മുംബൈ: ഒരു ഐപിഎല്‍ സീസണില്‍ 50 സിക്‌സറുകള്‍ തികയ്‌ക്കുന്ന ആദ്യ ഇന്ത്യന്‍ ബാറ്റര്‍ എന്ന ചരിത്രനേട്ടം സ്വന്തമാക്കി 15 വയസുകാരന്‍ വൈഭവ് സൂര്യവംശി. ടൂര്‍ണമെന്റിന്റെ ചരിത്രത്തില്‍ മറ്റൊരു ബാറ്റ്സ്മാനും ഒരു മുഴുവന്‍ സീസണില്‍ കൈവരിക്കാത്ത അസാധ്യമായ സ്‌ട്രൈക്ക് റേറ്റിലാണ് ഈ കൗമാരതാരം ബാറ്റ് വീശുന്നത്. ഐപിഎല്ലിന്റെ ഒരു സിംഗിള്‍ എഡിഷനില്‍ സൂര്യവംശിയേക്കാള്‍ കൂടുതല്‍ സിക്‌സറുകള്‍ നേടിയിട്ടുള്ളത് 2012-ല്‍ 53 സിക്‌സറുകള്‍ അടിച്ചുകൂട്ടിയ സാക്ഷാല്‍ ക്രിസ് ഗെയ്ല്‍ മാത്രമാണ്.
ചൊവ്വാഴ്ച നടന്ന മത്സരത്തില്‍ രാജസ്ഥാന്‍ റോയല്‍സിനായി താരം പുറത്തെടുത്തത് വെടിക്കെട്ട് ബാറ്റിംഗായിരുന്നു. മത്സരത്തിന്റെ തുടക്കത്തില്‍ അല്പം പക്വതയോടെയാണ് താരം നിലയുറപ്പിച്ചത്. മോഹ്സിന്‍ ഖാന്‍ എറിഞ്ഞ ആദ്യ ഓവറില്‍ സൂര്യവന്‍ഷി മൂന്ന് പന്തുകള്‍ ലീവ് ചെയ്യുകയും, ഒരെണ്ണം പ്രതിരോധിക്കുകയും, ഒരു സിംഗിള്‍ എടുക്കുകയും മാത്രമാണ് ചെയ്തത്.
എന്നാല്‍ തൊട്ടടുത്ത ഓവറുകളില്‍ വൈഭവ് ഗിയര്‍ മാറ്റി. മായങ്ക് യാദവ് മണിക്കൂറില്‍ 148 കിലോമീറ്റര്‍ വേഗതയില്‍ ഓഫ് സ്റ്റമ്പിന് വെളിയില്‍ എറിഞ്ഞ ഷോര്‍ട്ട് ബോളിനെ നേരിട്ട രീതി അത്യന്തം മനോഹരമായിരുന്നു. സൂര്യവന്‍ഷി അല്പം പിന്നോട്ട് ആഞ്ഞ് പന്ത് ലോഫ്റ്റ് ചെയ്തു. പന്ത് ഡീപ് എക്‌സ്ട്രാ കവറിന് മുകളിലൂടെ പറക്കുമ്പോഴും വൈഭവ് ആ പോസ് തുടരുകയായിരുന്നു. ബാറ്റ് ഉയര്‍ന്നു നില്‍ക്കുന്ന നിലയില്‍, ശരീരം ഒട്ടും അനങ്ങാതെ പന്ത് അതിര്‍ത്തി കടക്കുന്നതുവരെ താരം നിന്ന ആ പോസ് ക്രിക്കറ്റ് പ്രേമികളുടെ മനസ്സ് നിറച്ചു.
എല്ലാം കൃത്യമായി വരുമ്പോള്‍ പന്തിനെ ബലം പ്രയോഗിച്ച് അടിക്കേണ്ടതില്ലെന്നും അത് തനിയെ പൊയ്‌ക്കൊള്ളുമെന്നുമുള്ള ബറൂച്ചയുടെ വാക്കുകളെ അന്വര്‍ത്ഥമാക്കുന്നതായിരുന്നു വൈഭവിന്റെ ബാറ്റിംഗ്. എട്ടാം ഓവര്‍ ആയപ്പോഴേക്കും പന്ത് പലതവണ അതിര്‍ത്തി കടന്നിരുന്നു. ആകാശ് സിംഗ് എറിഞ്ഞ ഒരു ഓവറില്‍ 26 റണ്‍സാണ് വൈഭവ് അടിച്ചെടുത്തത്. ഡീപ് മിഡ്വിക്കറ്റിലൂടെ ഒരു പുള്‍ ഷോട്ട്, തേര്‍ഡ് മാനിലൂടെ ഒരു സ്ലാഷ്, മിഡ്വിക്കറ്റിലൂടെ ഒരു ഹീവ് എന്നിങ്ങനെയായിരുന്നു ആ ഓവറിലെ സിക്‌സറുകള്‍.
