ന്യൂഡല്ഹി: നീറ്റ് യു.ജി ചോദ്യപേപ്പര് ചോര്ച്ചക്കേസുമായി ബന്ധപ്പെട്ട് പൂനെയില് നിന്നുള്ള ഫിസിക്സ് ലക്ചറര് മനീഷ സഞ്ജയ് ഹവില്ദാറെ ആറ് ദിവസത്തെ സെന്ട്രല് ബ്യൂറോ ഓഫ് ഇന്വെസ്റ്റിഗേഷന് കസ്റ്റഡിയില് വിട്ടു. പ്രതിയെ കസ്റ്റഡിയില് വാങ്ങി ചോദ്യം ചെയ്യണമെന്ന സി.ബി.ഐയുടെ അപേക്ഷ പ്രത്യേക ജഡ്ജി അജയ് ഗുപ്ത അനുവദിക്കുകയായിരുന്നു. മെയ് 22-ന് അറസ്റ്റിലായ മനീഷയെ ട്രാന്സിറ്റ് റിമാന്ഡിലാണ് ഡല്ഹി കോടതിയില് ഹാജരാക്കിയത്.
പൂനെയിലെ സേത്ത് ഹീരാലാല് സറഫ് പ്രശാലയുമായി ബന്ധപ്പെട്ട് പ്രവര്ത്തിക്കുന്ന മനീഷ, നീറ്റ് യു.ജി പരീക്ഷാ സാമഗ്രികളുടെ വിവര്ത്തകയായി ജോലി ചെയ്തു വരികയായിരുന്നു. വിവര്ത്തനത്തിനായി തനിക്ക് ലഭിച്ച ഫിസിക്സ് ചോദ്യങ്ങള് ഇവര് മറ്റ് പ്രതികളുമായി ചേര്ന്ന് ചോര്ത്തിയെന്നാണ് സി.ബി.ഐയുടെ കണ്ടെത്തല്. നീറ്റ് ഫിസിക്സ് ചോദ്യപേപ്പര് ചോര്ന്ന സംഭവത്തിലെ ഏറ്റവും പ്രധാനപ്പെട്ട ഒരു കണ്ണിയാണ് മനീഷയെന്ന് അന്വേഷണ ഏജന്സി കോടതിയെ അറിയിച്ചു.
