കൊല്‍ക്കത്ത: ആര്‍ജി കര്‍ മെഡിക്കല്‍ കോളേജ് ആശുപത്രിയിലെ ബലാത്സംഗ-കൊലപാതക കേസ് അന്വേഷണത്തില്‍ വീഴ്ച വരുത്തിയ മൂന്ന് മുതിര്‍ന്ന ഐപിഎസ് ഉദ്യോഗസ്ഥരെ പശ്ചിമ ബംഗാള്‍ സര്‍ക്കാര്‍ സസ്‌പെന്‍ഡ് ചെയ്തു. മുന്‍ കൊല്‍ക്കത്ത പോലീസ് കമ്മീഷണര്‍ വിനീത് ഗോയല്‍, മുന്‍ ഡെപ്യൂട്ടി കമ്മീഷണര്‍മാരായ ഇന്ദിര മുഖര്‍ജി, അഭിഷേക് ഗുപ്ത എന്നിവര്‍ക്കെതിരെയാണ് നടപടി. മുഖ്യമന്ത്രി സുവേന്ദു അധികാരിയാണ് സെക്രട്ടേറിയറ്റില്‍ വെച്ച് ഇക്കാര്യം അറിയിച്ചത്.
2024 ഓഗസ്റ്റില്‍ നടന്ന ദാരുണമായ സംഭവത്തിന്റെ പ്രാരംഭ അന്വേഷണ ഘട്ടത്തില്‍ ഉദ്യോഗസ്ഥര്‍ ഗുരുതരമായ വീഴ്ച വരുത്തിയതായി വകുപ്പുതല അന്വേഷണത്തില്‍ കണ്ടെത്തിയിരുന്നു. കേസുമായി ബന്ധപ്പെട്ട് അനുമതിയില്ലാതെ പത്രസമ്മേളനം നടത്തിയതും ഇരയുടെ മാതാപിതാക്കള്‍ക്ക് കൈക്കൂലി വാഗ്ദാനം ചെയ്തതും ഉള്‍പ്പെടെയുള്ള ആരോപണങ്ങള്‍ ഇവര്‍ നേരിടുന്നുണ്ട്. ഈ സാഹചര്യത്തിലാണ് കര്‍ശന നടപടി സ്വീകരിച്ചതെന്ന് മുഖ്യമന്ത്രി വ്യക്തമാക്കി.
കേസിന്റെ യഥാര്‍ത്ഥ അന്വേഷണം നിലവില്‍ സിബിഐ ആണ് നടത്തുന്നത്. സര്‍ക്കാര്‍ ഇതില്‍ ഇടപെടുന്നില്ലെന്നും എന്നാല്‍ പോലീസ് ഉദ്യോഗസ്ഥരുടെ ഭാഗത്തുനിന്നുണ്ടായ അച്ചടക്കലംഘനവും കൃത്യവിലോപവും ഗൗരവകരമായി കാണുന്നുവെന്നും അദ്ദേഹം പറഞ്ഞു. ചീഫ് സെക്രട്ടറിയുടെ മേല്‍നോട്ടത്തില്‍ ആഭ്യന്തര സെക്രട്ടറിയാകും ഉദ്യോഗസ്ഥര്‍ക്കെതിരെയുള്ള കൂടുതല്‍ വകുപ്പുതല അന്വേഷണങ്ങള്‍ക്ക് നേതൃത്വം നല്‍കുക.
ഈ സംഭവം സംസ്ഥാനത്തെ പോലീസ് സംവിധാനത്തിലുണ്ടായ വലിയ വീഴ്ചയാണെന്ന വിലയിരുത്തലുകള്‍ക്കിടെയാണ് നിര്‍ണ്ണായകമായ ഈ സസ്‌പെന്‍ഷന്‍ ഉത്തരവ് പുറത്തുവന്നിരിക്കുന്നത്.
