ന്യൂഡല്ഹി: നീറ്റ്-യുജി 2026 പരീക്ഷയുടെ വിശ്വാസ്യതയെയും രഹസ്യസ്വഭാവത്തെയും ബാധിക്കുന്ന തരത്തിലുള്ള ക്രമക്കേടുകളിലും ചോദ്യപേപ്പര് ചോര്ച്ചാ ആരോപണങ്ങളിലും അഖില ഭാരതീയ വിദ്യാര്ത്ഥി പരിഷത്ത് കടുത്ത ആശങ്ക രേഖപ്പെടുത്തി. വിവിധ മാധ്യമ റിപ്പോര്ട്ടുകളിലൂടെയും എന്ടിഎ (NTA), അന്വേഷണ ഏജന്സികള് എന്നിവയില് നിന്നും ലഭിക്കുന്ന വിവരങ്ങള് രാജ്യത്തെ ലക്ഷക്കണക്കിന് വിദ്യാര്ത്ഥികളിലും രക്ഷിതാക്കളിലും വലിയ തോതിലുള്ള ആശങ്കയാണ് പടര്ത്തിയിരിക്കുന്നത്. ദേശീയതലത്തിലുള്ള പ്രവേശന പരീക്ഷകളുടെ സുതാര്യതയില് വരുത്തുന്ന ഒരു വിട്ടുവീഴ്ചയും അംഗീകരിക്കാനാവില്ലെന്ന് എബിവിപി വ്യക്തമാക്കി.
പരീക്ഷയ്ക്ക് മുന്പ് ചോദ്യപേപ്പറോ അതുമായി ബന്ധപ്പെട്ട വിവരങ്ങളോ ചോര്ന്നിട്ടുണ്ടെങ്കില്, അത് പരീക്ഷാ സംവിധാനത്തെ അട്ടിമറിക്കല് മാത്രമല്ല, രാപ്പകല് കഠിനാധ്വാനം ചെയ്ത ലക്ഷക്കണക്കിന് വിദ്യാര്ത്ഥികളോട് കാണിക്കുന്ന കടുത്ത അനീതി കൂടിയാണ്. ഈ സംഭവത്തില് കേന്ദ്ര ഏജന്സികളെ ഉള്പ്പെടുത്തി നിഷ്പക്ഷവും സമയബന്ധിതവുമായ അന്വേഷണം കേന്ദ്ര സര്ക്കാര് ഉറപ്പാക്കണമെന്ന് എബിവിപി ആവശ്യപ്പെടുന്നു. പരീക്ഷാ മാഫിയകളും അവര്ക്ക് ഒത്താശ ചെയ്തവരും ഉള്പ്പെടെയുള്ള കുറ്റവാളികള്ക്കെതിരെ കര്ശന നിയമനടപടികള് സ്വീകരിക്കണം. അന്വേഷണം പൂര്ത്തിയാകുന്നത് വരെ നാഷണല് ടെസ്റ്റിംഗ് ഏജന്സി (NTA) പൂര്ണ്ണ സുതാര്യത പുലര്ത്തണമെന്നും വസ്തുതകള് വിദ്യാര്ത്ഥികളെയും രക്ഷിതാക്കളെയും ബോധ്യപ്പെടുത്തണമെന്നും വിദ്യാര്ത്ഥി പരിഷത്ത് ആവശ്യപ്പെട്ടു.
വര്ഷങ്ങളുടെ കഠിനാധ്വാനത്തിലൂടെയാണ് ഓരോ വിദ്യാര്ത്ഥിയും നീറ്റ് പോലുള്ള പരീക്ഷകള്ക്ക് തയ്യാറെടുക്കുന്നത്. ഇത്തരം ക്രമക്കേടുകള് അവരുടെ മനോവീര്യത്തെ തകര്ക്കുകയും ഭാവിയെ അവതാളത്തിലാക്കുകയും ചെയ്യും. അതുകൊണ്ട് തന്നെ കുറ്റവാളികള് ആരും ശിക്ഷിക്കപ്പെടാതെ പോകരുത് എന്ന് എബിവിപി ദേശീയ ജനറല് സെക്രട്ടറി ഡോ വീരേന്ദ്ര സിംഗ് സോളങ്കി പറഞ്ഞു.
പരീക്ഷാ നടത്തിപ്പിലെ സാങ്കേതിക സുരക്ഷ വര്ദ്ധിപ്പിക്കണമെന്നും സുതാര്യത ഉറപ്പാക്കണമെന്നും എബിവിപി നേരത്തെയും ആവശ്യപ്പെട്ടിട്ടുള്ളതാണ്. വിദ്യാര്ത്ഥികളുടെ അവകാശങ്ങള് സംരക്ഷിക്കാനും നീതിയുക്തമായ പരീക്ഷാ സംവിധാനം ഉറപ്പാക്കാനും വിദ്യാര്ത്ഥി പരിഷത്ത് എന്നും മുന്നിലുണ്ടാകും എന്നും അദ്ദേഹം കൂട്ടിച്ചേര്ത്തു.
