ന്യൂഡല്‍ഹി: രാജ്യത്ത് അടുത്തിടെയുണ്ടായ ട്രെയിന്‍ തീപ്പിടിത്തങ്ങള്‍ക്ക് പിന്നില്‍ വ്യക്തമായ അട്ടിമറി ശ്രമങ്ങളുണ്ടെന്ന ഗുരുതര വെളിപ്പെടുത്തലുമായി ഇന്ത്യന്‍ റെയില്‍വേ. റെയില്‍വേ സംവിധാനങ്ങളെ തകര്‍ക്കാനും യാത്രക്കാരില്‍ ഭീതി പടര്‍ത്താനും ലക്ഷ്യമിട്ട് ചില സാമൂഹ്യവിരുദ്ധ ശക്തികള്‍ ആസൂത്രണം ചെയ്ത നീക്കങ്ങളാണ് പല സംഭവങ്ങള്‍ക്കും പിന്നിലെന്ന് അന്വേഷണത്തില്‍ വ്യക്തമായതായി റെയില്‍വേ മന്ത്രാലയം അറിയിച്ചു.
ഹൗറ സ്റ്റേഷനില്‍ നിര്‍ത്തിയിട്ടിരുന്ന മിഥില എക്‌സ്പ്രസിന്റെ കോച്ചില്‍ കഴിഞ്ഞ ദിവസമുണ്ടായ തീപ്പിടിത്തത്തെക്കുറിച്ച് നടത്തിയ പരിശോധനയാണ് അട്ടിമറി സാധ്യതകളിലേക്ക് വിരല്‍ ചൂണ്ടിയത്. കോച്ചിന്റെ ശുചിമുറിയില്‍ നിന്ന് പെട്രോളില്‍ മുക്കി പകുതി കരിഞ്ഞ നിലയിലുള്ള തുണിക്കഷണങ്ങള്‍ സുരക്ഷാ ഉദ്യോഗസ്ഥര്‍ കണ്ടെടുത്തു. റെയില്‍വേ ജീവനക്കാരുടെ സമയബന്ധിതമായ ഇടപെടല്‍ മൂലമാണ് വലിയൊരു ദുരന്തം ഒഴിവാക്കാനായത്.
അമര്‍പുര, കോട്ട, സസാരം, ഹൗറ എന്നിവിടങ്ങളിലുണ്ടായ നാല് തീപ്പിടിത്തങ്ങളെ റെയില്‍വേ അതീവ ഗൗരവത്തോടെയാണ് കാണുന്നത്. റെയില്‍വേ സംരക്ഷണ സേനയും മറ്റ് കേന്ദ്ര അന്വേഷണ ഏജന്‍സികളും ഈ സംഭവങ്ങളില്‍ വിശദമായ അന്വേഷണം ആരംഭിച്ചിട്ടുണ്ട്. അമര്‍പുരയില്‍ ട്രെയിനിലെ കിടക്കവിരികള്‍ക്കും മറ്റ് സാധനങ്ങള്‍ക്കും മനഃപൂര്‍വ്വം തീയിട്ടതായി കണ്ടെത്തിയിരുന്നു. കോട്ടയില്‍ രാജധാനി എക്‌സ്പ്രസിന്റെ വാഷ്റൂം ഭാഗത്ത് നിന്നുമാണ് തീ ഉയര്‍ന്നത്. സസാരത്തില്‍ യാര്‍ഡില്‍ കിടന്നിരുന്ന ഉപയോഗിക്കാത്ത കോച്ചിലേക്ക് തിരിച്ചറിയാത്ത ഒരാള്‍ കത്തുന്ന വസ്തു എറിഞ്ഞതായി റിപ്പോര്‍ട്ടുണ്ട്.
മധ്യപ്രദേശിലെ രത്ലം സ്റ്റേഷനില്‍ ഡല്‍ഹിയിലേക്കുള്ള രാജധാനി എക്‌സ്പ്രസിന്റെ എസി കോച്ചിന് വന്‍തോതില്‍ തീപ്പിടിച്ച് ദിവസങ്ങള്‍ക്ക് ശേഷമാണ് റെയില്‍വേയുടെ ഈ നിര്‍ണ്ണായക പ്രസ്താവന പുറത്തുവരുന്നത്. അന്ന് ഭാഗ്യം കൊണ്ടാണ് യാത്രക്കാര്‍ പരിക്കേല്‍ക്കാതെ രക്ഷപ്പെട്ടത്. ട്രെയിന്‍ യാത്രകളില്‍ പൊതുജനങ്ങള്‍ കൂടുതല്‍ ജാഗ്രത പാലിക്കണമെന്ന് റെയില്‍വേ അഭ്യര്‍ത്ഥിച്ചു. സ്റ്റേഷനുകളിലോ കോച്ചുകളിലോ സംശയാസ്പദമായ രീതിയില്‍ ആരൈയെങ്കിലും കാണുകയോ അസ്വാഭാവികമായ സാഹചര്യങ്ങള്‍ ശ്രദ്ധയില്‍പ്പെടുകയോ ചെയ്താല്‍ ഉടന്‍ തന്നെ 139 എന്ന റെയില്‍വേ ഹെല്‍പ്പ് ലൈന്‍ നമ്പറില്‍ വിവരമറിയിക്കണമെന്ന് അധികൃതര്‍ നിര്‍ദ്ദേശിച്ചു.
