ന്യൂഡൽഹി: വിരമിച്ച ശേഷം ഭാര്യയ്‌ക്കൊപ്പം ലോകം ചുറ്റാൻ മാറ്റിവെച്ച പിഎഫ് തുക സൈന്യത്തിന് സംഭാവന ചെയ്ത് നാഗ്പൂർ സ്വദേശി. പഞ്ചാബ് നാഷണൽ ബാങ്കിൽ നിന്ന് വിരമിച്ച ശ്രീകാന്ത് സഹസ്രബുദ്ധെയാണ് 25 ലക്ഷം രൂപയുടെ ചെക്ക് ഇന്ത്യൻ ആർമി സെൻട്രൽ വെൽഫെയർ ഫണ്ടിലേക്ക് സംഭാവന ചെയ്തത്.
പഞ്ചാബ് നാഷണൽ ബാങ്കിലാണ് ശ്രീകാന്തും ഭാര്യയും ജോലി ചെയ്തിരുന്നത്. ജോലി തിരക്കുകൾക്കിടയിൽ ഇരുവർക്കും യാത്ര ചെയ്യാനൊന്നും സമയം കിട്ടിയിരുന്നില്ല. അതിനാൽ വിരമിച്ച ശേഷം ലോകം ചുറ്റിക്കാണാൻ ഇവർ തീരുമാനിക്കുകയും പി.എഫ് അതിനായി മാറ്റിവെക്കുകയും ചെയ്തു. എന്നാൽ വിധി മറ്റൊന്നായിരുന്നു. വിരമിക്കുന്നതിന് മുൻപ് ആറ് മാസം മുൻപ് ഭാര്യയെ മരണം തട്ടിയെടുത്തു. ഇരുവരും ചേർന്ന് കാണാൻ ആഗ്രഹിച്ച ലോകം പിന്നീട് അദ്ദേഹത്തിന് ശൂന്യമായി തോന്നി. യാത്ര ചെയ്യാനുള്ള ആഗ്രഹവും മനസ്സും നഷ്ടമാവുകയും മാറ്റിവെച്ച പണം അവിടെ തന്നെ ബാക്കിയാവുകയും ചെയ്തു.
കുറച്ചു കാലം മുൻപ് അകോല സ്വദേശിയായ ഒരാൾ സായുധ സേനയ്‌ക്ക് ഒരു കോടി രൂപ സംഭാവന നൽകിയതിനെക്കുറിച്ചുള്ള വാട്സ്ആപ്പ് സന്ദേശം അദ്ദേഹം വായിച്ചിരുന്നു. ഇതോടെയാണ് ഇത്തരം ഒരു ആശയം അദ്ദേഹത്തിന്റെ മനസ്സിലും ഉരുത്തിരിഞ്ഞത്. “ഭാര്യയോടൊപ്പം ലോകം ചുറ്റി സഞ്ചരിച്ചിരുന്നെങ്കിൽ ലഭിക്കുമായിരുന്ന സന്തോഷം, ഈ സംഭാവനയിലൂടെ എനിക്ക് ലഭിക്കും” — അദ്ദേഹം വാർത്താ ഏജൻസിയായ പിടിഐയോട് പറഞ്ഞു.
വ്യാഴാഴ്ച നാഗ്പൂരില് നടന്ന ചടങ്ങില് 25.51 ലക്ഷം രൂപയുടെ ചെക്ക് സഹസ്രബുദ്ധെ ഉത്തർ മഹാരാഷ്‌ട്ര, ഗുജറാത്ത് സബ് ഏരിയ ജനറല് ഓഫീസർ കമാൻഡിംഗ് മേജർ ജനറൽ നവ്തേജ് എസ് സോഹലിന് കൈമാറി. സൈനികർ, യുദ്ധവിധവകൾ, വികലാംഗർ, രക്തസാക്ഷികളുടെ കുടുംബങ്ങൾ എന്നിവർക്ക് സാമ്പത്തിക സഹായം നൽകുന്ന ഇന്ത്യൻ ആർമി സെൻട്രൽ വെൽഫെയർ ഫണ്ടിലേക്കാണ് ഈ പണം എത്തുക. നാഗ്പൂർ (മഹാരാഷ്‌ട്ര) പ്രതിരോധ മന്ത്രാലയമാണ് ഹൃദയം തൊടുന്ന നന്മ സോഷ്യൽ മീഡിയയിൽ പങ്കുവെച്ചത്.
A Retired Bank Employee Donates Rs 25.51 Lakhs to Indian Army Central Welfare Fund !!!✨
Mr Shreekant Sahasrabuddhe, a retired bank employee in an inspiring gesture toward national service and social commitment, donated a substantial amount of Rs 25.51 lakhs from his life… pic.twitter.com/o4EhQVDzU3
— PRO Nagpur, Ministry of Defence (@PRODefNgp) June 13, 2026
