കൊച്ചി: എറണാകുളം പാലാരിവട്ടത്ത് കെ.എസ്.ആർ.ടി.സി മിന്നൽ ബസ് അപകടത്തിൽപ്പെട്ടു. കന്യാകുമാരിയിൽ നിന്നും പാലക്കാട്ടേക്ക് സർവീസ് നടത്തിയിരുന്ന സൂപ്പർഫാസ്റ്റ് മിന്നൽ ബസാണ് ഇന്ന് പുലർച്ചെ നാല് മണിയോടെ അപകടത്തിൽപ്പെട്ടത്. നിയന്ത്രണം വിട്ട ബസ് റോഡരികിലെ ഓടയിലേക്ക് തെന്നിയിറങ്ങുകയായിരുന്നു.
പുലർച്ചെയായതിനാൽ റോഡിൽ മറ്റ് വാഹനങ്ങൾ കുറവായിരുന്നതും ബസ് വലിയ രീതിയിൽ മറിയാതിരുന്നതും വൻ ദുരന്തം ഒഴിവാക്കി. അപകട സമയത്ത് ബസ്സിൽ യാത്രക്കാരുണ്ടായിരുന്നുവെങ്കിലും ആർക്കും തന്നെ കാര്യമായ പരിക്കുകളൊന്നുമില്ലെന്നാണ് ലഭ്യമാകുന്ന വിവരം. തലനാരിഴയ്ക്കാണ് വലിയൊരു അപകടത്തിൽ നിന്നും യാത്രക്കാരും ജീവനക്കാരും രക്ഷപെട്ടത്.
നിയന്ത്രണം നഷ്ടപ്പെടാനുള്ള കൃത്യമായ കാരണം വ്യക്തമല്ല. സംഭവത്തെ തുടർന്ന് സ്ഥലത്തെത്തിയ പോലീസും പ്രാദേശിക അധികൃതരും ചേർന്ന് യാത്രക്കാരെ മറ്റ് വാഹനങ്ങളിൽ ലക്ഷ്യസ്ഥാനങ്ങളിലേക്ക് തിരിച്ചുവിട്ടു. അപകടത്തിൽപ്പെട്ട ബസ് റോഡിൽ നിന്നും മാറ്റാനുള്ള നടപടികൾ പുരോഗമിക്കുകയാണ്.
