മലപ്പുറം: മലപ്പുറം മഞ്ചേരിക്കടുത്ത് പൂക്കോട്ടൂരില് കളിച്ചുകൊണ്ടിരുന്ന രണ്ട് പിഞ്ചുബാലന്മാര് തോട്ടില് വീണ് മരിച്ചു. സഹോദരിമാരുടെ മക്കളായ ആദില് ഫിറാസ് (7), മുഹമ്മദ് ഫഹ്ലാന് (4) എന്നിവരാണ് അപകടത്തില്പ്പെട്ടത്. ബന്ധുവീട്ടില് വിരുന്നിനെത്തിയതായിരുന്നു ഇരുവരും. പൂക്കോട്ടൂര് മാണിക്കംപാറയിലുള്ള അമ്മൂമ്മയുടെ വീട്ടിലായിരുന്നു കുട്ടികള് ഉണ്ടായിരുന്നത്. ഉച്ചയ്ക്ക് ശേഷം രണ്ടരയോടെ വീടിനടുത്തുള്ള പരപ്പതോട്ടിലേക്ക് ഇവര് കളിക്കാന് പോവുകയായിരുന്നു.
മഴ പെയ്തതിനെത്തുടര്ന്ന് തോട്ടില് കുത്തൊഴുക്കും വെള്ളവും കൂടുതലായിരുന്നു. ഏറെനേരം കഴിഞ്ഞിട്ടും കുട്ടികളെ കാണാതായതോടെ നടത്തിയ തിരച്ചിലിലാണ് ഇരുവരെയും തോട്ടില് കണ്ടെത്തിയത്. ആദില് ഫിറാസ് മേല്മുറി സ്വദേശി അഫ്സലിന്റെ മകനാണ്. പൂക്കോട്ടൂര് പി.കെ.എം.ഐ.സി സ്കൂളിലെ ഒന്നാം ക്ലാസ് വിദ്യാര്ത്ഥിയാണ് ആദില്.
മുഹമ്മദ് ഫഹ്ലാന് കിഴിശേരി സ്വദേശി അബ്ദുല് ജലീലിന്റെ മകനാണ്. കിഴിശേരിയിലെ സ്വന്തം വീടിന്റെ പണി നടക്കുന്നതിനാലാണ് ഫഹ്ലാനും ഉമ്മയും പൂക്കോട്ടൂരിലെ തറവാട്ടിലേക്ക് എത്തിയത്. നാട്ടുകാര് ഉടന് തന്നെ മഞ്ചേരി മെഡിക്കല് കോളേജ് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. മൃതദേഹങ്ങള് നിലവില് മെഡിക്കല് കോളേജ് മോര്ച്ചറിയില് സൂക്ഷിച്ചിരിക്കുകയാണ്.
മഴക്കാലമായതിനാല് വീടിന് സമീപമുള്ള തോടുകളിലും കുളങ്ങളിലും കുട്ടികള് ഇറങ്ങുന്നില്ലെന്ന് മാതാപിതാക്കള് പ്രത്യേകം ശ്രദ്ധിക്കണമെന്ന് അധികൃതര് അഭ്യര്ത്ഥിച്ചു.
