കാസർകോട്: പ്രിയപ്പെട്ടവന്റെ വേർപാട് താങ്ങാനാവാതെ യുവതി ജീവിതം അവസാനിപ്പിച്ചു. കുമ്പള കിദൂർ കുണ്ടങ്കെരടുക്കയിലെ ബി. ജയാനന്ദന്റെ മകൾ പ്രഫുല്ലയാണ് (24) വീട്ടിലെ ഫാനിൽ തൂങ്ങിമരിച്ചത്. പ്രതിശ്രുത വരൻ മണി വാഹനാപകടത്തിൽ മരിച്ചതിൽ മനംനൊന്താണ് യുവതി ഈ കടുംകൈ ചെയ്തത്. ഒരു മാസത്തോളമായി ചികിത്സയിലായിരുന്ന മണി കഴിഞ്ഞ ദിവസമാണ് മരണത്തിന് കീഴടങ്ങിയത്.
ഒരു മാസം മുൻപ് നടന്ന ബൈക്ക് അപകടത്തിലാണ് മണിക്ക് ഗുരുതരമായി പരിക്കേറ്റത്. ആശുപത്രിയിൽ ചികിത്സയിൽ കഴിയവേ മണിയുടെ നില വഷളാവുകയും കഴിഞ്ഞ ദിവസം മരണം സംഭവിക്കുകയുമായിരുന്നു. വിവാഹനിശ്ചയം കഴിഞ്ഞ് ഒന്നിച്ചു ജീവിക്കാൻ സ്വപ്നങ്ങൾ നെയ്തിരുന്ന പ്രഫുല്ലയ്ക്ക് ഈ വേർപാട് താങ്ങാവുന്നതിലും അപ്പുറമായിരുന്നു. വീട്ടുകാർ മറ്റൊരു വിവാഹ ചടങ്ങിൽ പങ്കെടുക്കാൻ പോയ സമയത്താണ് പ്രഫുല്ല ആത്മഹത്യ ചെയ്തത്.
യുവതിയുടെ മുറിയിൽ നിന്നും പോലീസ് ആത്മഹത്യാക്കുറിപ്പ് കണ്ടെടുത്തു. തനിക്ക് മണിയുടെ അടുത്തേക്ക് പോകണമെന്നും, മണിയെ സംസ്കരിച്ച അതേ സ്ഥലത്ത് തന്നെ തന്നെയും സംസ്കരിക്കണമെന്നും ആത്മഹത്യാക്കുറിപ്പിൽ പ്രഫുല്ല കുറിച്ചിരുന്നു. മണിയുടെ മരണശേഷം തീർത്തും ഒറ്റപ്പെട്ട അവസ്ഥയിലായിരുന്നു പ്രഫുല്ലയെന്ന് ബന്ധുക്കൾ പറയുന്നു. സംഭവത്തിൽ പോലീസ് ഇൻക്വസ്റ്റ് നടപടികൾ പൂർത്തിയാക്കി. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.
