റാന്നി : ജനവാസമേഖലകളിലേക്കുള്ള കാട്ടാനയുടെ ആക്രമണം കുറയ്ക്കാൻ വ്യത്യസ്തമായ പദ്ധതിയുമായി സംസ്ഥാന വനം വകുപ്പ് . അടുത്ത സീസൺ മുതൽ വനാതിർത്തി പ്രദേശങ്ങളിലെ ചക്ക പഴുക്കും മുൻപേ തന്നെ വനം വകുപ്പ് നേരിട്ട് വാങ്ങി ശേഖരിക്കുന്ന പദ്ധതി നടപ്പാക്കുമെന്ന് വനം മന്ത്രി ഷിബു ബേബി ജോൺ അറിയിച്ചു.
കാട്ടാനയെ ഗ്രാമങ്ങളിലേക്ക് ആകർഷിക്കുന്ന പ്രധാന ഘടകങ്ങളിൽ ഒന്നാണ് പഴുത്ത ചക്കയെന്ന് മന്ത്രി പറഞ്ഞു. കർഷകരോട് പ്ലാവ് വെട്ടിമാറ്റാൻ പറയാനാകില്ലെന്നും, എന്നാൽ ചക്ക പഴുക്കാൻ അനുവദിച്ചാൽ ആന എങ്ങനെയെങ്കിലും ജനവാസ മേഖലയിലേക്ക് ഇറങ്ങുമെന്നത് യാഥാർത്ഥ്യമാണെന്നും അദ്ദേഹം വ്യക്തമാക്കി.
ഇടിച്ചക്കയ്ക്ക് വിപണിയിൽ നല്ല ആവശ്യകതയുണ്ടെന്നും, പഴുക്കുന്നതിന് മുമ്പ് ചക്ക പറിച്ച് നൽകിയാൽ കർഷകർക്ക് പണം നൽകുമെന്നും മന്ത്രി പറഞ്ഞു. പദ്ധതിയിൽ സർക്കാരിന് സാമ്പത്തിക നഷ്ടമുണ്ടായാലും അത് സഹിക്കാൻ തയ്യാറാണെന്നും അദ്ദേഹം കൂട്ടിച്ചേർത്തു.
വനഭൂമിയിൽ ചിലയിടങ്ങളിൽ നടക്കുന്ന പൈനാപ്പിൾ കൃഷിയും കാട്ടാനകളെ ആകർഷിക്കുന്ന കാരണങ്ങളിലൊന്നാണെന്ന് മന്ത്രി ചൂണ്ടിക്കാട്ടി. രുചികരമായ ഭക്ഷ്യവിളകൾ വനാതിർത്തിയിൽ വ്യാപിക്കുന്നതോടെ ആനകൾ പതിവായി മനുഷ്യവാസ മേഖലകളിലേക്ക് എത്തുന്ന സാഹചര്യം ശക്തമായിട്ടുണ്ടെന്നും അദ്ദേഹം പറഞ്ഞു.
കാട്ടാനകളുടെ സാമൂഹിക ഘടനയിലും മാറ്റമുണ്ടായതായി മന്ത്രി നിരീക്ഷിച്ചു. ഒരുകാലത്ത് 50-ഓളം അംഗങ്ങളുള്ള വലിയ കൂട്ടങ്ങളെ പരിചയസമ്പന്നമായ തള്ളയാനകളാണ് നയിച്ചിരുന്നത്. ഇപ്പോൾ കൂട്ടങ്ങൾ അഞ്ചോ എട്ടോ അംഗങ്ങളുള്ള ചെറിയ സംഘങ്ങളായി ചുരുങ്ങിയിരിക്കുകയാണ്. ഇവയെ നയിക്കുന്നത് അനുഭവപരിചയം കുറവുള്ള ആനകളായതിനാൽ ആക്രമണ സ്വഭാവം കൂടുന്നുവെന്നും മന്ത്രി പറഞ്ഞു.
മനുഷ്യൻ കാട്ടാനയുടെ ആവാസമേഖലയിലേക്ക് കൂടുതൽ കടന്നുകയറുന്നതിനനുസരിച്ച് മനുഷ്യ-വന്യജീവി സംഘർഷവും വർധിക്കുകയാണെന്ന് മന്ത്രി മുന്നറിയിപ്പ് നൽകി. “മുമ്പ് ആന മനുഷ്യനെ കണ്ടാൽ ഒഴിഞ്ഞുമാറും; ഇന്ന് പലപ്പോഴും അക്രമാസക്തമാകുന്നു” എന്നും അദ്ദേഹം പറഞ്ഞു.
