കൊച്ചി: വൈറ്റിലയിലെ അപകടാവസ്ഥയിലായ ആര്മി ഫ്ലാറ്റ് സമുച്ചയം നിയന്ത്രിത സ്ഫോടനത്തിലൂടെ പൊളിക്കാനുള്ള നടപടികള്ക്ക് താത്കാലിക ബ്രേക്കിട്ട് ഹൈക്കോടതി. ടെന്ഡര് നടപടികളുമായി ബന്ധപ്പെട്ട് ഉയര്ന്ന തര്ക്കത്തെ തുടര്ന്നാണ് അന്തിമ ഉത്തരവ് വരുന്നതുവരെ പൊളിക്കല് നടപടികള് നിര്ത്തിവെക്കാന് കോടതി നിര്ദേശിച്ചത്. 26 നിലകളുള്ള ഇരട്ട ടവറുകള് പൊളിക്കുന്നതിനായുള്ള ടെന്ഡര് നടപടിയില് നിന്ന് ഒഴിവാക്കപ്പെട്ട ചെന്നൈ ആസ്ഥാനമായ പി.കെ. യൂണിക് എന്ന കമ്പനിയാണ് കോടതിയെ സമീപിച്ചത്.
ഏറ്റവും കുറഞ്ഞ തുക ക്വോട്ട് ചെയ്തിട്ടും തങ്ങളെ പരിഗണിക്കാതിരുന്നത് നിയമവിരുദ്ധമാണെന്നാണ് ഹര്ജിക്കാരുടെ പ്രധാന വാദം. കേസില് കൂടുതല് വിശദമായ വാദം കേള്ക്കേണ്ടതുണ്ടെന്ന് വിലയിരുത്തിയ ഡിവിഷന് ബെഞ്ച് വിഷയം സിംഗിള് ബെഞ്ചിന്റെ പരിഗണനയ്ക്ക് വിട്ടു. അന്തിമ തീരുമാനം ഉണ്ടാകുന്നതുവരെ കെട്ടിടം പൊളിക്കുന്ന നടപടികള് സ്വീകരിക്കരുതെന്നും കോടതി വ്യക്തമാക്കി.
അതേസമയം, പൊളിക്കലിന് മുന്നോടിയായുള്ള അനുബന്ധ നടപടികളുമായി ജില്ലാ ഭരണകൂടത്തിന് മുന്നോട്ട് പോകുന്നതിന് വിലക്കില്ലെന്നും കോടതി നിരീക്ഷിച്ചു. അതിനാല് സുരക്ഷാ ക്രമീകരണങ്ങള് ഉള്പ്പെടെയുള്ള പ്രാഥമിക പ്രവര്ത്തനങ്ങള് തുടരുമെന്നാണ് സൂചന.
മരടിലെ ഫ്ലാറ്റുകള് നിയന്ത്രിത സ്ഫോടനത്തിലൂടെ വിജയകരമായി പൊളിച്ച എഡിഫെയ്സ് എന്ന കമ്പനിക്കാണ് വൈറ്റില ഫ്ലാറ്റ് പൊളിക്കുന്ന കരാര് നല്കിയിരിക്കുന്നത്. പ്രവൃത്തി പരിചയവും സാങ്കേതിക മികവും പരിഗണിച്ചാണ് കരാര് നല്കിയതെന്നാണ് ബന്ധപ്പെട്ടവരുടെ വിശദീകരണം.
