സൂറത്ത്: ഗുജറാത്തിലെ സൂറത്ത് ജില്ലയിലുണ്ടായ അതിദാരുണമായ റോഡപകടത്തില് ഏഴ് പേര് കൊല്ലപ്പെടുകയും പതിനഞ്ചോളം പേര്ക്ക് പരിക്കേല്ക്കുകയും ചെയ്തു. ബര്ദോളി താലൂക്കിലെ ഉവ-മനേക്പൂര് ഗ്രാമത്തിന് സമീപം ചൊവ്വാഴ്ചയാണ് രണ്ട് മഹാരാഷ്ട്ര സ്റ്റേറ്റ് ട്രാന്സ്പോര്ട്ട് (എസ്ടി) ബസുകളും ഒരു ട്രാക്ടറും ഉള്പ്പെട്ട വന് അപകടമുണ്ടായത്.
ധൂലെയില് നിന്ന് നവാപൂര് വഴി സൂറത്തിലേക്ക് വരികയായിരുന്ന മഹാരാഷ്ട്ര എസ്ടി ബസ് ഹൈവേയില് മുന്നില് പോവുകയായിരുന്ന ട്രാക്ടറിലിടിക്കുകയായിരുന്നു. ഇടിയുടെ ആഘാതത്തില് നിയന്ത്രണം വിട്ട ബസ് റോഡ് ഡിവൈഡര് മറികടന്ന് എതിര്ദിശയില് നിന്ന് വരികയായിരുന്ന മറ്റൊരു മഹാരാഷ്ട്ര എസ്ടി ബസിലേക്ക് നേര്ക്കുനേര് ഇടിയ്ക്കുകയായിരുന്നു. അപകടത്തില്പ്പെട്ട ഒരു ബസില് 26 ഓളം യാത്രക്കാരും രണ്ടാമത്തെ ബസില് മുപ്പത്തഞ്ചോളം യാത്രക്കാരുമാണ് ഉണ്ടായിരുന്നത്.
ശക്തമായ ഇടിച്ചിലിന് പിന്നാലെ നിയന്ത്രണം നഷ്ടമായ ഒരു ബസ് പലതവണ മറിഞ്ഞ് റോഡരികിലെ താഴ്ചയിലേക്ക് പതിക്കുകയും നിമിഷങ്ങള്ക്കകം അതിന് തീപിടിക്കുകയുമായിരുന്നു. തീ പടര്ന്നുപിടിച്ചതോടെ നിരവധി യാത്രക്കാര് ബസിനുള്ളില് കുടുങ്ങിപ്പോയത് രക്ഷാപ്രവര്ത്തനം സങ്കീര്ണ്ണമാക്കി.
അപകടത്തില് ഏഴ് പേരുടെ മരണം അധികൃതര് സ്ഥിരീകരിച്ചിട്ടുണ്ട്. പരിക്കേറ്റ ചിലരുടെ നില അതീവ ഗുരുതരമായി തുടരുന്നതിനാല് മരണസംഖ്യ ഇനിയും ഉയര്ന്നേക്കാമെന്നാണ് ആശങ്ക. തകര്ന്ന ബസുകളില് നിന്നും അവശിഷ്ടങ്ങള്ക്കിടയില് നിന്നും രക്ഷപ്പെടുത്തിയ 15 യാത്രക്കാരെ സമീപത്തെ വിവിധ ആശുപത്രികളിലേക്ക് മാറ്റിയിട്ടുണ്ട്.
സംഭവം അറിഞ്ഞയുടന് തന്നെ ഫയര്ഫോഴ്സ്, പോലീസ്, ആംബുലന്സ് സംഘങ്ങള് സ്ഥലത്തെത്തി യുദ്ധകാലാടിസ്ഥാനത്തില് രക്ഷാപ്രവര്ത്തനം ആരംഭിച്ചു. അഗ്നിശമനസേനാംഗങ്ങള് ഏറെ പരിശ്രമിച്ചാണ് ബസിലെ തീ അണച്ചത്. അപകടത്തെ തുടര്ന്ന് ഹൈവേയില് മണിക്കൂറുകളോളം നീണ്ട ഗതാഗതക്കുരുക്ക് അനുഭവപ്പെട്ടു. അപകടത്തിന്റെ കൃത്യമായ കാരണം കണ്ടെത്താന് പോലീസ് അന്വേഷണം ആരംഭിച്ചിട്ടുണ്ട്.
