കൊച്ചി: താരസംഘടനയായ ‘അമ്മ’യുടെ ഫ്രണ്ട് ഓഫീസ് ജീവനക്കാരിയായിരുന്ന അതുല്യ, സംഘടനയിലെ പ്രമുഖ ഭാരവാഹികള്ക്കെതിരെ ഗുരുതര ആരോപണങ്ങളുമായി രംഗത്ത്. ജനറല് സെക്രട്ടറി കുക്കു പരമേശ്വരന്, ട്രഷറര് ഉണ്ണി ശിവപാല് എന്നിവര്ക്കെതിരെയാണ് യുവതി പരാതി നല്കിയിരിക്കുന്നത്. പരാതിയില് കൊച്ചി നോര്ത്ത് പോലീസ് അന്വേഷണം ആരംഭിച്ചു. ട്രഷറര് ഉണ്ണി ശിവപാല് തന്നോട് മോശമായി പെരുമാറിയെന്നാണണ് അതുല്യയുടെ ആരോപണം. ഇക്കാര്യം ജനറല് സെക്രട്ടറി കുക്കു പരമേശ്വരനെ അറിയിച്ചപ്പോള്, പരാതി പരിഹരിക്കുന്നതിന് പകരം തന്നെ ശകാരിക്കുകയും ഭീഷണിപ്പെടുത്തുകയുമാണ് ചെയ്തതെന്ന് യുവതി പരാതിയില് പറയുന്നു.
അവധി ദിവസങ്ങളില് പോലും തന്നെ വിളിച്ചുവരുത്തി ജോലി ചെയ്യിപ്പിച്ചിരുന്നുവെന്നും ഒരു അടിമയെപ്പോലെയാണ് പെരുമാറിയിരുന്നതെന്നും യുവതി മാധ്യമങ്ങളോട് വെളിപ്പെടുത്തി. അവിടെ നടക്കുന്ന കാര്യങ്ങള് പ്രസിഡന്റ് ശ്വേതാ മേനോനെ അറിയിച്ചതിന് തനിക്കെതിരെ സാമ്പത്തിക തിരിമറി ആരോപണം ഉന്നയിച്ച് വ്യക്തിഹത്യ ചെയ്യാന് ശ്രമിച്ചതായും പരാതിയിലുണ്ട്. കൊച്ചി സിറ്റി പോലീസ് കമ്മീഷണര്ക്ക് ലഭിച്ച പരാതി നിലവില് നോര്ത്ത് പോലീസിന് കൈമാറിയിരിക്കുകയാണ്. യുവതിയുടെ വിശദമായ മൊഴി രേഖപ്പെടുത്തിയ ശേഷമായിരിക്കും പ്രതികള്ക്കെതിരെ എഫ്.ഐ.ആര് രജിസ്റ്റര് ചെയ്യുന്ന കാര്യത്തില് തീരുമാനമെടുക്കുക.
