ചെന്നൈ: തമിഴ്നാട് രാഷ്ട്രീയത്തില് നിര്ണ്ണായകമായ അധികാര കൈമാറ്റത്തിന് പിന്നാലെ ഉദയനിധി സ്റ്റാലിന് പുതിയ പ്രതിപക്ഷ നേതാവാകും. പതിനേഴാം തമിഴ്നാട് നിയമസഭയിലെ ഡി.എം.കെ. നിയമസഭാ കക്ഷി നേതാവായി ഉദയനിധിയെ തിരഞ്ഞെടുത്തു. തമിഴക വെട്രി കഴകം (ടി.വി.കെ.) നേതാവ് വിജയ് മുഖ്യമന്ത്രിയായി സത്യപ്രതിജ്ഞ ചെയ്തതിന് തൊട്ടുപിന്നാലെയാണ് പ്രതിപക്ഷ നിരയെ നയിക്കാന് മുന് ഉപമുഖ്യമന്ത്രിയായ ഉദയനിധിയെ ഡി.എം.കെ. ചുമതലപ്പെടുത്തിയത്.
ചെന്നൈയിലെ അണ്ണാ അറിവാലയത്തില് എം.കെ. സ്റ്റാലിന്റെ അധ്യക്ഷതയില് ചേര്ന്ന ഡി.എം.കെ. എം.എല്.എ.മാരുടെ യോഗത്തിലാണ് ഈ സുപ്രധാന തീരുമാനമുണ്ടായത്. സഭയിലെ രണ്ടാമത്തെ വലിയ കക്ഷിയായ ഡി.എം.കെ.യുടെ നിയമസഭാ കക്ഷി നേതാവ് എന്ന നിലയിലാണ് ഉദയനിധി പ്രതിപക്ഷ നേതൃസ്ഥാനത്തേക്ക് എത്തുന്നത്. കടുത്ത പോരാട്ടം നടന്ന ചെപ്പോക്ക്-തിരുവല്ലിക്കേണി മണ്ഡലത്തില് നിന്നാണ് ഉദയനിധി വിജയിച്ചത്.
ടി.വി.കെ. സ്ഥാനാര്ത്ഥി സെല്വം ഡി.ക്കെതിരെ 7,140 വോട്ടുകളുടെ ഭൂരിപക്ഷമാണ് അദ്ദേഹം നേടിയത്. ഉദയനിധി 62,992 വോട്ടുകള് നേടിയപ്പോള് സെല്വത്തിന് 55,852 വോട്ടുകള് ലഭിച്ചു. തമിഴ്നാട് രാഷ്ട്രീയത്തില് വിജയ് മുഖ്യമന്ത്രിയായി ചുമതലയേറ്റതോടെ പുതിയൊരു രാഷ്ട്രീയ അധ്യായത്തിനാണ് തുടക്കമായിരിക്കുന്നത്. ഭരണപക്ഷത്തെ വെല്ലുവിളിക്കാന് ഉദയനിധി സ്റ്റാലിന്റെ നേതൃത്വത്തില് ഡി.എം.കെ. പ്രതിപക്ഷ നിരയില് സജീവമാകും.
