ന്യൂഡല്ഹി: അഹമ്മദാബാദില് നടക്കാനിരിക്കുന്ന പ്രഥമ ലോക യോഗാസന ചാമ്പ്യന്ഷിപ്പ്, ഇന്ത്യയുടെ പരമ്പരാഗത ആരോഗ്യ പരിശീലന രീതിയെ ഒരു ആഗോള കായിക ഇനമായി ഉയര്ത്തുന്നതിലെ സുപ്രധാന ചുവടുവെപ്പാണെന്ന് കേന്ദ്ര യുവജനകാര്യ കായിക മന്ത്രി മന്സുഖ് മാണ്ഡവ്യ പറഞ്ഞു. ന്യൂഡല്ഹിയില് വാര്ത്താ സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
യോഗാസനം ഇന്ത്യയുടെ സാംസ്കാരിക സ്വാധീനത്തിന്റെ പ്രതിഫലനമാണെന്നും, ശാരീരികക്ഷമത, മാനസികാരോഗ്യം, ആരോഗ്യകരമായ ജീവിതശൈലി എന്നിവ ലോകമെമ്പാടും പ്രോത്സാഹിപ്പിക്കുന്നതിനുള്ള മികച്ച മാധ്യമമായി ഇത് മാറിയിട്ടുണ്ടെന്നും മന്ത്രി കൂട്ടിച്ചേര്ത്തു.
ആയിരക്കണക്കിന് വര്ഷങ്ങള്ക്ക് മുമ്പ് ഇന്ത്യയില് ഉത്ഭവിച്ച യോഗ ഇന്ന് ആഗോളതലത്തില് പരക്കെ അംഗീകരിക്കപ്പെട്ടിട്ടുണ്ടെന്നും പല രാജ്യങ്ങളിലും ഇത് ദൈനംദിന ജീവിതത്തിന്റെ അവിഭാജ്യ ഘടകമായി മാറിയിട്ടുണ്ടെന്നും മന്ത്രി മന്സുഖ് മാണ്ഡവ്യ ചൂണ്ടിക്കാട്ടി. ചാമ്പ്യന്ഷിപ്പില് പങ്കെടുക്കാന് ഏകദേശം 75 രാജ്യങ്ങള് ഇതുവരെ രജിസ്റ്റര് ചെയ്തിട്ടുണ്ടെന്നും ലോകമെമ്പാടുനിന്നുമായി 500-ലധികം മത്സരാര്ത്ഥികള് പരിപാടിയില് പങ്കെടുക്കുമെന്നാണ് പ്രതീക്ഷിക്കുന്നതെന്നും അദ്ദേഹം അറിയിച്ചു.
യോഗയ്ക്ക് അന്താരാഷ്ട്ര തലത്തില് ലഭിച്ചുകൊണ്ടിരിക്കുന്ന ഈ സ്വീകാര്യത ആരോഗ്യം, തൊഴില്, ആഗോളതലത്തിലുള്ള സമ്പര്ക്കം എന്നിവയ്ക്കുള്ള വലിയ അവസരങ്ങളാണ് തുറന്നുനല്കുന്നത്. ശാരീരികക്ഷമത, അച്ചടക്കം, മാനസിക സന്തുലിതാവസ്ഥ എന്നിവ സമന്വയിപ്പിക്കുന്ന ഒന്നാണ് യോഗാസനമെന്നും, അതോടൊപ്പം തന്നെ യോഗാ പരിശീലകര്ക്കും ഹെല്ത്ത് പ്രൊഫഷണലുകള്ക്കും ഇത് മികച്ച ജീവനോപാധി സൃഷ്ടിക്കുന്നുണ്ടെന്നും മന്ത്രി പറഞ്ഞു.
യോഗാസനത്തെ അന്താരാഷ്ട്ര തലത്തില് പ്രോത്സാഹിപ്പിക്കുന്നതിന് ഇന്ത്യ നേതൃത്വം നല്കണമെന്നും വിവിധ അന്താരാഷ്ട്ര കായിക സംഘടനകള് വഴി ഈ കായിക ഇനത്തിന് ആഗോള അംഗീകാരം ഉറപ്പാക്കാനുള്ള ശ്രമങ്ങള് നടക്കുന്നുണ്ടെന്നും അദ്ദേഹം എടുത്തുപറഞ്ഞു. ചടങ്ങില് 2026-ലെ പ്രഥമ ലോക യോഗാസന ചാമ്പ്യന്ഷിപ്പിന്റെ ഔദ്യോഗിക മാസ്കോട്ട്, ജേഴ്സി, ചാമ്പ്യന്ഷിപ്പ് ഫിലിം എന്നിവ മന്ത്രി പ്രകാശനം ചെയ്തു.
യോഗാസനത്തെ ഒരു ആഗോള കായിക ഇനമായി പ്രോത്സാഹിപ്പിക്കുന്നതിനും വരാനിരിക്കുന്ന ഈ അന്താരാഷ്ട്ര കായിക മാമാങ്കത്തെക്കുറിച്ച് കൂടുതല് അവബോധം സൃഷ്ടിക്കുന്നതിനുമുള്ള കേന്ദ്ര സര്ക്കാരിന്റെ ശ്രമങ്ങളുടെ ഭാഗമായാണ് ഈ പ്രകാശനം നടന്നത്.