ഓവറിന്റെ മധ്യത്തില്‍ ക്യാപ്റ്റന്‍ ഋഷഭ് പന്ത് തന്റെ ബൗളറോട് സംസാരിക്കാന്‍ നടന്നുചെന്നുവെങ്കിലും അടുത്ത പന്തും ഫോറിലേക്കാണ് പോയത്. മറുതലയ്‌ക്കല്‍ സഹ ഓപ്പണര്‍ യശസ്വി ജയ്‌സ്വാള്‍ 43 റണ്‍സിന് പുറത്തായെങ്കിലും അത് രാജസ്ഥാന്റെ ഇന്നിംഗ്‌സിന്റെ ഒഴുക്കിനെ ഒട്ടും ബാധിച്ചില്ല. ദിഗ്വേഷ് രതിയുടെ ഗൂഗ്ലിയില്‍ റിവേഴ്‌സ് സ്വീപ് ചെയ്തുകൊണ്ട് ഒന്‍പതാം ഓവറിലാണ് സൂര്യവന്‍ഷിയുടെ അര്‍ധസെഞ്ചുറി പിറന്നത്. ഫിഫ്റ്റി തികച്ച ശേഷം വൈഭവ് തന്റെ വിരലുകള്‍ ഉയര്‍ത്തിക്കാട്ടി ഒരു വിപരീത ‘V’ ആകൃതിയും അതിന് കുറുകെ മറ്റൊന്നും കാണിച്ച് ആഹ്ലാദം പ്രകടിപ്പിച്ചു.
മറ്റാര്‍ക്കും മനസ്സിലാകാത്ത എന്തോ ഒരു സ്വകാര്യ ആംഗ്യമായിരുന്നു അത്. തുടര്‍ന്ന് 10, 11 ഓവറുകളിലായി നാല് സിക്‌സറുകള്‍ കൂടി താരം അടിച്ചുകൂട്ടി. പന്ത്രണ്ടാം ഓവറില്‍ ദിഗ്വേഷ് അല്പം ഷോര്‍ട്ടായും വൈഡായും എറിഞ്ഞ പന്തിനെ ഫീല്‍ഡര്‍മാര്‍ കണ്ണടച്ച് തുറക്കും മുന്‍പ് തന്നെ ഫ്‌ലാറ്റ് ബാറ്റ് ഷോട്ടിലൂടെ വൈഭവ് അതിര്‍ത്തി കടത്തി. 14-ാം ഓവറിന്റെ തുടക്കത്തില്‍ റോയല്‍സിന് ജയിക്കാന്‍ 38 പന്തില്‍ 41 റണ്‍സ് മാത്രം മതിയായിരുന്നപ്പോള്‍ തന്നെ കളി ഏതാണ്ട് രാജസ്ഥാന്‍ ഉറപ്പിച്ചിരുന്നു.
ഒടുവില്‍ മോഹ്സിന്‍ ഖാന്‍ എറിഞ്ഞ ഓഫ് സ്റ്റമ്പിന് വെളിയിലെ സ്ലോവര്‍ ബോളില്‍ വലിയൊരു ഷോട്ടിനായി ഫ്രണ്ട് ലെഗ് മാറ്റി കളിച്ച വൈഭവിന് പിഴച്ചു. ബാറ്റിന്റെ മുകളില്‍ തട്ടിയ പന്ത് ലോംഗ് ഓണിലേക്ക് ഉയര്‍ന്നു പൊങ്ങുകയും അബ്ദുള്‍ സമദ് അത് സുരക്ഷിതമായി കൈപ്പിടിയിലൊതുക്കുകയുമായിരുന്നു. പുറത്താകുമ്പോള്‍ 38 പന്തില്‍ 10 സിക്‌സറുകളും 7 ഫോറുകളും ഉള്‍പ്പെടെ 93 റണ്‍സ് എന്ന വമ്പന്‍ സ്‌കോര്‍ വൈഭവ് സ്വന്തമാക്കിയിരുന്നു. ശതകം നഷ്ടമായെങ്കിലും ഐപിഎല്‍ ചരിത്രതാളുകളില്‍ സ്വന്തം പേര് സ്വര്‍ണ്ണലിപികളാല്‍ എഴുതിച്ചേര്‍ത്താണ് ഈ പതിനഞ്ചുകാരന്‍ കളം വിട്ടത്.
