ടോറന്റോ: ഫിഫ ലോകകപ്പില് ആതിഥേയ രാജ്യങ്ങളായ കാനഡയും അമേരിക്കയും ഇന്ന് തങ്ങളുടെ ആദ്യ മത്സരങ്ങള്ക്കായി കളത്തിലിറങ്ങും. വെള്ളിയാഴ്ച അര്ദ്ധരാത്രി കാനഡ തങ്ങളുടെ സ്വന്തം മൈതാനത്ത് ബോസ്നിയ ഹെര്സെഗോവിനയെ നേരിടുമ്പോള്, ശനിയാഴ്ച പുലര്ച്ചെ നടക്കുന്ന മത്സരത്തില് യു.എസ്.എ. പാരഗ്വായുമായി മാറ്റുരയ്ക്കും.
ടൂര്ണമെന്റിന്റെ ചരിത്രത്തില് മൂന്നാം തവണയാണ് കാനഡ ലോകകപ്പ് വേദിയിലെത്തുന്നത്. മുന്പ് പങ്കെടുത്ത ആറ് മത്സരങ്ങളിലും പരാജയം രുചിക്കേണ്ടി വന്ന കാനഡയ്ക്ക്, സ്വന്തം കാണികള്ക്ക് മുന്നില് ബോസ്നിയക്കെതിരെ ഒരു ചരിത്രവിജയം നേടുകയാണ് ഇത്തവണത്തെ പ്രധാന ലക്ഷ്യം. ആതിഥേയരെന്ന നിലയില് നേരിട്ട് യോഗ്യത നേടിയ ടീമിന്, പരിക്കിനെ തുടര്ന്ന് നായകന് അല്ഫോന്സോ ഡേവിസ് ടീമില് ഇല്ലാത്തത് കനത്ത തിരിച്ചടിയാണ്. എങ്കിലും കോച്ച് ജെസെ മാര്ഷിന്റെ കീഴില് അവസാന ആറ് മത്സരങ്ങളിലും പരാജയം അറിയാതെയാണ് കാനഡ വരുന്നത് എന്നത് അവരുടെ ആത്മവിശ്വാസം വര്ദ്ധിപ്പിക്കുന്നു.
മറുഭാഗത്ത്, പ്രമുഖ പരിശീലകന് മൗറീഷ്യോ പൊച്ചെറ്റിനോയ്ക്ക് കീഴില് ഇറങ്ങുന്ന യു.എസ്.എ. മികച്ച ഫോമിലാണ്. കഴിഞ്ഞ സന്നാഹ മത്സരത്തില് സെനഗലിനെ പരാജയപ്പെടുത്തിയ അവര്, അതിന് തൊട്ടുമുന്പത്തെ കളിയില് കരുത്തരായ ജര്മ്മനിയോട് മികച്ച പോരാട്ടം കാഴ്ചവെച്ചാണ് കീഴടങ്ങിയത്. മുന്നേറ്റനിരയില് ക്രിസ്റ്റ്യന് പുലിസിച്ചിന്റെ സാന്നിധ്യമാണ് അമേരിക്കയുടെ പ്രധാന കരുത്ത്.
