ന്യൂഡല്ഹി: ഭാരതത്തിന്റെ അഭിമാനകരമായ ചോള സാംസ്കാരിക പൈതൃകം വീണ്ടെടുക്കുന്നതില് ചരിത്രപരമായ നേട്ടവുമായി പ്രധാനമന്ത്രി നരേന്ദ്ര മോദി. ചോള രാജവംശത്തിന്റെ സമുദ്ര പാരമ്പര്യത്തിന്റെയും ഭരണനൈപുണ്യത്തിന്റെയും തെളിവുകളായ പവിത്രമായ നാഗൈ (ലൈഡന്) ചെമ്പ് ഫലകങ്ങള് ഇന്ത്യയിലേക്ക് തിരികെ കൊണ്ടുവരാനുള്ള വിജയകരമായ ശ്രമം നമ്മുടെ നാഗരിക വേരുകളോടുള്ള അദ്ദേഹത്തിന്റെ പ്രതിബദ്ധതയെ ഒരിക്കല് കൂടി അടിവരയിടുന്നു.
അദ്ദേഹത്തിന്റെ ഈ പരിശ്രമത്തിന് നന്ദി പറഞ്ഞിരിക്കുകയാണ് തമിഴ്നാട്. അദ്ദേഹത്തിന്റെ പരിശ്രമത്തിനെ അഭിനന്ദിച്ചുകൊണ്ട് അണ്ണാമൈലയാണ് ഫേയ്സബുക്കില് പോസ്റ്റ് ചെയ്തിരിക്കുന്നത്. നമ്മുടെ പ്രധാന മന്ത്രി എല്ലാ ഇന്ത്യക്കാരെയൃം അഭിമാനിതരാക്കുന്നു എന്ന് അദ്ദേഹം സോഷ്യല് മീഡിയയില് പങ്കുവെച്ചു. തമിഴ്നാടിനെ സംബന്ധിച്ചിടത്തോളം ഇത് വെറുമൊരു പുരാവസ്തു കൈമാറ്റമല്ല, മറിച്ച് ആത്മീയവും ചരിത്രപരവുമായ ഒരു പുനഃസമാഗമമാണ്.
തമിഴ് സംസ്കാരത്തിന്റെയും ചരിത്രത്തിന്റെയും ആത്മവീര്യത്തിന്റെയും പ്രതീകങ്ങളാണ് ഈ ഫലകങ്ങള്. വിദേശ മണ്ണില് നിന്നും ഇവ വീണ്ടെടുത്തത് തമിഴ് ജനതയുടെ വൈകാരികമായ ആവശ്യത്തോടുള്ള വലിയൊരു ആദരവായാണ് കണക്കാക്കപ്പെടുന്നത് എന്നും അദ്ദേഹം പറഞ്ഞു. ഭാവി തലമുറകള്ക്കായി നമ്മുടെ സമ്പന്നമായ പൈതൃകം സംരക്ഷിക്കുന്നതിനും പുനഃസ്ഥാപിക്കുന്നതിനും പ്രധാനമന്ത്രി കാണിക്കുന്ന ഈ അചഞ്ചലമായ താല്പ്പര്യത്തിന് തമിഴ്നാട് ജനതയുടെ പേരില് ഹൃദയംഗമമായ നന്ദിയും അണ്ണാമലൈ അറിയിച്ചു.
രാജേന്ദ്ര ചോളന് ഒന്നാമന്റെ രാജകീയ മുദ്രയുള്ള 21 ചെമ്പ് ഫലകങ്ങളിലായി രേഖപ്പെടുത്തിയിരിക്കുന്ന ഈ ‘രാജകീയ ചാര്ട്ടര്’, ചോള കാലഘട്ടത്തിലെ ഏറ്റവും നിര്ണ്ണായകമായ ചരിത്രരേഖകളില് ഒന്നാണ്. തമിഴ്, സംസ്കൃതം എന്നീ ഭാഷകളില് കൊത്തിവെച്ചിട്ടുള്ള ഈ ഫലകങ്ങളില് ചോള വംശപരമ്പര, ഭരണസംവിധാനം, രാജവംശത്തിന്റെ സ്മരണകള് എന്നിവയെക്കുറിച്ചുള്ള അമൂല്യമായ വിവരങ്ങളുണ്ട്. ചോളര്ക്ക് ശ്രീവിജയ സാമ്രാജ്യവുമായും (ഇന്നത്തെ ഇന്തോനേഷ്യ ഉള്പ്പെടുന്ന പ്രദേശം) വിശാലമായ ഇന്ത്യന് മഹാസമുദ്ര ലോകവുമായും ഉണ്ടായിരുന്ന ആഴത്തിലുള്ള ബന്ധം ഈ ഫലകങ്ങള് വെളിപ്പെടുത്തുന്നു.
