കൊല്‍ക്കത്ത: പശ്ചിമ ബംഗാള്‍ നിയമസഭയില്‍ ധനമന്ത്രി സ്വപന്‍ ദാസ്ഗുപ്ത സംസ്ഥാന സര്‍ക്കാരിന്റെ ആദ്യ സമ്പൂര്‍ണ ബജറ്റ് അവതരിപ്പിച്ചു. സാമൂഹിക ക്ഷേമം, അടിസ്ഥാന സൗകര്യ വികസനം, തൊഴില്‍സൃഷ്ടി, വിദ്യാഭ്യാസം, വനിതാ ശാക്തീകരണം എന്നിവ മുന്‍നിര്‍ത്തിയുള്ള നിരവധി സുപ്രധാന പ്രഖ്യാപനങ്ങളാണ് ബജറ്റില്‍ ഉള്‍പ്പെടുത്തിയിരിക്കുന്നത്. തൊഴിലില്ലാത്ത യുവാക്കള്‍ക്കായി ‘ഭരോസ’ പദ്ധതി പ്രഖ്യാപിച്ചാണ് ബജറ്റിലെ പ്രധാന ആകര്‍ഷണം.
21 മുതല്‍ 45 വയസ് വരെയുള്ള തൊഴിലില്ലാത്ത ബിരുദധാരികള്‍ക്ക് പ്രതിമാസം 3,000 രൂപ സാമ്പത്തിക സഹായം നല്‍കും. ബിരുദമില്ലാത്ത തൊഴിലില്ലാത്തവര്‍ക്ക് 2,000 രൂപ വീതം പ്രതിമാസ ധനസഹായം ലഭ്യമാക്കുമെന്നും ധനമന്ത്രി അറിയിച്ചു. സ്ത്രീകളുടെ ക്ഷേമത്തിനും യാത്രാസൗകര്യത്തിനും പ്രത്യേക പ്രാധാന്യം നല്‍കുന്ന ബജറ്റില്‍, വനിതകള്‍ക്ക് സൗജന്യ ബസ് യാത്ര ഉറപ്പാക്കുന്നതിനായി 550 കോടി രൂപ വകയിരുത്തി. കൂടാതെ വനിതകള്‍ക്കായുള്ള സാമ്പത്തിക സഹായ പദ്ധതിയായ അന്നപൂര്‍ണ യോജന നടപ്പാക്കാന്‍ 36,000 കോടി രൂപ നീക്കിവെച്ചതായും പ്രഖ്യാപിച്ചു.
വിദ്യാഭ്യാസ മേഖലയിലും വലിയ പ്രഖ്യാപനങ്ങളാണ് ബജറ്റിലുണ്ടായത്. ഉത്തര ബംഗാളില്‍ ആദ്യമായി ഐഐടിയും ഐഐഎമ്മും സ്ഥാപിക്കുമെന്ന് സര്‍ക്കാര്‍ അറിയിച്ചു. ഇതിലൂടെ മേഖലയിലെ ഉന്നത വിദ്യാഭ്യാസത്തിനും ഗവേഷണത്തിനും കൂടുതല്‍ അവസരങ്ങള്‍ സൃഷ്ടിക്കുമെന്നാണ് വിലയിരുത്തല്‍. വ്യോമഗതാഗത വികസനത്തിനും ബജറ്റില്‍ ഊന്നല്‍ നല്‍കിയിട്ടുണ്ട്. കൊല്‍ക്കത്ത വിമാനത്താവളത്തിലെ തിരക്ക് കുറയ്‌ക്കുന്നതിനായി കല്യാണിയില്‍ ഗ്രീന്‍ഫീല്‍ഡ് വിമാനത്താവളം നിര്‍മ്മിക്കാന്‍ 1,000 മുതല്‍ 1,500 ഏക്കര്‍ വരെ ഭൂമി കണ്ടെത്തുമെന്ന് ധനമന്ത്രി വ്യക്തമാക്കി.
കേന്ദ്രത്തിന്റെ ഉഡാന്‍ പദ്ധതിയുടെ ഭാഗമായി പുരുലിയ, ബാലൂര്‍ഘട്ട്, മാല്‍ഡ എന്നീ പ്രദേശങ്ങളില്‍ പുതിയ വിമാനത്താവളങ്ങള്‍ സ്ഥാപിക്കുമെന്നും കൂച്ച് ബിഹാര്‍ വിമാനത്താവളം വികസിപ്പിക്കുമെന്നും ബജറ്റില്‍ പ്രഖ്യാപിച്ചു. സര്‍ക്കാര്‍ മേഖലയില്‍ വന്‍ നിയമനങ്ങള്‍ക്കും ബജറ്റ് വഴി വഴിയൊരുങ്ങും. സംസ്ഥാന പോലീസില്‍ ഒഴിവുള്ള 20,000 തസ്തികകളും, വിദ്യാഭ്യാസ മേഖലയിലെ 50,000 അധ്യാപക ഒഴിവുകളും നികത്തുന്നതിനുള്ള റിക്രൂട്ട്‌മെന്റ് നടപടികള്‍ ആരംഭിക്കുമെന്ന് ധനമന്ത്രി അറിയിച്ചു.
മാധ്യമപ്രവര്‍ത്തകരുടെ ക്ഷേമത്തിനായും ബജറ്റില്‍ പ്രഖ്യാപനമുണ്ട്. വിരമിച്ച മാധ്യമപ്രവര്‍ത്തകര്‍ക്ക് പ്രതിമാസം 5,000 രൂപ പെന്‍ഷന്‍ നല്‍കുന്ന പദ്ധതിയും സര്‍ക്കാര്‍ നടപ്പിലാക്കുമെന്ന് ധനമന്ത്രി സഭയില്‍ വ്യക്തമാക്കി.
