പാരിസ്: കരുത്തരുടെ പോരാട്ടത്തില് മുന് ചാമ്പ്യന് നവോമി ഒസാക്കയെ നേരിട്ടുള്ള സെറ്റുകള്ക്ക് തകര്ത്ത് ലോക ഒന്നാം നമ്പര് താരം അരിന സബലെങ്ക ഫ്രഞ്ച് ഓപ്പണിന്റെ ക്വാര്ട്ടര് ഫൈനലില് കടന്നു. ആവേശകരമായ നൈറ്റ് സെഷന് മത്സരത്തില് 7-5, 6-3 എന്ന സ്കോറിനാണ് ബെലാറൂസ് താരം വിജയം പിടിച്ചടക്കിയത്. സബലെങ്കയുടെ ഉജ്ജ്വല ഫോമിന് മുന്നില് ഒസാക്കയ്ക്ക് മറുപടിയില്ലായിരുന്നു; മത്സരത്തില് 39 വിന്നറുകളും 12 ഏസുകളുമാണ് സബലെങ്ക ഉതിര്ത്തത്.
തുടര്ച്ചയായ 14-ാം ഗ്രാന്ഡ്സ്ലാം ടൂര്ണമെന്റിലാണ് സബലെങ്ക ക്വാര്ട്ടര് ഘട്ടത്തിലേക്ക് യോഗ്യത നേടുന്നത്. പ്രമുഖ താരങ്ങളെല്ലാം നേരത്തെ പുറത്തായതോടെ, നിലവില് റോളണ്ട് ഗാരോസിലെ പുരുഷ-വനിതാ സിംഗിള്സ് പോരാട്ടങ്ങളില് അവശേഷിക്കുന്ന ഏക ഗ്രാന്ഡ്സ്ലാം ചാമ്പ്യന് കൂടിയാണ് സബലെങ്ക. ഈ വര്ഷം ഒസാക്കയ്ക്കെതിരെ സബലെങ്ക നേടുന്ന തുടര്ച്ചയായ മൂന്നാം വിജയമാണിത്. റഷ്യന് താരം ഡയാന ഷ്നൈഡറാണ് ക്വാര്ട്ടറില് സബലെങ്കയുടെ എതിരാളി. കഴിഞ്ഞ വര്ഷം ഫൈനലില് കോക്കോ ഗോഫിനോടേറ്റ പരാജയത്തിന്റെ നിരാശ മാറ്റി കരിയറിലെ ആദ്യ ഫ്രഞ്ച് ഓപ്പണ് കിരീടം സ്വന്തമാക്കുകയാണ് സബലെങ്കയുടെ ലക്ഷ്യം.
പാരീസിലെ തന്റെ ഏറ്റവും മികച്ച പ്രകടനവുമായി പ്രീ-ക്വാര്ട്ടര് വരെയെത്തിയ ഒസാക്കയ്ക്ക് ഇതോടെ മടങ്ങേണ്ടി വന്നു. പരാജയപ്പെട്ടെങ്കിലും മുന്പത്തെപ്പോലെ നിരാശയല്ലെന്നും കളി ആസ്വദിക്കാന് കഴിഞ്ഞെന്നും 28-കാരിയായ ജാപ്പനീസ് താരം പ്രതികരിച്ചു. ‘പണ്ടായിരുന്നെങ്കില് ഞാന് മുറിയില് കയറി വാതിലടച്ചിരുന്നേനെ. എന്നാല് ഇപ്പോള് ടെന്നീസിനെ സ്നേഹിക്കുന്നു, മികച്ച കളി പുറത്തെടുക്കാന് പരമാവധി ശ്രമിക്കുന്നു. ഇനി വീട്ടിലെത്തി മകളെ കാണാനുള്ള ആകാംക്ഷയിലാണ്,’ ഒസാക്ക പറഞ്ഞു. അര്ദ്ധരാത്രിയിലെ ഈഫല് ടവറിനെ അനുസ്മരിപ്പിക്കുന്ന തിളങ്ങുന്ന സ്വര്ണ്ണനിറത്തിലുള്ള വസ്ത്രം ധരിച്ചാണ് ഒസാക്ക കോര്ട്ടിലിറങ്ങിയത്.
2023-ന് ശേഷം ഫ്രഞ്ച് ഓപ്പണില് ഒരു വനിതാ മത്സരം നൈറ്റ് സെഷനില് ഉള്പ്പെടുത്തുന്നത് ഇതാദ്യമായാണ്. തുടര്ച്ചയായി 32 പുരുഷ മത്സരങ്ങള് രാത്രിയില് നടത്തിയതിനെതിരെ ടൂര്ണമെന്റ് സംഘാടകര് കടുത്ത വിമര്ശനം നേരിട്ടിരുന്നു. പുരുഷന്മാരെപ്പോലെ വനിതാ താരങ്ങള്ക്കും തുല്യ പരിഗണന വേണമെന്ന് മുന്പ് സബലെങ്ക ആവശ്യപ്പെട്ടിരുന്നു. ഈ മത്സരം വനിതകളുടെ നൈറ്റ് സെഷനുകളിലേക്കുള്ള ഒരു പുതിയ തുടക്കമാകുമെന്ന് പ്രതീക്ഷിക്കുന്നതായി സബലെങ്ക മത്സരശേഷം വ്യക്തമാക്കി.
ആദ്യ സെറ്റില് ഇരുവരും ഒപ്പത്തിനൊപ്പം പോരാടിയെങ്കിലും 11-ാം ഗെയിമില് ഒസാക്കയുടെ സര്വ് ഭേദിച്ച് സബലെങ്ക 6-5 ന് മുന്നിലെത്തി. തൊട്ടടുത്ത ഗെയിമില് ഒരൊറ്റ പോയിന്റ് പോലും വിട്ടുകൊടുക്കാതെ സബലെങ്ക ആദ്യ സെറ്റ് സ്വന്തമാക്കി. രണ്ടാം സെറ്റില് ഒരു ഘട്ടത്തില് ഒസാക്ക 3-2 ന് മുന്നിലായിരുന്നെങ്കിലും, ശക്തമായ തിരിച്ചുവരവിലൂടെ സബലെങ്ക മത്സരം അനുകൂലമാക്കി. ഒസാക്കയുടെ ഡബിള് ഫോള്ട്ടിലൂടെ ലഭിച്ച മാച്ച് പോയിന്റില് ഒരു തകര്പ്പന് റിട്ടേണിലൂടെ സബലെങ്ക ക്വാര്ട്ടര് ടിക്കറ്റ് ഉറപ്പിച്ചു.
