ആലപ്പുഴ/തൃശ്ശൂര്‍: ആലപ്പുഴയില്‍ നിന്ന് കാണാതായ നര്‍ക്കോട്ടിക് സെല്‍ എ.എസ്.ഐയെ തൃശ്ശൂര്‍ ഗുരുവായൂരിലെ ലോഡ്ജ് മുറിയില്‍ തൂങ്ങിമരിച്ച നിലയില്‍ കണ്ടെത്തി. ആലപ്പുഴ നര്‍ക്കോട്ടിക് സെല്‍ എ.എസ്.ഐയും മാരാരിക്കുളം പൊള്ളേത്തൈ സ്വദേശിയുമായ ശാന്തകുമാര്‍ (52) ആണ് മരണപ്പെട്ടത്. സാമ്പത്തിക ബാധ്യതയെത്തുടര്‍ന്നുള്ള ആത്മഹത്യയെന്നാണ് പ്രാഥമിക നിഗമനം.
കഴിഞ്ഞ വ്യാഴാഴ്ച വൈകിട്ട് മുതല്‍ ശാന്തകുമാറിനെ കാണാനില്ലായിരുന്നു. തുടര്‍ന്ന് ബന്ധുക്കള്‍ നല്‍കിയ പരാതിയുടെ അടിസ്ഥാനത്തില്‍ ആലപ്പുഴ സൗത്ത് പോലീസ് ഇന്ന് കേസ് രജിസ്റ്റര്‍ ചെയ്ത് അന്വേഷണം നടത്തിവരികയായിരുന്നു. മൊബൈല്‍ ടവര്‍ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തിലാണ് ശാന്തകുമാര്‍ ഗുരുവായൂരില്‍ ഉണ്ടെന്ന് പോലീസിന് വിവരം ലഭിക്കുന്നത്. തുടര്‍ന്ന് നടത്തിയ തിരച്ചിലില്‍ ഗുരുവായൂരിലെ ഒരു സ്വകാര്യ ലോഡ്ജ് മുറിയില്‍ ഇദ്ദേഹത്തെ തൂങ്ങിമരിച്ച നിലയില്‍ കണ്ടെത്തുകയായിരുന്നു.
പുതിയ വീട് നിര്‍മ്മാണവുമായി ബന്ധപ്പെട്ട് ശാന്തകുമാറിന് വലിയ രീതിയിലുള്ള സാമ്പത്തിക ബാധ്യതകള്‍ ഉണ്ടായിരുന്നതായി സൂചനയുണ്ട്. ഇതേത്തുടര്‍ന്നുണ്ടായ മാനസിക വിഷമമാകാം ആത്മഹത്യയിലേക്ക് നയിച്ചതെന്നാണ് സംശയിക്കുന്നത്. സംഭവത്തില്‍ ഗുരുവായൂര്‍ പോലീസും ആലപ്പുഴ സൗത്ത് പോലീസും മേല്‍നടപടികള്‍ സ്വീകരിച്ചു വരികയാണ്. ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം പോസ്റ്റ്‌മോര്‍ട്ടത്തിനായി മാറ്റും.
