തൃശ്ശൂര്: മണ്ണുത്തി- വടക്കഞ്ചേരി ദേശീയപാതയിലുണ്ടായ വാഹനാപകടത്തില് രണ്ട് പേര് മരിച്ചു. പെരിഞ്ഞനം സ്വദേശികളായ രാജലക്ഷ്മി (75), വിലാസിനി (78) എന്നിവരാണ് മരിച്ചത്. നിയന്ത്രണം വിട്ട കാര് നീര്പ്പാലത്തിന്റെ തൂണിലിടിച്ചുണ്ടായ അപകടത്തില് ഒരു കുടുംബത്തിലെ മൂന്നുപേര്ക്ക് ഗുരുതരമായി പരിക്കേറ്റു. ഞായറാഴ്ച വൈകുന്നേരം ആറുമണിയോടെയാണ് ചുവന്നമണ്ണില് അപകടമുണ്ടായത്. പാലക്കാട് തത്തമംഗലത്ത് നിന്ന് മടങ്ങുകയായിരുന്നു പെരിഞ്ഞനം സ്വദേശികളായ അഞ്ചംഗ സംഘം.
റോഡിന് നടുവിലുള്ള കോണ്ക്രീറ്റ് ബാരിക്കേഡില് ഇടിച്ച കാര് 30 മീറ്ററോളം മുന്നോട്ട് നീങ്ങി നീര്പ്പാലത്തിന്റെ തൂണില് ഇടിച്ചുനില്ക്കുകയായിരുന്നു. റോഡിലെ സൂചന ബോര്ഡും തകര്ത്താണ് വാഹനം പാഞ്ഞുകയറിയത്. കാര് ഓടിച്ചിരുന്ന ശ്രീഹരി, പിതാവ് ബാബു, മാതാവ് ഷീജ എന്നിവരെ അതീവ ഗുരുതരാവസ്ഥയില് ആശുപത്രിയില് പ്രവേശിപ്പിച്ചു.
അപകടത്തിന് പിന്നാലെ പ്രദേശത്ത് വലിയ തോതിലുള്ള ജനരോഷം ഇരമ്പി. ദേശീയപാതയിലെ ‘യു ടേണ്’ അടച്ചുകെട്ടിയത് കാരണം അപകടസ്ഥലത്തേക്ക് ആംബുലന്സിന് യഥാസമയം എത്തിച്ചേരാന് കഴിഞ്ഞില്ലെന്ന് നാട്ടുകാര് ആരോപിച്ചു. ഏതാണ്ട് 20 മിനിറ്റോളം വൈകിയാണ് ആംബുലന്സ് എത്തിയത്. ജീവന് രക്ഷിക്കാനുള്ള നിര്ണ്ണായകമായ സമയം നഷ്ടപ്പെട്ടതില് പ്രകോപിതരായ നാട്ടുകാര് റോഡില് തടിച്ചുകൂടി പ്രതിഷേധിച്ചു.
അശാസ്ത്രീയമായ റോഡ് നിര്മ്മാണവും ട്രാഫിക് ക്രമീകരണങ്ങളുമാണ് ഇത്തരം അപകടങ്ങള്ക്കും രക്ഷാപ്രവര്ത്തനത്തിലെ കാലതാമസത്തിനും കാരണമാകുന്നതെന്ന് പ്രക്ഷോഭകര് ചൂണ്ടിക്കാട്ടി. പോലീസെത്തിയാണ് ഗതാഗതം പുനഃസ്ഥാപിക്കുകയും നാട്ടുകാരെ ശാന്തരാക്കുകയും ചെയ്തത്. സംഭവത്തില് പോലീസ് വിശദമായ അന്വേഷണം ആരംഭിച്ചിട്ടുണ്ട്.
