ചെന്നൈ: സിനിമാ ലോകത്തെയും ആരാധകരെയും ഞെട്ടിച്ചുകൊണ്ട് തന്റെ വ്യക്തിജീവിതത്തിലെ കടുത്ത പ്രതിസന്ധികളെക്കുറിച്ച് തുറന്നുപറഞ്ഞ് നടന്‍ രവി മോഹന്‍. ഭാര്യ ആര്‍തിയുമായുള്ള വിവാഹമോചന നടപടികള്‍ പൂര്‍ത്തിയാകുന്നത് വരെ താന്‍ ഇനി ക്യാമറയ്‌ക്ക് മുന്നിലെത്തില്ലെന്ന് താരം പ്രഖ്യാപിച്ചു. ഗായിക കെനീഷ ഫ്രാന്‍സിസുമായുള്ള ബന്ധത്തെച്ചൊല്ലി വിവാദങ്ങള്‍ പുകയുന്നതിനിടെയാണ് വൈകാരികമായ പ്രതികരണവുമായി രവി മോഹന്‍ രംഗത്തെത്തിയത്.
വര്‍ഷങ്ങളായി താന്‍ സ്വന്തം വീട്ടില്‍ നേരിടുന്ന മാനസിക പീഡനങ്ങളെക്കുറിച്ച് നിറകണ്ണുകളോടെയാണ് അദ്ദേഹം സംസാരിച്ചത്. താനൊരു മൃദുഭാഷിയാണെന്നത് പലരും മുതലെടുക്കുകയാണെന്നും തന്റെ ക്ഷമ ഇപ്പോള്‍ പരിധി ലംഘിച്ചിരിക്കുകയാണെന്നും അദ്ദേഹം പറഞ്ഞു. വിവാഹമോചനം ലഭിക്കുന്നത് വരെ അഭിനയിക്കില്ലെന്ന് അദ്ദേഹം ഉറപ്പിച്ചു പറഞ്ഞു. സൈബര്‍ ആക്രമണങ്ങള്‍ അവസാനിക്കുകയും ജീവിതം സാധാരണ നിലയിലാകുകയും ചെയ്താലേ മടങ്ങിവരവ് ഉണ്ടാകൂ.
കഴിഞ്ഞ കുറെ വര്‍ഷങ്ങളായി ഭാര്യയും അവരുടെ കുടുംബവും തന്നെ ഒരു അടിമയെപ്പോലെയാണ് കാണുന്നത്. ഇതിനെല്ലാം തന്റെ പക്കല്‍ വ്യക്തമായ തെളിവുകളുണ്ടെന്നും അദ്ദേഹം അവകാശപ്പെട്ടു. തന്റെ മക്കളായ ആരവിനെയും അയാനെയും കാണുന്നതില്‍ നിന്ന് തന്നെ തടയുകയാണ്. അവരോട് ഫോണില്‍ സംസാരിക്കാന്‍ പോലും സമ്മതിക്കുന്നില്ല. തന്റെ കുടുംബം തകര്‍ത്തതിന് പിന്നില്‍ പേരില്‍ മൂന്നക്ഷരമുള്ള ഒരു നടിയാണെന്ന് അദ്ദേഹം ആരോപിച്ചു.
മറ്റുള്ളവരുടെ കുടുംബം തകര്‍ത്തിട്ട് ഫെമിനിസം പ്രസംഗിക്കുന്നതില്‍ എന്ത് കാര്യമാണുള്ളതെന്ന് അദ്ദേഹം ചോദിച്ചു. കടുത്ത മാനസിക പീഡനം കാരണം താന്‍ സ്വയം ഉപദ്രവിക്കാന്‍ തുടങ്ങിയെന്ന് കൈകളിലെ പാടുകള്‍ കാണിച്ച് അദ്ദേഹം പറഞ്ഞു. ഈ ലോകം വിട്ടുപോകുന്നതിനെക്കുറിച്ച് പോലും ചിന്തിച്ചതായും അദ്ദേഹം വെളിപ്പെടുത്തി. കെനീഷ ഫ്രാന്‍സിസിനെതിരെയുള്ള വേട്ടയാടല്‍ അവസാനിപ്പിക്കണമെന്നും അവര്‍ക്ക് നല്ലൊരു ജീവിതം ഉണ്ടാകട്ടെയെന്നും അദ്ദേഹം ആശംസിച്ചു. രവി മോഹനുമായുള്ള ബന്ധം അവസാനിപ്പിച്ച് ചെന്നൈ വിടുമെന്ന് കെനീഷ നേരത്തെ സൂചിപ്പിച്ചിരുന്നു.
