തിരുവനന്തപുരം: സംസ്ഥാനത്ത് വേനല്‍ മഴ കടുക്കുന്നു. ബംഗാള്‍ ഉള്‍ക്കടലിലെ ന്യൂനമര്‍ദ്ദവും കര്‍ണാടകയ്‌ക്ക് മുകളിലെ ചക്രവാതച്ചുഴിയും മൂലം മെയ് 16 വരെ കേരളത്തില്‍ വ്യാപകമായ മഴയ്ക്കും ഇടിമിന്നലിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കി. ഇതിനിടെ, ഈ ആഴ്ച അവസാനത്തോടെ ആന്റമാന്‍ കടലില്‍ തെക്കുപടിഞ്ഞാറന്‍ കാലവര്‍ഷം എത്തുമെന്നും പ്രവചനമുണ്ട്.
അടുത്ത മണിക്കൂറുകളില്‍ ശക്തമായ മഴയ്‌ക്ക് സാധ്യതയുള്ളതിനാല്‍ മൂന്ന് ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. കൊല്ലം, പത്തനംതിട്ട, മലപ്പുറം എന്നീ ജില്ലകള്‍ക്കാണ് ഓറഞ്ച് അലേര്‍ട്ട് പ്രഖ്യാപിച്ചിരിക്കുന്നത്. ഈ ജില്ലകളില്‍ മണിക്കൂറില്‍ 50 കിലോമീറ്റര്‍ വരെ വേഗതയുള്ള കാറ്റിനും സാധ്യതയുണ്ട്. മറ്റു ജില്ലകളില്‍ നേരിയതോ ഇടത്തരമോ ആയ മഴ ലഭിക്കുമെന്നതിനാല്‍ യെല്ലോ അലര്‍ട്ടിന് സമാനമായ ജാഗ്രത തുടരണം.
തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദം അടുത്ത 48 മണിക്കൂറിനുള്ളില്‍ കൂടുതല്‍ കരുത്താര്‍ജ്ജിക്കും. തെക്കന്‍ കര്‍ണാടകയ്‌ക്ക് മുകളിലായി അന്തരീക്ഷത്തിന്റെ ഉയര്‍ന്ന പാളികളില്‍ ചക്രവാതച്ചുഴി നിലനില്‍ക്കുന്നു. മെയ് 16 വരെ മണിക്കൂറില്‍ 30 മുതല്‍ 50 കി.മീ വരെ വേഗതയില്‍ കാറ്റുവീശാന്‍ സാധ്യതയുണ്ട്. ഇടിമിന്നല്‍ അപകടകാരിയായതിനാല്‍ കനത്ത ജാഗ്രത പാലിക്കണമെന്ന് ദുരന്തനിവാരണ അതോറിറ്റി അറിയിച്ചു.
ഇടിമിന്നലിന്റെ ലക്ഷണം കണ്ടാല്‍ ഉടന്‍ സുരക്ഷിതമായ കെട്ടിടങ്ങളിലേക്ക് മാറുക. തുറസായ സ്ഥലങ്ങളിലും മരങ്ങള്‍ക്കടിയിലും നില്‍ക്കുന്നത് ഒഴിവാക്കുക. ശക്തമായ കാറ്റില്‍ മരങ്ങള്‍ കടപുഴകാനും വൈദ്യുത ലൈനുകള്‍ പൊട്ടാനും സാധ്യതയുള്ളതിനാല്‍ ശ്രദ്ധിക്കുക. അടുത്ത അഞ്ച് ദിവസം കേരളത്തിലും മാഹിയിലും മഴ തുടരുമെന്നാണ് നിലവിലെ വിലയിരുത്തല്‍. കാലാവസ്ഥാ വ്യതിയാനം അനുസരിച്ച് മുന്നറിയിപ്പുകളില്‍ മാറ്റം വന്നേക്കാം.
