ലണ്ടന്‍: നീണ്ട 22 വര്‍ഷത്തെ കാത്തിരിപ്പിനൊടുവില്‍ ഇംഗ്ലീഷ് പ്രീമിയര്‍ ലീഗ് കിരീടം സ്വന്തമാക്കിയ ആഴ്‌സണല്‍ ടീമിന്റെ വിജയഘോഷയാത്ര ചരിത്രത്തിലേക്ക്. രാജ്യത്ത് ഇതുവരെ നടന്നിട്ടുള്ളതില്‍ വച്ച് ഏറ്റവും വലിയ പരേഡായി ഇത് മാറിയതായാണ് ഔദ്യോഗിക റിപ്പോര്‍ട്ടുകള്‍ സ്ഥിരീകരിക്കുന്നത്. 15 ലക്ഷത്തോളം (1.5 മില്യണ്‍) ആരാധകരാണ് വടക്കന്‍ ലണ്ടന്‍ തെരുവുകളില്‍ തങ്ങളുടെ പ്രിയപ്പെട്ട ടീമിന് വരവേല്‍പ്പ് നല്‍കാന്‍ ഒഴുകിയെത്തിയത്. ചുരുക്കത്തില്‍, വടക്കന്‍ ലണ്ടനിലുള്ളവരെല്ലാം ഇപ്പോള്‍ ‘ചുവപ്പ് കടലില്‍’ അകപ്പെട്ട അവസ്ഥയിലാണ്.
കഴിഞ്ഞ ശനിയാഴ്ച രാത്രി ബുഡാപെസ്റ്റില്‍ നടന്ന ചാമ്പ്യന്‍സ് ലീഗ് ഫൈനലില്‍, പെനാല്‍റ്റി ഷൂട്ടൗട്ടില്‍ പാരീസ് സെന്റ് ഷെര്‍മൈനോട് പരാജയപ്പെട്ടതിന്റെ നിരാശയുണ്ടായിരുന്നെങ്കിലും, പ്രീമിയര്‍ ലീഗ് കിരീടനേട്ടത്തിന്റെ ആവേശത്തില്‍ ആരാധകരുടെ ആവേശം വാനോളമായിരുന്നു. 5.6 മൈല്‍ നീണ്ട വിജയഘോഷയാത്ര കടന്നുപോയ വഴികളിലെല്ലാം ജനസാഗരമാണ് ദൃശ്യമായത്. കഴിഞ്ഞ കുറച്ചു സീസണുകളായി നേരിയ വ്യത്യാസത്തില്‍ കിരീടം നഷ്ടപ്പെട്ടിരുന്ന ആഴ്‌സണലിന്, ഒടുവില്‍ രണ്ടാം സ്ഥാനക്കാരുടെ ശാപം മാറ്റിയെടുക്കാന്‍ ഈ വിജയത്തോടെ സാധിച്ചു.
രണ്ടാം സ്ഥാനത്തുള്ള മാഞ്ചസ്റ്റര്‍ സിറ്റിയേക്കാള്‍ ഏഴ് പോയിന്റുകള്‍ മുന്നിലെത്തിയാണ് ഗണ്ണേഴ്‌സ് ഇത്തവണ പ്രീമിയര്‍ ലീഗ് കിരീടം ചൂടിയത്. ലണ്ടന്‍ നഗരത്തില്‍ ആഴ്‌സണല്‍ താരങ്ങള്‍ സഞ്ചരിച്ച ബസ് കടന്നുപോയപ്പോള്‍ തങ്ങളുടെ പ്രിയതാരങ്ങളെ ഒരുനോക്ക് കാണാന്‍ കെട്ടിടങ്ങളുടെ ജാലകപ്പടികളിലും ബസ് സ്റ്റോപ്പുകള്‍ക്ക് മുകളിലും മേല്‍ക്കൂരകളിലും ആരാധകര്‍ തടിച്ചുകൂടിയിരുന്നു. ആരാധകര്‍ ഉയര്‍ത്തിയ ആയിരക്കണക്കിന് ഫ്‌ലെയറുകളില്‍ നിന്നുള്ള ചുവന്ന പുക വടക്കന്‍ ലണ്ടന്റെ ആകാശത്തെ പൂര്‍ണ്ണമായും ചുവപ്പണിയിച്ചു.
ഫെബ്രുവരിയില്‍ നടന്ന വിമന്‍സ് ചാമ്പ്യന്‍സ് കപ്പ് വിജയിച്ച ആഴ്‌സണല്‍ വനിതാ ടീമിനായുള്ള പ്രത്യേക ബസും ഈ വിജയഘോഷയാത്രയുടെ ഭാഗമായിരുന്നു. വനിതാ ടീമിന്റെ കിരീടനേട്ടവും പുരുഷ ടീമിന്റെ പ്രീമിയര്‍ ലീഗ് വിജയവും ഒന്നിച്ച് ചരിത്രപരമായ ആഘോഷമാക്കുകയാണ് ലണ്ടനിലെ ആഴ്‌സണല്‍ ആരാധകര്‍.
