ന്യൂഡല്ഹി: കഴിഞ്ഞ 12 വര്ഷത്തിനിടയില് രാജ്യത്തെ സാധാരണക്കാര്ക്ക് മികച്ച ആരോഗ്യപരിപാലനം കൂടുതല് കുറഞ്ഞ ചെലവിലും എളുപ്പത്തിലും ലഭ്യമാക്കാന് ഇന്ത്യക്ക് സാധിച്ചുവെന്ന് പ്രധാനമന്ത്രി നരേന്ദ്ര മോദി. ലോകത്തിലെ ഏറ്റവും വലിയ ആരോഗ്യ പരിരക്ഷാ പദ്ധതിയായ ‘ആയുഷ്മാന് ഭാരത്’ നിലവിലുള്ള രാജ്യം എന്ന നിലയില് ഭാരതത്തിന് അഭിമാനിക്കാമെന്ന് അദ്ദേഹം ഒരു സോഷ്യല് മീഡിയ പോസ്റ്റില് വ്യക്തമാക്കി. സമൂഹത്തിലെ ഏറ്റവും പിന്നാക്കം നില്ക്കുന്ന ജനവിഭാഗങ്ങള്ക്ക് പോലും മികച്ച ചികിത്സ ഉറപ്പാക്കാന് ഈ പദ്ധതിയിലൂടെ സാധിക്കുന്നുണ്ടെന്ന് അദ്ദേഹം കൂട്ടിച്ചേര്ത്തു.
‘പ്രധാനമന്ത്രി ഭാരതീയ ജന് ഔഷധി പരിയോജന’ പോലുള്ള പദ്ധതികള് വഴി സാധാരണക്കാര്ക്ക് ആവശ്യമായ മരുന്നുകള് വളരെ കുറഞ്ഞ വിലയില് ലഭ്യമാക്കാന് സാധിച്ചു. ഹൃദയസംബന്ധമായ ചികിത്സകള്ക്ക് ഉപയോഗിക്കുന്ന സ്റ്റെന്റുകള്, മുട്ടുമാറ്റിവെക്കല് ശസ്ത്രക്രിയയ്ക്കുള്ള ഇംപ്ലാന്റുകള് എന്നിവയുടെ വില ഗണ്യമായി കുറഞ്ഞത് ഒട്ടനവധി രോഗികള്ക്ക് വലിയ ആശ്വാസമായി മാറി. രാജ്യത്ത് കൂടുതല് മെഡിക്കല് കോളേജുകളും സീറ്റുകളും ലഭ്യമാക്കിയതോടെ, മെഡിക്കല് വിദ്യാഭ്യാസം നേടുക എന്നത് കൂടുതല് വിദ്യാര്ത്ഥികള്ക്ക് എളുപ്പമുള്ള കാര്യമായി മാറി.
ആരോഗ്യമുള്ള ഒരു ഇന്ത്യയെ കെട്ടിപ്പടുക്കുന്നതിനായി ഇതുവരെ കൈവരിച്ച നേട്ടങ്ങളെ മുന്നിര്ത്തി കേന്ദ്ര സര്ക്കാര് കൂടുതല് ശക്തമായി മുന്നോട്ട് പോകുമെന്നും പ്രധാനമന്ത്രി പ്രത്യാശ പ്രകടിപ്പിച്ചു.
