രമാണിക്.
സംസ്ഥാനത്തിന്റെ വടക്കന്‍, തെക്കന്‍ മേഖലകള്‍ക്ക് തുല്യ പ്രാധാന്യം നല്‍കിക്കൊണ്ടാണ് മന്ത്രിസഭാ രൂപീകരണം നടത്തിയിരിക്കുന്നത്. വകുപ്പ് വിഭജനം ഉടന്‍ നടക്കും. ബാക്കിയുള്ള മന്ത്രിമാരുടെ സത്യപ്രതിജ്ഞയും ആദ്യ മന്ത്രിസഭാ യോഗവും തിങ്കളാഴ്ച രാജ്ഭവനില്‍ നടക്കുമെന്നാണ് സൂചന.
