ബെംഗളൂരു: ഇന്ത്യന് കായികരംഗത്ത് ക്രിക്കറ്റിന് ലഭിക്കുന്ന അമിത പ്രാധാന്യത്തെയും ക്രിക്കറ്റ് താരങ്ങളുടെ ശാരീരികക്ഷമതയെയും വിമര്ശിച്ച് റണ് മെഷീന് വിരാട് കോലി. കഠിനാധ്വാനത്തിന്റെ കാര്യത്തില് രാജ്യത്തെ ഹോക്കി താരങ്ങളുടെ അരികിലെത്താന് പോലും ക്രിക്കറ്റിലെ പ്രമുഖര്ക്ക് കഴിയില്ലെന്നാണ് കോലിയുടെ തുറന്നുപറച്ചില്. റോയല് ചലഞ്ചേഴ്സ് ബാംഗ്ലൂരിന്റെ ഇന്നൊവേഷന് ലാബ് സംഘടിപ്പിച്ച ഇന്ത്യന് സ്പോര്ട്സ് സമ്മിറ്റില് സംസാരിക്കവെയാണ് താരം കായികലോകത്തെ യാഥാര്ത്ഥ്യങ്ങള് ചൂണ്ടിക്കാണിച്ചത്.
ക്രിക്കറ്റിന് ലഭിക്കുന്ന ജനപ്രീതി കാരണം മറ്റ് കായിക ഇനങ്ങള് ഇന്ത്യയില് തഴയപ്പെടുകയാണെന്ന് കോലി ചൂണ്ടിക്കാട്ടി. ‘സത്യസന്ധമായി പറഞ്ഞാല്, ഇന്ത്യന് ഹോക്കി താരങ്ങള്ക്കുള്ള ശാരീരികക്ഷമതയുടെ 15 ശതമാനം പോലും നമുക്കില്ല. ക്രിക്കറ്റ് കളിക്കാരുടെ പരിശീലന മുറകള് കണ്ടാല് ഹോക്കി താരങ്ങള് ചിരിക്കുകയേ ഉള്ളൂ. കാരണം നമ്മളേക്കാള് എത്രയോ മുകളിലുള്ള കായികക്ഷമതയാണ് അവരുടെ മത്സരങ്ങള്ക്ക് ആവശ്യം. ഫിറ്റ്നസ് എന്നത് എന്റെ ജോലിയുടെ ഭാഗമാണ്. അതില് ഇത്രത്തോളം അസാധാരണമായി ഒന്നും കാണേണ്ടതില്ല,’ കോലി വ്യക്തമാക്കി.
തന്റെ ഫിറ്റ്നസ് ഒരു അത്ഭുതമല്ലെന്നും അത് പ്രൊഫഷണലിസത്തിന്റെ ഭാഗം മാത്രമാണെന്നും കോലി കൂട്ടിച്ചേര്ത്തു. വിരാട് കോലിയുടെ ഈ തുറന്നുപറച്ചിലിനെ ഇന്ത്യന് ഹോക്കി താരങ്ങള് ഉള്പ്പെടെയുള്ള കായിക സമൂഹം വലിയ പിന്തുണയോടെയാണ് സ്വീകരിച്ചത്. ഇന്ത്യന് ക്രിക്കറ്റ് ടീമിന്റെ നായകനായിരുന്ന കാലത്ത് യോ-യോ ടെസ്റ്റ് ഉള്പ്പെടെയുള്ള കര്ശനമായ മാനദണ്ഡങ്ങള് കൊണ്ടുവന്ന് സഹതാരങ്ങളുടെ ഫിറ്റ്നസ് സംസ്കാരം തന്നെ മാറ്റിമറിച്ച വ്യക്തിയാണ് കോലി. കായികരംഗത്തെ തരംതിരിവുകള്ക്കെതിരെയും മറ്റ് താരങ്ങള് അനുഭവിക്കുന്ന അവഗണനയ്ക്കെതിരെയും കോലിയെപ്പോലൊരു ആഗോള സൂപ്പര്താരം സംസാരിച്ചത് വലിയ ചര്ച്ചകള്ക്ക് വഴിതുറന്നിട്ടുണ്ട്.
