തിരുവനന്തപുരം: വീര്യം കുറഞ്ഞ മദ്യത്തിനുള്ള നികുതി കുറയ്‌ക്കാനുള്ള സംസ്ഥാന സര്‍ക്കാരിന്റെ നീക്കം യുവതലമുറയെ ലഹരി ഉപയോഗത്തിലേക്ക് കൂടുതല്‍ ആകര്‍ഷിക്കുമെന്ന ഗുരുതര ആരോപണവുമായി ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര്‍ എം.എല്‍.എ രംഗത്ത്. നികുതി കുറയ്‌ക്കുന്ന തീരുമാനത്തിന് പിന്നില്‍ അഴിമതി താല്‍പര്യങ്ങളുണ്ടോയെന്ന കാര്യത്തില്‍ സംശയമുണ്ടെന്നും സര്‍ക്കാര്‍ ഇക്കാര്യത്തില്‍ വ്യക്തമായ വിശദീകരണം നല്‍കണമെന്നും അദ്ദേഹം ആവശ്യപ്പെട്ടു.
സംസ്ഥാനത്തിന്റെ മദ്യനയവുമായി ബന്ധപ്പെട്ട വിഷയങ്ങളില്‍ എല്‍ഡിഎഫിനും യുഡിഎഫിനും തമ്മില്‍ അടിസ്ഥാനപരമായ വ്യത്യാസമില്ലെന്ന് അദ്ദേഹം വിമര്‍ശിച്ചു. ഒരു വശത്ത് ലഹരിവിരുദ്ധ പ്രചാരണങ്ങള്‍ നടത്തുകയും മറുവശത്ത് മദ്യലഭ്യതയും ഉപഭോഗവും വര്‍ധിപ്പിക്കാന്‍ സഹായകമായ നടപടികള്‍ സ്വീകരിക്കുകയും ചെയ്യുന്നത് പരസ്പരവിരുദ്ധമായ സമീപനമാണെന്നും അദ്ദേഹം ചൂണ്ടിക്കാട്ടി.
മുന്‍ എല്‍ഡിഎഫ് സര്‍ക്കാര്‍ സമാനമായ നയം മുന്നോട്ടുവെച്ചപ്പോള്‍ അതിനെ എതിര്‍ത്തിരുന്ന വി.ഡി. സതീശന്‍ മുഖ്യമന്ത്രിയായ ശേഷവും അതേ നിലപാട് തുടരുകയാണെന്നും രാജീവ് ചന്ദ്രശേഖര്‍ ആരോപിച്ചു. ഭരണമാറ്റം ഉണ്ടായെങ്കിലും മദ്യനയത്തില്‍ മാറ്റമൊന്നുമില്ലെന്നും മദ്യവിപണിയുടെ താല്‍പര്യങ്ങള്‍ സംരക്ഷിക്കുന്നതില്‍ ഇരു മുന്നണികളും ഒരേ നിലപാടാണ് സ്വീകരിക്കുന്നതെന്നും അദ്ദേഹം പറഞ്ഞു.
വീര്യം കുറഞ്ഞ മദ്യത്തിന്റെ നികുതി കുറയ്‌ക്കുന്നത് പൊതുസമൂഹത്തിന് തെറ്റായ സന്ദേശം നല്‍കുമെന്നും ഇത്തരം പാനീയങ്ങള്‍ ആരോഗ്യത്തിന് വലിയ ഭീഷണിയല്ലെന്ന ധാരണ യുവാക്കള്‍ക്കിടയില്‍ വളര്‍ത്താനിടയുണ്ടെന്നും അദ്ദേഹം മുന്നറിയിപ്പ് നല്‍കി. ഇതിലൂടെ പുതിയ തലമുറയില്‍ മദ്യോപയോഗം വര്‍ധിക്കാനുള്ള സാഹചര്യം സൃഷ്ടിക്കപ്പെടുമെന്നും അദ്ദേഹം അഭിപ്രായപ്പെട്ടു.
മുഖ്യമന്ത്രി സ്വന്തം പാര്‍ട്ടിയുമായോ ബന്ധപ്പെട്ട വകുപ്പ് മന്ത്രിയുമായോ വിശദമായ ചര്‍ച്ചകള്‍ നടത്താതെയാണ് ഈ തീരുമാനം എടുത്തതെന്ന വിവരങ്ങള്‍ പുറത്തുവരുന്നതായും അദ്ദേഹം പറഞ്ഞു. ഈ ഏകപക്ഷീയ നീക്കത്തിന് പിന്നില്‍ സാമ്പത്തിക ക്രമക്കേടുകളോ അഴിമതി താല്‍പര്യങ്ങളോ ഉണ്ടോയെന്ന് സര്‍ക്കാര്‍ വ്യക്തമാക്കേണ്ടതുണ്ടെന്നും അദ്ദേഹം ആവശ്യപ്പെട്ടു.
വീര്യം കുറഞ്ഞ മദ്യത്തിനുള്ള നികുതി ഇളവ് ഉടന്‍ പിന്‍വലിക്കണമെന്നും കേരളത്തെ ലഹരിമുക്തമാക്കണമെങ്കില്‍ ലഹരി ഉപയോഗത്തിന് പ്രോത്സാഹനം നല്‍കുന്ന നയങ്ങളില്‍ നിന്ന് സര്‍ക്കാര്‍ പിന്മാറുകയാണ് വേണ്ടതെന്നും രാജീവ് ചന്ദ്രശേഖര്‍ വ്യക്തമാക്കി.
