ബെംഗളൂരു : നീറ്റ് പരീക്ഷാ ദിവസം തന്നെ നഗരമധ്യത്തിൽ മെഗാ റാലി സംഘടിപ്പിച്ചതിന് ഇന്ത്യൻ നാഷണൽ കോൺഗ്രസ്സിനെതിരെ രൂക്ഷ വിമർശനവുമായി ബിജെപി എംപിയായ തേജസ്വി സൂര്യ രംഗത്തെത്തി. കോൺഗ്രസിന് റാലിക്കായി മറ്റേതെങ്കിലും ദിവസം തിരഞ്ഞെടുക്കാമായിരുന്നുവെങ്കിലും, ആയിരക്കണക്കിന് വിദ്യാർത്ഥികൾ രാജ്യത്തെ ഏറ്റവും നിർണായകമായ പ്രവേശന പരീക്ഷകളിലൊന്നായ നീറ്റ് എഴുതുന്ന ദിവസം തന്നെയാണ് തിരഞ്ഞെടുത്തതെന്ന് അദ്ദേഹം ആരോപിച്ചു.
B. K. ഹരിപ്രസാദ് പാർട്ടിയുടെ പുതിയ സംസ്ഥാന പ്രസിഡന്റായി ചുമതലയേറ്റതുമായി ബന്ധപ്പെട്ട് ബെംഗളൂരുവിലെ പാലസ് ഗ്രൗണ്ടിൽ സംഘടിപ്പിച്ച മെഗാ കൺവെൻഷനാണ് വൻ ഗതാഗതക്കുരുക്കിന് കാരണമായതെന്നാണ് ബിജെപിയുടെ ആരോപണം.കന്നഡ മാധ്യമ ങ്ങളും ഈ വാർത്ത ശരിവെക്കുന്നുണ്ട്.
“പാലസ് ഗ്രൗണ്ടിൽ നടക്കുന്ന റാലിക്ക് കോൺഗ്രസിന് മറ്റേതെങ്കിലും ദിവസം തിരഞ്ഞെടുക്കാമായിരുന്നു. എന്നാൽ ആയിരക്കണക്കിന് വിദ്യാർത്ഥികൾ നീറ്റ് എഴുതുന്ന ദിവസം തന്നെയാണ് അവർ തെരഞ്ഞെടുത്തത്. ബെംഗളൂരുവിൽ വലിയ ഗതാഗത തടസ്സങ്ങൾ ഉണ്ടായതിനാൽ നിരവധി വിദ്യാർത്ഥികൾ വൈകി; ചിലർ പരിഭ്രാന്തരായി പരീക്ഷാകേന്ദ്രങ്ങളിൽ എത്തി അകത്തേക്ക് കടക്കാൻ അധികൃതരോട് അപേക്ഷിക്കേണ്ടിവന്നു,” എന്ന് തേജസ്വി സൂര്യ എക്സിൽ കുറിച്ചു.
.
ആഴ്ചകളായി രാഹുൽ ഗാന്ധി വിദ്യാർത്ഥികളെയും പരീക്ഷകളെയും കുറിച്ച് “മുതലക്കണ്ണീർ” പൊഴിക്കുകയാണെന്ന് സൂര്യ വിമർശിച്ചു. “ആ ആശങ്ക യഥാർത്ഥമായിരുന്നെങ്കിൽ, ഇന്ത്യയിലെ ഏറ്റവും പ്രധാനപ്പെട്ട പ്രവേശന പരീക്ഷകളിലൊന്നിന്റെ ദിവസം നഗരത്തിന്റെ ഹൃദയഭാഗത്ത് ഒരു മെഗാ രാഷ്ട്രീയ റാലി നടത്തുന്നത് അദ്ദേഹത്തിന്റെ പാർട്ടി ഒഴിവാക്കുമായിരുന്നു,” എന്നും അദ്ദേഹം പറഞ്ഞു.
“രാഷ്ട്രീയ നാടകങ്ങളല്ല, പരിഗണനയും ഉത്തരവാദിത്വവുയാണ് വിദ്യാർത്ഥികൾക്ക് വേണ്ടത്. വിദ്യാർത്ഥികളോടുള്ള ആശങ്ക ഡൽഹിയിൽ ഒരു മുദ്രാവാക്യവും ബെംഗളൂരുവിൽ ഒരു അസൗകര്യവുമാകാൻ പാടില്ല,” എന്നും സൂര്യ കൂട്ടിച്ചേർത്തു.
അതേസമയം, കോൺഗ്രസ് സർക്കാരിനുവേണ്ടി പ്രതികരിച്ച പ്രിയങ്ക് ഖാർഗെ , ആർ.ടി. നഗർ ഭാഗത്തുനിന്ന് യാത്ര ചെയ്ത ഒരു സ്ഥാനാർത്ഥി മാത്രമാണ് പരീക്ഷ എഴുതാതിരുന്നതെന്നും കൃത്യമായ കാരണം ഇപ്പോഴും വ്യക്തമായിട്ടില്ലെന്നും പറഞ്ഞു. ബെംഗളൂരു ട്രാഫിക് പൊലീസ് നേരത്തെ തന്നെ പൊതുജനങ്ങൾക്ക് ട്രാഫിക് മുന്നറിയിപ്പുകളും യാത്രാ നിർദേശങ്ങളും നൽകിയിരുന്നുവെന്നും അദ്ദേഹം ചൂണ്ടിക്കാട്ടി.
