വാഷിങ്ടണ്: ചരിത്രത്തിലാദ്യമായി ലോകകപ്പ് നിയന്ത്രിക്കാന് യോഗ്യത നേടിയ സൊമാലിയന് റഫറി ഒമര് അബ്ദുല്ഖാദിര് അര്താന് 2026-ലെ ഫിഫ ലോകകപ്പ് നഷ്ടമാകും. അമേരിക്കയിലേക്ക് പ്രവേശനം നിഷേധിക്കപ്പെട്ടതിനെ തുടര്ന്ന് ഫിഫയുടെ ഔദ്യോഗിക മാച്ച് ഒഫീഷ്യല്മാരുടെ പട്ടികയില് നിന്ന് ഇദ്ദേഹത്തെ ഒഴിവാക്കി. 2025-ലെ ആഫ്രിക്കന് ഫുട്ബോളിലെ മികച്ച റഫറിയായി തിരഞ്ഞെടുക്കപ്പെട്ട അര്താനെ മിയാമി അന്താരാഷ്ട്ര വിമാനത്താവളത്തില് വെച്ചാണ് യു.എസ് ഇമിഗ്രേഷന് വിഭാഗം തടഞ്ഞത്. നിലവില് ഇദ്ദേഹം തുര്ക്കിയിലെ ഇസ്താംബൂളിലാണുള്ളത്.
തങ്ങള്ക്ക് ലഭ്യമായ വിവരങ്ങളുടെ അടിസ്ഥാനത്തില് നടത്തിയ പരിശോധനയിലാണ് അര്താന് പ്രവേശനം നിഷേധിച്ചതെന്നാണ് യു.എസ് കസ്റ്റംസ് ആന്ഡ് ബോര്ഡര് പ്രൊട്ടക്ഷന് വ്യക്തമാക്കുന്നത്. ഡൊണാള്ഡ് ട്രംപ് ഭരണകൂടത്തിന്റെ യാത്രാവിലക്കുള്ള രാജ്യങ്ങളുടെ പട്ടികയില് സൊമാലിയയും ഉള്പ്പെടുന്നുണ്ടെങ്കിലും, വിമാനത്താവളത്തില് വെച്ച് അര്താനെ തിരിച്ചയച്ചതിന് വ്യക്തമായ ഔദ്യോഗിക കാരണം വ്യക്തമാക്കാന് അധികൃതര് തയ്യാറായിട്ടില്ല.
നയതന്ത്ര പാസ്പോര്ട്ട് ഉള്പ്പെടെ കൃത്യമായ യാത്രാരേഖകളും വിസയും ഉണ്ടായിരുന്നിട്ടും മികച്ചൊരു കായികതാരത്തെ തടഞ്ഞുവെച്ചതില് സൊമാലിയന് ഫുട്ബോള് ഫെഡറേഷന് ഫിഫയെയും യു.എസ് അധികൃതരെയും പ്രതിഷേധം അറിയിച്ചിട്ടുണ്ട്. യു.എസില് പ്രവേശിക്കാന് അനുമതി ലഭിക്കാത്ത സാഹചര്യത്തില് ഒമര് അര്താന് ലോകകപ്പിന് മുന്നോടിയായുള്ള പരിശീലന ക്യാമ്പുകളില് പങ്കെടുക്കാനോ മത്സരങ്ങള് നിയന്ത്രിക്കാനോ കഴിയില്ലെന്ന് ഫിഫ പ്രസ്താവനയിലൂടെ വ്യക്തമാക്കി.
‘വിസ അനുവദിക്കുന്നതും രാജ്യത്തേക്ക് പ്രവേശനം നല്കുന്നതും പൂര്ണ്ണമായും ആതിഥേയ രാജ്യത്തിന്റെ പരമാധികാര തീരുമാനമാണ്. അതില് ഇടപെടാന് ഫിഫയ്ക്ക് അധികാരമില്ല. നിലവിലെ സാഹചര്യത്തില് അര്താന്റെ പദവിയില് മാറ്റമുണ്ടാകില്ലെന്ന് യു.എസ് അധികൃതര് അറിയിച്ചിട്ടുണ്ട്,’ ഫിഫ വക്താവ് പറഞ്ഞു. 2018 മുതല് ഫിഫ പാനലിലുള്ള അര്താന്, ലോകകപ്പ് നിയന്ത്രിക്കാന് തിരഞ്ഞെടുത്ത 52 പ്രധാന റഫറിമാരില് ഒരാളായിരുന്നു.
സൊമാലിയന് കായികരംഗത്തിന് തന്നെ വലിയ പ്രചോദനമാകേണ്ടിയിരുന്ന ഒരു ചരിത്ര നിമിഷമാണ് വിമാനത്താവളത്തിലെ ഇമിഗ്രേഷന് നടപടികളിലൂടെ ഇല്ലാതായത്. ഫുട്ബോളിന്റെ നിഷ്പക്ഷതയ്ക്കും കായിക ധര്മ്മത്തിനും വിരുദ്ധമാണ് ഈ നടപടിയെന്ന് സൊമാലിയന് കായിക മന്ത്രാലയം കുറ്റപ്പെടുത്തി. ലോകകപ്പ് ആരംഭിക്കാന് ദിവസങ്ങള് മാത്രം ബാക്കിനില്ക്കെ, യു.എസ് ഇമിഗ്രേഷന് വകുപ്പിന്റെ കടുത്ത നിലപാടുകള് കായിക ലോകത്ത് വലിയ ചര്ച്ചകള്ക്കാണ് വഴിതുറന്നിരിക്കുന്നത്. ഇറാന് ടീമിന്റെ സപ്പോര്ട്ട് സ്റ്റാഫുകള്ക്കും സ്വിസ് താരം ബ്രീല് എംബോളോയ്ക്കും നേരത്തെ വിസ സംബന്ധിച്ച പ്രതിസന്ധികള് നേരിടേണ്ടി വന്നിരുന്നു.
