ചെന്നൈ: പ്രശസ്ത തമിഴ് ചലച്ചിത്ര താരം അജിത് കുമാറിന്റെ മാതാവ് മോഹിനി മണി (84) അന്തരിച്ചു. വാര്‍ദ്ധക്യസഹജമായ അസുഖങ്ങളെ തുടര്‍ന്ന് ചികിത്സയിലായിരുന്ന ഇവരെ പെട്ടെന്നുണ്ടായ ആരോഗ്യപ്രശ്‌നങ്ങളാല്‍ ചെന്നൈയിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. മരണവിവരമറിഞ്ഞ് ദുബായിലായിരുന്ന അജിത് കുമാര്‍ അടിയന്തരമായി ചെന്നൈയില്‍ തിരിച്ചെത്തിയിട്ടുണ്ട്. ചെന്നൈ പാലവാക്കത്തുള്ള അജിത്തിന്റെ വസതിയിലാണ് അന്ത്യകര്‍മ്മങ്ങള്‍ നടക്കുക.
കൃത്യം മൂന്ന് വര്‍ഷം മുമ്പാണ് സമാനമായ പ്രായത്തില്‍ (85 വയസ്സ്) അജിത് കുമാറിന്റെ പിതാവ് പി. സുബ്രഹ്‌മണ്യവും അന്തരിച്ചത്. മാതാവിന്റെ വിയോഗത്തില്‍ സിനിമാ-രാഷ്ട്രീയ മേഖലയിലെ പ്രമുഖര്‍ അനുശോചനം രേഖപ്പെടുത്തി. തമിഴ്നാട് മുഖ്യമന്ത്രി വിജയ്, മുന്‍ മുഖ്യമന്ത്രി എം.കെ. സ്റ്റാലിന്‍, നടന്‍ കമല്‍ ഹാസന്‍, ബി.ജെ.പി നേതാവ് കെ. അണ്ണാമലൈ തുടങ്ങിയവര്‍ താരത്തെയും കുടുംബത്തെയും നേരിട്ടും അല്ലാതെയും ആശ്വാസമറിയിച്ചു.
‘എന്റെ പ്രിയ സുഹൃത്ത് ശ്രീ അജിത് കുമാറിന്റെ മാതാവ് ശ്രീമതി മോഹിനിയുടെ വിയോഗത്തില്‍ ഞാന്‍ ഏറെ ദുഃഖിതനാണ്. ആ ആത്മാവിന് നിത്യശാന്തി ലഭിക്കാന്‍ പ്രാര്‍ത്ഥിക്കുന്നു. സ്‌നേഹനിധിയായ അമ്മയെ നഷ്ടപ്പെട്ട അജിത് കുമാറിനും അദ്ദേഹത്തിന്റെ കുടുംബത്തിനും അനുശോചനം അറിയിക്കുന്നു. ഈ കഠിന ഘട്ടത്തെ നേരിടാന്‍ അവര്‍ക്ക് കരുത്ത് ലഭിക്കട്ടെ എന്ന് മുഖ്യമന്ത്രി വിജയ് എക്‌സില്‍ കുറിച്ചു.
സാമൂഹിക മാധ്യമങ്ങളിലൂടെ തമിഴ് ചലച്ചിത്ര രംഗത്തെ സഹപ്രവര്‍ത്തകരും ലക്ഷക്കണക്കിന് ആരാധകരും തങ്ങളുടെ പ്രിയതാരത്തിന്റെ കുടുംബത്തിന്റെ ദുഃഖത്തില്‍ പങ്കുചേര്‍ന്നുകൊണ്ട് ആദരാഞ്ജലികള്‍ അര്‍പ്പിച്ചു കൊണ്ടിരിക്കുകയാണ്.
