തിരുവനന്തപുരം: മുഖ്യമന്ത്രി പിണറായി വിജയന്റെ വസതിയില് പരിശോധനയ്ക്കെത്തിയ എന്ഫോഴ്സ്മെന്റ് ഡയറക്ടറേറ്റ് ഉദ്യോഗസ്ഥരെ ആക്രമിച്ച കേസില് സി.പി.എം പ്രവര്ത്തകര്ക്ക് കനത്ത തിരിച്ചടി. കേസില് ആദ്യം അറസ്റ്റിലായ അഞ്ച് പ്രതികളുടെ ജാമ്യാപേക്ഷ തിരുവനന്തപുരം ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് (മൂന്ന്) ടാനി മറിയം ജോസ് തള്ളി. ഇതൊരു അപൂര്വ്വമായ കേസാണെന്നും പ്രതികളുടെ അക്രമം മാധ്യമങ്ങളിലൂടെ ജനങ്ങള് തത്സമയം കണ്ടതാണെന്നും ജാമ്യം നിഷേധിച്ചുകൊണ്ടുള്ള ഉത്തരവില് കോടതി വ്യക്തമാക്കി. ജുഡീഷ്യറിയില് ജനങ്ങള്ക്കുള്ള വിശ്വാസം നിലനിര്ത്തേണ്ടതുണ്ടെന്നും കോടതി ഓര്മ്മിപ്പിച്ചു.
പ്രതികളെ ജാമ്യത്തിലിറക്കാനുള്ള സി.പി.എമ്മിന്റെ നീക്കങ്ങള്ക്കാണ് ഇതോടെ തിരിച്ചടിയേറ്റിരിക്കുന്നത്. നിലവില് 25 പേരാണ് ഈ കേസില് ഇതുവരെ അറസ്റ്റിലായിട്ടുള്ളത്. അറസ്റ്റ് വിവരം ബന്ധുക്കളെയോ സുഹൃത്തുക്കളെയോ കൃത്യമായി അറിയിച്ചില്ലെന്നും ഇ.ഡി ഉദ്യോഗസ്ഥര് സഞ്ചരിച്ച സ്വകാര്യ വാഹനം തകര്ത്തത് പൊതുമുതല് നശിപ്പിക്കലിന്റെ പരിധിയില് വരില്ലെന്നുമായിരുന്നു പ്രതികളുടെ വാദം. എന്നാല് പ്രതികളുടെ വാദങ്ങള് നിലനില്ക്കില്ലെന്ന് അഡീഷണല് പ്രോസിക്യൂട്ടര് മനു കല്ലമ്പള്ളി കോടതിയില് ശക്തമായി വാദിച്ചു.
യാതൊരുവിധ പ്രകോപനവുമില്ലാതെയാണ് ഇ.ഡി ഉദ്യോഗസ്ഥര്ക്ക് നേരെ ആക്രമണമുണ്ടായതെന്ന് കോടതി വിലയിരുത്തി. പ്രോസിക്യൂഷന് വാദങ്ങള് പൂര്ണ്ണമായി അംഗീകരിച്ചാണ് മജിസ്ട്രേറ്റ് ജാമ്യാപേക്ഷ തള്ളിയത്. മുഖ്യമന്ത്രിയുടെ വസതിക്ക് നേരെ അന്വേഷണത്തിനെത്തിയ കേന്ദ്ര ഏജന്സിക്ക് നേരെ സി.പി.എം പ്രവര്ത്തകര് നടത്തിയ ആക്രമണം അതീവ ഗൗരവമുള്ളതാണെന്നാണ് പോലീസ് ഉന്നതതലത്തിലുള്ള വിലയിരുത്തല്.
നിലവില് ലോക്കല് പോലീസാണ് ഈ കേസ് അന്വേഷിക്കുന്നത്. എന്നാല് കേസിന്റെ പ്രാധാന്യവും വ്യാപ്തിയും കണക്കിലെടുത്ത്, ഉയര്ന്ന റാങ്കിലുള്ള ഒരു ഉദ്യോഗസ്ഥന്റെ നേതൃത്വത്തില് പ്രത്യേക അന്വേഷണസംഘത്തെ കേസ് ഏല്പ്പിക്കാന് ആഭ്യന്തരവകുപ്പ് ആലോചിച്ചുവരികയാണ്. ഇതുസംബന്ധിച്ച ഔദ്യോഗിക തീരുമാനം ഉടന് ഉണ്ടായേക്കുമെന്നാണ് വിവരം.
