ടെഹ്റാന്: 2026 ലോകകപ്പ് ഫുട്ബോളിന് പന്തുരുളാന് മണിക്കൂറുകള് മാത്രം ബാക്കിനില്ക്കെ, ഇറാന് ഫുട്ബോള് ടീമിനെ പ്രതിസന്ധിയിലാക്കി ഫിഫയുടെ പുതിയ നടപടി. ഇറാന് ആരാധകര്ക്കായി മാറ്റിവെച്ചിരുന്ന ലോകകപ്പ് ടിക്കറ്റ് വിഹിതം ഫിഫ ഏകപക്ഷീയമായി റദ്ദാക്കിയെന്ന ഗുരുതരമായ ആരോപണവുമായി ഇറാന് ഫുട്ബോള് ഫെഡറേഷന് രംഗത്തെത്തി. ടൂര്ണമെന്റിനായി വിമാന ടിക്കറ്റും താമസസൗകര്യവും ഉള്പ്പെടെ കോടിക്കണക്കിന് രൂപ ചെലവഴിച്ച് യാത്ര തിരിക്കാനിരുന്ന ആയിരക്കണക്കിന് ആരാധകരെ വഞ്ചിക്കുന്ന നിലപാടാണ് ഫിഫയുടേതെന്ന് ഇറാന് കുറ്റപ്പെടുത്തി.
ആതിഥേയ രാജ്യം എന്ന നിലയിലുള്ള അന്താരാഷ്ട്ര ഉത്തരവാദിത്തങ്ങള് അമേരിക്ക പരസ്യമായി ലംഘിക്കുകയാണെന്നും ഇറാന് ആരോപിച്ചു. യു.എസും ഇറാനും തമ്മിലുള്ള കടുത്ത രാഷ്ട്രീയ ഭിന്നതകള് കായിക ലോകത്തെയും വിഴുങ്ങുന്ന കാഴ്ചയ്ക്കാണ് നിലവില് ഫുട്ബോള് ലോകം സാക്ഷ്യം വഹിക്കുന്നത്. നേരത്തെ, 2026 മാര്ച്ചില് യു.എസ് പ്രസിഡന്റ് ഡൊണാള്ഡ് ട്രംപ് നടത്തിയ ഒരു പ്രസ്താവന വലിയ വിവാദമായിരുന്നു. സുരക്ഷാ കാരണങ്ങള് മുന്നിര്ത്തി ഇറാന് ടീം ലോകകപ്പില് പങ്കെടുക്കാന് വരുന്നത് ശരിയല്ലെന്നായിരുന്നു ട്രംപ് വ്യക്തമാക്കിയത്.
ഇതിന് പിന്നാലെ ഇറാന് ടീമിന് വിസ അനുവദിക്കുന്നതില് യു.എസ് ഇമിഗ്രേഷന് വിഭാഗം കടുത്ത നിയന്ത്രണങ്ങള് ഏര്പ്പെടുത്തി. മത്സരം തുടങ്ങാന് വെറും 10 ദിവസങ്ങള് ശേഷിക്കെയാണ് കളിക്കാര്ക്ക് വിസ ലഭിച്ചത്. ഇറാന്റെ 70 അംഗ സംഘത്തിലെ 15 പേര്ക്ക് ഒടുവില് വിസ നിഷേധിക്കപ്പെടുകയും ചെയ്തു. ഇതില് പ്രധാന അഡ്മിനിസ്ട്രേറ്റീവ് ഉദ്യോഗസ്ഥരും ഉള്പ്പെടുന്നു. സുരക്ഷാ കാരണങ്ങളാല് മത്സരങ്ങള് യു.എസിന് പുറത്തേക്ക് മാറ്റണമെന്ന ഇറാന്റെ ആവശ്യം നേരത്തെ ഫിഫ തള്ളിയിരുന്നു. പുതിയ ടിക്കറ്റ് വിവാദത്തില് ഫിഫയോ സംഘാടകരോ ഇതുവരെ പ്രതികരിച്ചിട്ടില്ല.
ഇറാന് ടീമിന് മാത്രമല്ല, യാത്രാവിലക്കുള്ള മറ്റ് രാജ്യങ്ങളില് നിന്നുള്ള കായിക പ്രതിഭകള്ക്കും അമേരിക്കന് മണ്ണില് കടുത്ത വിവേചനമാണ് നേരിടേണ്ടി വരുന്നത്. ചരിത്രത്തിലാദ്യമായി ലോകകപ്പ് നിയന്ത്രിക്കാന് യോഗ്യത നേടിയ സൊമാലിയന് റഫറി ഒമര് അബ്ദുല്ഖാദിര് അര്താന് വിമാനത്താവളത്തില് വെച്ച് യു.എസ് പ്രവേശനം നിഷേധിച്ചതാണ് മറ്റൊരു സംഭവം. 2025-ലെ ആഫ്രിക്കന് ഫുട്ബോളിലെ മികച്ച റഫറിയായ അര്താനെ മിയാമി വിമാനത്താവളത്തില് വെച്ചാണ് തടഞ്ഞത്. നയതന്ത്ര പാസ്പോര്ട്ട് ഉണ്ടായിരുന്നിട്ടും ട്രംപ് ഭരണകൂടത്തിന്റെ യാത്രാവിലക്ക് ചൂണ്ടിക്കാട്ടിയാണ് ഇദ്ദേഹത്തെ തിരിച്ചയച്ചത്.
അമേരിക്കയില് പ്രവേശിക്കാന് കഴിയാത്തതിനാല് ഒമര് അര്താനെ ലോകകപ്പ് റഫറിമാരുടെ ഔദ്യോഗിക പട്ടികയില് നിന്ന് ഫിഫ ഒഴിവാക്കി. വിസയും പ്രവേശനവും പൂര്ണ്ണമായും ആതിഥേയ രാജ്യത്തിന്റെ തീരുമാനമാണെന്നും അതില് ഫിഫയ്ക്ക് ഇടപെടാനാകില്ലെന്നുമാണ് ഉയര്ന്ന ഉദ്യോഗസ്ഥര് വ്യക്തമാക്കുന്നത്. കായിക മാമാങ്കത്തെ രാഷ്ട്രീയ വൈരങ്ങള് തീര്ക്കാനുള്ള വേദിയാക്കി മാറ്റുന്ന അമേരിക്കന് ഭരണകൂടത്തിന്റെ കടുംപിടുത്തങ്ങള് 2026 ലോകകപ്പിന്റെ സുഗമമായ നടത്തിപ്പിന് വലിയ ഭീഷണിയായി മാറിയിരിക്കുകയാണ്.
