തിരുവനന്തപുരം: കേരളത്തില് അടുത്ത അഞ്ച് ദിവസം ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. വിവിധ ജില്ലകളില് മഞ്ഞ അലര്ട്ട് പ്രഖ്യാപിച്ച സാഹചര്യത്തില് സംസ്ഥാനത്ത് ജാഗ്രതാ നിര്ദ്ദേശം കര്ശനമാക്കി. തെക്കന് കേരളത്തില് ആരംഭിക്കുന്ന മഴ ക്രമേണ മധ്യകേരളത്തിലേക്കും വടക്കന് ജില്ലകളിലേക്കും വ്യാപിക്കുമെന്നാണ് പ്രവചനം. ഒറ്റപ്പെട്ടയിടങ്ങളില് ഇടിമിന്നലോടും ശക്തമായ കാറ്റോടും കൂടിയ മഴയ്ക്ക് സാധ്യതയുള്ളതിനാല് മലയോര മേഖലകളിലും താഴ്ന്ന പ്രദേശങ്ങളിലും താമസിക്കുന്നവര് പ്രത്യേക ജാഗ്രത പാലിക്കണം.
നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മേയ് 11 കൊല്ലം, പത്തനംതിട്ട, ആലപ്പുഴ, മേയ് 12 എറണാകുളം, തൃശൂര്, മലപ്പുറം, കോഴിക്കോട്, മേയ് 13 എറണാകുളം, തൃശൂര്, മലപ്പുറം, കോഴിക്കോട്, വയനാട്, കണ്ണൂര് ജില്ലകളിലുമാണ് മുന്നറിയിപ്പ് നല്കിയിരിക്കുന്നത്. അതേസമയം, മഴ മുന്നറിയിപ്പിനിടയിലും പകല് സമയങ്ങളില് ഉയര്ന്ന അള്ട്രാവയലറ്റ് സൂചിക രേഖപ്പെടുത്തുന്നതിനാല് സൂര്യപ്രകാശം നേരിട്ട് ഏല്ക്കുന്നത് ഒഴിവാക്കണമെന്ന് നിര്ദ്ദേശമുണ്ട്.
പകല് 10 മണി മുതല് 3 മണി വരെയുള്ള സമയങ്ങളില് പുറത്തിറങ്ങുന്നവര് കുടയോ മറ്റ് സുരക്ഷാ മാര്ഗ്ഗങ്ങളോ സ്വീകരിക്കണം. അല്ലാത്തപക്ഷം സൂര്യാതപം, ത്വക്ക് രോഗങ്ങള്, നേത്രരോഗങ്ങള് എന്നിവയ്ക്ക് സാധ്യതയുണ്ട്. മിന്നലിന്റെ ആദ്യ ലക്ഷണം കണ്ടാലുടന് സുരക്ഷിതമായ കെട്ടിടത്തിലേക്ക് മാറണം. ജനലുകളും വാതിലുകളും അടച്ചിടുകയും അവയ്ക്ക് സമീപം നില്ക്കാതിരിക്കുകയും ചെയ്യുക. മിന്നലുള്ളപ്പോള് ഗൃഹോപകരണങ്ങളുടെ പ്ലഗ്ഗുകള് ഊരിയിടുക.
പൈപ്പുകളിലൂടെ വൈദ്യുതി സഞ്ചരിക്കാന് സാധ്യതയുള്ളതിനാല് ഈ സമയത്ത് കുളിക്കുന്നതും ടാപ്പുകളില് നിന്ന് വെള്ളം ശേഖരിക്കുന്നതും ഒഴിവാക്കണം. ലാന്ഡ് ഫോണുകള് ഉപയോഗിക്കുന്നത് ഒഴിവാക്കുക. എന്നാല് മൊബൈല് ഫോണ് ഉപയോഗിക്കുന്നതില് തടസ്സമില്ല. അന്തരീക്ഷം മേഘാവൃതമാണെങ്കില് കുട്ടികളെ ടെറസിലോ മുറ്റത്തോ കളിക്കാന് അനുവദിക്കരുത്. മരച്ചുവട്ടില് അഭയം തേടുന്നത് അപകടകരമാണ്. വാഹനത്തിനുള്ളില് കഴിയുന്നവര് കൈകാലുകള് പുറത്തിടാതിരിക്കാന് ശ്രദ്ധിക്കണം.
സൈക്കിള്, ബൈക്ക് യാത്രക്കാര് മിന്നല് സമയത്ത് യാത്ര നിര്ത്തി സുരക്ഷിത ഇടങ്ങളിലേക്ക് മാറണം. മീന്പിടുത്തം, ബോട്ടിങ് എന്നിവയില് ഏര്പ്പെട്ടിരിക്കുന്നവര് കാര്മേഘം കണ്ടാലുടന് കരയിലേക്ക് മടങ്ങണം. വള്ളത്തിന്റെ ഡെക്കില് നില്ക്കുന്നത് ഒഴിവാക്കുക. ശക്തമായ കാറ്റില് മറിഞ്ഞുവീഴാന് സാധ്യതയുള്ള വസ്തുക്കള് കെട്ടി സുരക്ഷിതമാക്കണമെന്നും ദുരന്തനിവാരണ അതോറിറ്റി അറിയിച്ചു.
