അഹമ്മദാബാദ്: ഇന്ത്യന് പ്രീമിയര് ലീഗിന്റെ ചരിത്രത്തില് ഏറ്റവും പ്രായം കുറഞ്ഞ ഓറഞ്ച് ക്യാപ് ജേതാവെന്ന അപൂര്വ്വ റെക്കോര്ഡ് ഇനി ബിഹാര് സ്വദേശിയായ പതിനഞ്ചുകാരന് വൈഭവ് സൂര്യവംശിക്ക് സ്വന്തം. ഞായറാഴ്ച നടന്ന ഐപിഎല് ഫൈനലില് ഗുജറാത്ത് ടൈറ്റന്സ് ഓപ്പണര്മാരായ ശുഭ്മന് ഗില്ലും സായ് സുദര്ശനും കുറഞ്ഞ റണ്സിന് പുറത്തായതോടെയാണ് രാജസ്ഥാന് റോയല്സിന്റെ ഈ യുവ വിസ്മയത്തിന് ഓറഞ്ച് ക്യാപ് ഉറപ്പായത്.
ചണ്ഡീഗഡില് നടന്ന രണ്ടാം ക്വാളിഫയറില് ഗുജറാത്ത് ടൈറ്റന്സിനോട് പരാജയപ്പെട്ട് രാജസ്ഥാന് റോയല്സ് ടൂര്ണമെന്റില് നിന്ന് പുറത്തായെങ്കിലും, വന് റണ്സ് ലീഡോടെയാണ് സൂര്യവംശി സീസണ് അവസാനിപ്പിച്ചത്. ഈ സീസണിലെ 16 മത്സരങ്ങളില് നിന്നായി 237.30 എന്ന തകര്പ്പന് സ്ട്രൈക്ക് റേറ്റില് 776 റണ്സാണ് താരം അടിച്ചുകൂട്ടിയത്. ഫൈനലില് സൂര്യവംശിയെ മറികടക്കാന് ശുഭ്മന് ഗില്ലിന് 55 റണ്സ് വേണമായിരുന്നു.
കഴിഞ്ഞ വര്ഷത്തെ (2025) ഓറഞ്ച് ക്യാപ് ജേതാവായ സായ് സുദര്ശനും മത്സരരംഗത്തുണ്ടായിരുന്നു. എന്നാല് ഗില് 10 റണ്സിനും സുദര്ശന് 12 റണ്സിനും പുറത്തായതോടെ ഫൈനല് ദിനത്തില് സൂര്യവംശിയെ മറികടക്കാന് ആര്ക്കും സാധിക്കില്ലെന്ന് ഉറപ്പായി. പട്ടികയില് അഞ്ചാം സ്ഥാനത്തുള്ള ആര്സിബിയുടെ വിരാട് കോലിക്ക് 600 റണ്സാണുള്ളത്. ഫൈനലില് കോലിക്ക് സൂര്യവംശിയെ മറികടക്കാന് അസാധ്യമായ 177 റണ്സ് വേണമായിരുന്നു.
വെറും 15 വയസ്സും 65 ദിവസവും പ്രായമുള്ളപ്പോഴാണ് സൂര്യവംശി ഈ നേട്ടം കൈവരിക്കുന്നത്. 2025-ല് 23 വയസ്സും 231 ദിവസവും പ്രായമുള്ളപ്പോള് ഓറഞ്ച് ക്യാപ് നേടിയ ഗുജറാത്ത് ടൈറ്റന്സിന്റെ സായ് സുദര്ശന്റെ റെക്കോര്ഡാണ് സൂര്യവംശി തകര്ത്തത്. അതിനുമുമ്പ് 2023-ല് 23 വയസ്സും 263 ദിവസവും പ്രായമുള്ളപ്പോള് ഈ നേട്ടം സ്വന്തമാക്കിയ ശുഭ്മന് ഗില്ലിന്റെ പേരിലായിരുന്നു ഈ റെക്കോര്ഡ്.
ഈ സീസണില് രാജസ്ഥാന് റോയല്സിനായി അവിശ്വസനീയ ബാറ്റിംഗ് പുറത്തെടുത്ത സൂര്യവംശി ടൂര്ണമെന്റിലുടനീളം 72 സിക്സറുകള് പറത്തി. ഒരു ഐപിഎല് സീസണില് ഏറ്റവും കൂടുതല് സിക്സറുകള് നേടുന്ന വെസ്റ്റിന്ഡീസ് താരം ക്രിസ് ഗെയിലിന്റെ (59 സിക്സറുകള്) ദീര്ഘകാലത്തെ റെക്കോര്ഡാണ് ഈ പതിനഞ്ചുകാരന് തിരുത്തിക്കുറിച്ചത്.
സണ്റൈസേഴ്സ് ഹൈദരാബാദിനെതിരെ നേടിയ ഒരു സെഞ്ച്വറിക്ക് പുറമെ, മൂന്ന് തവണ തൊണ്ണൂറുകളില് പുറത്തായില്ലായിരുന്നുവെങ്കില് ഒരു സീസണില് നാല് സെഞ്ച്വറികള് നേടിയ വിരാട് കോലിയുടെ റെക്കോര്ഡിനൊപ്പം എത്താനും സൂര്യവംശിക്ക് സാധിക്കുമായിരുന്നു. ലഖ്നൗ സൂപ്പര് ജയന്റ്സിനെതിരെ (ഗ്രൂപ്പ് ഘട്ടത്തില് 93 റണ്സ്), സണ്റൈസേഴ്സിനെതിരെ (എലിമിനേറ്ററില് 97 റണ്സ്), ഗുജറാത്ത് ടൈറ്റന്സിനെതിരെ (രണ്ടാം ക്വാളിഫയറില് 96 റണ്സ്) എന്നിവയായിരുന്നു താരത്തിന് നഷ്ടമായ സെഞ്ച്വറികള്.
കൂടാതെ, ഐപിഎല്ലില് 1,000 റണ്സ് തികയ്ക്കുന്ന ഏറ്റവും വേഗതയേറിയ താരമെന്ന (നേരിട്ട പന്തുകളുടെ അടിസ്ഥാനത്തില്) റെക്കോര്ഡും താരം സ്വന്തമാക്കി. വെറും 440 പന്തുകളില് നിന്നാണ് സൂര്യവംശി ഈ നാഴികക്കല്ല് പിന്നിട്ടത്. വെസ്റ്റിന്ഡീസ് ഇതിഹാസം ആന്ദ്രെ റസലിന്റെ റെക്കോര്ഡാണ് താരം മറികടന്നത്. ഇന്നിംഗ്സുകളുടെ അടിസ്ഥാനത്തില് 23 ഇന്നിംഗ്സുകളില് നിന്ന് 1000 റണ്സ് തികച്ച താരം ഈ പട്ടികയില് രണ്ടാം സ്ഥാനത്താണ്. 21 ഇന്നിംഗ്സുകളില് നിന്ന് ഈ നേട്ടം കൈവരിച്ച ഷാന് മാര്ഷാണ് ഇതില് ഒന്നാമന്.
